A du sani na wan koni fasi, sondro fu frede, èn sondro fu denki ensrefi nomo

ESTER ben e waka safrisafri go na a kownusturu. En ati ben e naki tranga. Prakseri fa wantronso ala sani kon pî na ini a bigi kownu kamra fu a Persia kownu-oso na ini Susan. A ben de so pî taki Ester ben man yere srefi fa a ben e waka èn a ben man yere den moi krosi fu en tu. A no ben kan meki den kefalek moi sani fu a kownu-oso puru en prakseri na a sani di a ben o du. Nôno, a no ben e luku den moi pilari noso den moi prenki di den ben koti na ini a plafon fu sedre-udu di ben komoto te na Libanon. A ben e poti prakseri soso na a man di ben e sidon na tapu a kownusturu, iya, en libi ben de na ini na anu fu a man dati.

A kownu ben e tan luku Ester di a ben e waka kon miti en, èn a langa en gowtu tiki gi en. A sani di a kownu ben du ben de wan pikin sani, ma na Ester en libi ben de na ini a tori. Nanga a sani dati, a kownu ben e gi en pardon taki a ben kon na en fesi sondro taki a ben kisi wan kari. Di Ester ben e waka kon na a kownusturu, dan a langa en anu fu fasi a gowtu tiki, aladi a ben breiti taki en masra ben sori sari-ati gi en.​—Ester 5:1, 2.a

Te yu ben luku Kownu Ahasferos, dan yu ben kan si o furu gudu nanga makti a ben abi. Soleki fa sabiman e taki, dan na a ten dati den krosi fu den kownu fu Persia ben warti hondrohondro milyun dala. Ma Ester ben kan si na ini den ai fu en masra taki a ben e firi gi en. Awansi fa a no fa a ben e sori taki a lobi en. A Kownu ben taki: „San pasa Ester, mi uma? San yu wani aksi mi? Awinsi na afu fu mi kownukondre, yu o kisi en!”​—Ester 5:3.

Ester ben sori kaba taki a ben abi wan tranga bribi nanga furu deki-ati. A ben kon na fesi a kownu fu kibri a pipel fu en gi sma di ben meki mofo fu kiri den alamala. Te nanga now, sani ben e waka bun, ma moro bigi tesi ben o miti en. Ester ben sabi taki a kownu disi no ben lobi te sma gi en syen. Ma now, a ben musu meki Kownu kon frustan taki a moro bun raiman fu en ben de wan ogri-ati man èn taki a ben kori Kownu fu meki wan wèt fu kiri a pipel fu Ester. Fa a ben o meki Kownu kon frustan a sani dati? San wi kan leri fu a bribi fu en?

A wakti teleki ’wan ten ben de fu taki’

Yu feni taki Ester ben musu fruteri a kownu a heri problema leti na fesi ala den sma di ben de na ini a kownu kamra? Te a ben o du dati, dan a ben kan meki a kownu kisi syen. Boiti dati, a sani dati ben kan gi Haman, a raiman fu Kownu, na okasi fu feni wan fasi fu sori taki Ester ben lei gi en. Sobun, san Ester du? Hondrohondro yari na fesi, a koni Kownu Salomo ben skrifi nanga yepi fu santa yeye: „Gi ala sani wan ten de, . . . wan ten de fu tan tiri èn wan ten de fu taki” (Preikiman 3:1, 7). Kande wi e si kaba fa a kwekipapa fu Ester, a reti-ati man Mordekai, ben e leri a yongu uma den sortu gronprakseri dati di a ben e kweki en. A no de fu taki dati Ester ben e frustan o prenspari a ben de fu sabi soifri o ten ben de a yoisti ’ten fu taki’.

Ester ben taki: „Efu Kownu feni en bun, dan meki Kownu nanga Haman kon tide fu nyan a bigi nyanyan di mi sreka gi en” (Ester 5:4). A kownu ben feni dati bun èn a seni kari Haman. Yu si fa Ester ben taki nanga koni? A sorgu taki en masra no kisi syen, èn a suku wan moro bun okasi fu fruteri en san ben de na tapu en ati.

A no de fu taki dati Ester sreka sani bun gi a fesa fu en, èn a sorgu taki sani ben o waka soifri soleki fa en masra ben o wani. Na a nyanyan fesa, bun win ben de fu meki den sma drape firi prisiri (Psalm 104:15). Fu di Ahasferos ben e firi prisiri tu, meki a aksi Ester ete wan tron san a ben wani taki a du gi en. Yu denki taki disi ben de a ten fu taki?

Ester no ben e denki so. Na presi fu dati, a gi a kownu nanga Haman wan kari fu kon na wan tra nyanyan fesa, a dei baka dati (Ester 5:7, 8). Fu san ede a ben wani wakti? Hori na prakseri taki a kownu ben meki wan wèt di ben e gi pasi taki sma kiri ala den Dyu. Fu di a sani dati ben de na ini a tori, meki Ester ben wani taki na a yoisti ten. Dati meki a wakti, èn na so a kisi na okasi tu fu sori en masra o furu lespeki a ben abi gi en.

Pasensi na wan moi fasi di furu sma no abi. Ester hori pasensi èn a wakti a yoisti momenti. Wi kan leri furu fu na eksempre fu en. Iya, kande wi alamala si wan leisi taki sani no pasa na wan reti fasi èn wi wani taki den sani dati poti kon reti baka. Te wi e pruberi fu overtoigi wan sma di abi frantwortu, fu poti prakseri na wan problema, dan a bun fu hori pasensi neleki Ester. Odo 25:15 e taki: „Nanga pasensi wan sma kan meki wan legre-edeman kenki en prakseri. Wan tongo di e taki na wan safri-ati fasi kan broko wan bonyo srefi.” Te wi e wakti nanga pasensi teleki a yoisti momenti doro fu taki, èn te wi e taki na wan safri fasi, neleki fa Ester ben du dati, dan awansi wi e kisi bun hebi gens di de leki wan bonyo di tranga fu broko, toku wi sa abi bun bakapisi. Yehovah, a Gado fu Ester, ben blesi en fu di a ben hori pasensi èn fu di a ben du sani na wan koni fasi?

Pasensi e meki taki sani e waka na wan reti fasi

A pasensi di Ester ben abi, meki taki difrenti moi sani pasa. Di Haman gowe libi a fosi nyanyan fesa, dan a ben „breiti èn a ben e prisiri srefisrefi” taki a kownu nanga en wefi ben lobi en so. Ma di Haman pasa a portu fu a kownu-oso go na dorosei, dan en ai fadon na tapu Mordekai, a Dyu di ben e tan weigri fu gi en spesrutu grani. A no ben de so kwetikweti taki Mordekai no ben abi lespeki gi en. Fu taki en leti, Mordekai no ben e gi spesrutu grani na a man disi, fu di en konsensi nanga a matifasi di a ben abi nanga Yehovah Gado, no ben e gi pasi taki a du dati. Ma fa Haman si Mordekai, „a kisi bigi atibron”.​—Ester 5:9.

Di Haman taigi en wefi nanga den mati fu en taki Mordekai weigri fu gi en grani, dan den gi en deki-ati fu taigi sma fu meki wan postu di ben hei pasa 22 meter. Den taigi en tu fu aksi a kownu primisi fu anga Mordekai na a postu disi. Haman ben feni dati bun, èn wantewante a go du san den ben taigi en.​—Ester 5:12-14.

Na a srefi ten, a kownu no ben abi wan bun neti. Bijbel e taki dati „Kownu no ben man sribi”, sobun a meki sma leisi gi en na ini a buku pe sani skrifi di ben pasa na ini a kondre dati. Den leisi tu gi a kownu taki sma ben meki mofo fu kiri Ahasferos. A kownu memre a tori dati. A ben meki sma kisi den man dati èn a meki den kiri den. Ma fa fu Mordekai, a man di ben tyari a tori dati kon na krin? Fu taki en leti, den no ben du noti gi a man dati.​—Ester 6:1-3.

A kownu no ben lobi a tori disi, èn a aksi sortu heihei man fu a kownu-oso ben de drape fu yepi en fu poti a sani disi kon reti baka. Fu ala sma di a ben kan feni, suma ben de drape? Haman! Èn a ben de drape fruku, fu di a no ben man wakti fu kisi primisi fu kiri Mordekai. Ma fosi Haman ben man aksi a kownu a sani dati, a kownu aksi en san ben de a moro bun fasi fu gi grani na wan man di a ben kon lobi. Haman ben denki taki a kownu ben e taki fu en. Sobun, na wan triki fasi, Haman gi a kownu a rai fu gi a man dati bun bigi grani. A taigi en: Weri kownukrosi gi a man dati, meki a sidon na tapu na asi fu a kownu, èn meki wan heihei man tyari en lontu na ini Susan aladi a e prèise a man bun tranga meki ala sma yere. Yu kan frustan taki Haman en heri fesi kenki di a kon sabi taki a man di ben o kisi grani ben de Mordekai! Èn suma a kownu poti fu prèise Mordekai meki ala sma yere? Na Haman!​—Ester 6:4-10.

A no ben switi srefisrefi gi Haman taki a ben musu gi grani na Mordekai, èn a sani dati meki taki a kisi moro bita-ati gi a man dati. Baka dati, a lon go na oso fu di a ben kon frede. En wefi nanga den mati fu en taigi en taki a fasi fa sani ben waka ben o tyari bigi problema kon gi en. A ben e gens a Dyu Mordekai, ma a no ben o abi bun bakapisi kwetikweti.​—Ester 6:12, 13.

Fu di Ester ben abi pasensi, meki a wakti ete wán dei fu aksi a kownu san a ben wani aksi en. Na so Haman ben kisi ten fu suku grani gi ensrefi, ma na presi fu dati, a kisi bigi syen. Èn suma sabi efu a no Yehovah srefi ben meki taki a kownu no ben man sribi a wán neti dati (Odo 21:1). Dati meki a no e fruwondru wi taki Gado Wortu e gi wi deki-ati fu ’wakti nanga pasensi’ (Mika 7:7). Te wi e wakti Gado, dan wi o si taki a man lusu den problema fu wi moro bun leki fa wisrefi ben o man lusu den.

A taki sondro fu frede

Ester no prefuru fu meki a kownu wakti moro langa. Na a di fu tu nyanyan fesa di a ben o hori, a ben o abi fu fruteri en ala sani. Ma fa a ben o du dati? Soleki fa sani waka, dan a kownu gi en na okasi dati, fu di a aksi en baka san a ben wani taki a du gi en (Ester 7:2). Gi Ester, disi ben de ’a ten fu taki’.

Kande wi e si kaba fa Ester ben e begi Gado na ini en ati, fosi a taigi a kownu a sani disi: „Efu Kownu e prisiri nanga mi èn efu Kownu feni en bun, dan mi wani aksi Kownu fu meki mi tan na libi. Mi e begi yu, meki mi pipel tan na libi tu” (Ester 7:3). Luku taki a sori a kownu taki a ben e lespeki den bosroiti di a ben e teki. A no de fu taki dati Ester ben de heri tra fasi leki Fasti, a wefi di a kownu ben abi fosi. Fasti ben gi en masra syen fu espresi! (Ester 1:10-12) Boiti dati, Ester no ben krutu a kownu fu a fowtu di a ben meki fu frutrow Haman. Na presi fu dati, a begi a kownu fu kibri en gi den sma di ben wani kiri en.

A no de fu taki dati a kownu skreki fu a sani di Ester aksi en. Suma ben o prefuru fu du ogri nanga a wefi fu en? Ester ben taki moro fara: „Sma seri mi nanga mi pipel leki srafu, fu di den wani puru wi na pasi. Den wani kiri wi alamala, fu di den no wani taki wi tan na libi. Efu na soso seri den ben seri wi leki srafu, mi no ben o taki noti. Ma na ogri disi no musu pasa, bika Kownu o lasi tu” (Ester 7:4). Luku taki Ester taki krin san na a problema, ma a taki tu dati a no ben o taki noti efu na soso seri sma ben wani seri en nanga a pipel fu en leki srafu. Ma efu sma ben o kiri ala den Dyu, dan Ester ben musu fu taigi a kownu, fu di a sani dati ben o de wan bigi lasi gi en.

Na eksempre fu Ester e leri wi heri bun san na a yoisti fasi fu kisi wan sma so fara taki a e bribi san wi e taki. Efu oiti yu musu meki wan lobiwan noso wan sma di abi bigi frantwortu kon sabi fu wan seryusu problema, dan a sa de wan bigi yepi te yu e hori pasensi, te yu e sori lespeki, èn te yu e taki sani krin.​—Odo 16:21, 23.

Ahasferos ben taki: „Pe a sma de di prefuru fu du a sani dati? Suma na en?” Kande wi e si kaba fa Ester sori finga go na a sma dati aladi a taki: „Na Haman! En na a gensman. Na en na a feanti di du na ogri disi.” San ben o pasa now? Haman ben e frede srefisrefi. Prakseri fa a kownu disi en fesi kon redi di a kon frustan taki a raiman di a ben frutrow ben kori en fu meki wan wèt di ben o meki taki sma kiri en lobi wefi! A kownu ati bron so te, taki a waka go na ini a dyari fu kisi ensrefi baka.​—Ester 7:5-7.

Now di a ben kon na krin taki Haman ben de wan lagi man di ben lai triki, dan a saka kindi na den futu fu a wefi fu a kownu. Di a kownu kon baka na ini a kamra, dan a si taki Haman ben e begi Ester di ben e didon na tapu a langa bangi fu en. A kownu kisi atibron èn a kosi Haman taki te na ini en oso a ben e suku fu didon nanga a wefi fu en. A sani dati ben e sori kaba taki na dede Haman ben musu dede. Den tapu en fesi èn den tyari en gowe. Baka dati, wan fu den man di ben e wroko gi a kownu taigi a kownu fu a hei postu di Haman ben meki sma sreka gi Mordekai. Wantewante Ahasferos taigi sma fu anga Haman na a postu dati.​—Ester 7:8-10.

Na ini a grontapu disi pe furu sani no e pasa na wan reti fasi, wi kan denki makriki taki noiti wi o si taki sani e poti kon reti baka. Oiti yu ben denki so? Ester no bruya noiti, a no krutukrutu, èn a no lasi bribi noiti. Di a ten doro, a no ben frede fu opo taki gi san ben bun, èn a ben abi a frutrow taki Yehovah ben o du san ben de fanowdu. Meki wi du dati tu! Yehovah no kenki. Na ini a ten disi a de so tu taki Gado man kisi ogri-ati sma nanga den wan di abi triki, neleki fa a ben du dati nanga Haman.​—Psalm 7:11-16.

A opo taki gi Yehovah èn gi a pipel fu en, sondro fu prakseri ensrefi nomo

Te fu kaba, a kownu kon sabi suma na Mordekai. Boiti taki a bun man disi ben kibri en gi den wan di ben wani kiri en, a ben de sosrefi a kwekipapa fu Ester. Ahasferos gi Mordekai a posisi di Haman ben abi leki fosi minister. A gi Ester na oso fu Haman èn sosrefi den bigi gudu di a ben abi, èn Ester gi Mordekai a frantwortu fu luku den sani dati.​—Ester 8:1, 2.

Now di ogri no ben kan miti Ester nanga Mordekai moro, dan yu denki taki Ester no ben abi fu broko en ede moro nanga nowan sani? Efu a ben o du dati, dan a ben o denki ensrefi nomo, ma dati no ben de so. Na a srefi ten, a wèt di Haman ben meki fu kiri ala den Dyu, ben e doro na ala sei fu a kownukondre. Haman ben iti lòt, noso Pur, soleki fa sma ben kari en na ini den tongo di Bijbel ben skrifi na ini fosi. Soleki fa a sori, a sani disi ben abi fu du nanga afkodrei, èn Haman ben du dati fu kon sabi san na a yoisti ten fu du na ogri-ati sani di a ben wani du nanga den Dyu (Ester 9:24-26). Aladi wan tu mun ben musu pasa ete fosi a dei dati doro, toku a dei dati ben e doro heri esi. Wan fasi ben de fu tapu pasi gi a bigi rampu disi?

Agen Ester no prakseri ensrefi nomo, èn a kon baka na fesi a kownu sondro taki a ben kisi wan kari. Disi leisi, a krei gi en pipel èn a begi en masra fu tapu pasi gi sma fu no du a bigi ogri di a wèt ben e taigi den fu du. Ma te wan wèt ben meki na ini a nen fu a kownu fu Persia, dan a wèt dati ben e tan (Danièl 6:12, 15). A kownu seni boskopuman fu go fruteri sma taki wan nyun wèt ben meki di ben e gi den Dyu a reti fu feti gi densrefi. Den boskopuman rèi esi-esi na tapu asi go na ala sei fu a kownukondre, fu fruteri den Dyu a bun nyunsu disi. A sani disi meki taki furu sma kisi howpu baka (Ester 8:3-16). Kande wi e si kaba fa den Dyu na ini den difrenti kontren fu a bigi kownukondre ben e teki fetisani fu sreka densrefi gi a feti. Efu a nyun wèt no ben meki, dan noiti den ben o man du a sani dati. Ma yu denki taki „Yehovah di e tiri den legre” ben o de nanga a pipel fu en?​—1 Samuel 17:45.

Di a dei fu a feti doro te fu kaba, dan a pipel fu Gado ben de srekasreka. Srefi furu fu den heihei man fu Persia ben e horibaka gi den now, fu di a nyunsu ben doro na ala sei fu a kownukondre taki a Dyu, Mordekai, ben de a nyun fosi minister. Yehovah meki a pipel fu en wini a strei dorodoro. A no de fu taki dati a meki den kiri ala den feanti fu den, so taki den no ben o man du ogri moro nanga a pipel fu en.b​—Ester 9:1-6.

Boiti dati, Mordekai noiti no ben o man teki fesi na ini na oso fu Haman efu den tin manpikin fu na ogri-ati man dati ben de na libi ete. Den Dyu kiri den man dati tu (Ester 9:7-10). Na so wan Bijbel profeititori kon tru, fu di Gado ben taki na fesi taki ala den Amalèksma ben o kisi pori, fu di den ben de ogri-ati feanti fu a pipel fu en (Deuteronomium 25:17-19). A kan taki den manpikin fu Haman ben de den lastiwan fu a pipel dati di ben kisi pori.

Leki yongu uma, Ester ben musu tyari hebi frantwortu. Iya, a ben musu yepi fu meki wèt di ben e gi pasi taki a pipel fu en feti nanga tra pipel èn taki sma kisi dedestrafu. A musu de so taki a sani dati no ben makriki gi Ester. Ma Yehovah ben wani taki a pipel fu en tan na libi. A Mesias di ben o kon ben musu gebore ete leki bakapikin fu den Israelsma, fu di na en ben de a wan-enkri howpu gi ala libisma! (Genesis 22:18) Na ini a ten disi, futuboi fu Gado breiti fu sabi taki di a Mesias, Yesus, ben kon na grontapu, dan a ben taigi den bakaman fu en kaba taki den no ben mag teki prati na feti.​—Mateyus 26:52.

Ma Kresten e feti nanga Satan, fu di nownowde a e angri srefisrefi fu pori a bribi di wi abi na ini Yehovah Gado (2 Korentesma 10:3, 4). A de wan blesi trutru fu abi so wan eksempre leki Ester! Meki wi sori taki wi abi bribi neleki en. Iya, te wi wani kisi sma so fara fu bribi san wi e taigi den, dan wi musu du sani na wan koni fasi, èn wi musu abi pasensi. Wi musu abi deki-ati tu èn wi musu de klariklari fu opo taki gi a pipel fu Gado, sondro taki wi e denki wisrefi nomo.

[Futuwortu]

[Faki na tapu bladzijde 28]

Aksi di abi fu du nanga Ester

Fu san ede Mordekai ben gi pasi taki Ester trow nanga wan sma di no ben e bribi na ini a tru Gado?

Wi no kan agri nanga son sabiman di e taki dati na fu di Mordekai ben e suku fu kisi biginen, meki a gi pasi taki Ester trow nanga a kownu. Fu di Mordekai ben de wan Dyu di ben e gi yesi na Gado, meki a no ben o feni en bun taki Ester trow nanga a kownu di no ben e bribi na ini Gado (Deuteronomium 7:3). Den owruten tori fu den Dyu e sori taki Mordekai pruberi fu suku wan fasi taki a trow dati no ben e go doro. Soleki fa a sori, dan en nanga Ester no ben man du noti na a situwâsi dati, fu di den ben de trakondre sma nomo na ini wan kondre pe a kownu ben de leki wan gado. Baka wan pisi ten, a kon na krin taki Yehovah gebroiki a trowlibi fu Ester fu kibri a pipel fu en.​—Ester 4:14.

Fu san ede a nen fu Gado, Yehovah, no skrifi na ini a buku Ester?

Soleki fa a sori, dan na Mordekai skrifi a buku Ester nanga yepi fu santa yeye. A kan taki na ini a bigin den Persiasma ben kibri a buku disi makandra nanga tra sani fu a historia, fosi den tyari en go baka na Yerusalem. A kan taki na fu di a nen fu Yehovah ben skrifi na ini a buku, meki den anbegiman fu den gado fu Persia pori a buku. Awansi fa a no fa, a de krin taki Yehovah ben abi wan anu na ini a tori fu Ester. A moi fu sabi taki na ini a Hebrew tekst fu Bijbel, a nen fu Gado skrifi na wan fasi di sma e kari akrostikon. Dati wani taki dati a fosi noso a lasti letter fu den wortu di ben skrifi ondro makandra ben seti na so wan fasi taki den ben e meki a nen fu Gado.

A buku Ester e taki sani soifri soleki fa den ben pasa?

Sma di e krutu Bijbel e taki dati a buku Ester no e taki sani soifri soleki fa den ben pasa. Ma son sabiman taki dati a skrifiman fu a buku sori taki a ben sabi furu sani fu a kownu famiri fu Persia, fu den sani di den ben bow drape, èn fu den gwenti fu den sma dati. A tru taki nowan fu den owruten dokumenti di de ete e taki fu Ester, ma Ester no ben de a wan-enkri sma fu a kownu-oso di owruten dokumenti no e taki fu en. Ma san moro prenspari, na taki owruten dokumenti e sori taki wan man di nen Mardukâ, a Persia nen gi Mordekai, ben e dini leki wan heihei man na ini a kownu-oso na ini Susan, na a ten di a tori na ini a buku ben pasa.

[Faki na tapu bladzijde 29]

Wan profeititori kon tru

Di Ester nanga Mordekai ben feti gi a pipel fu Gado, dan nanga dati den meki ete wan Bijbel profeititori kon tru. Moro leki 12 hondro yari na fesi, Yehovah ben meki a famiri-edeman Yakob taki a sani disi fu wan fu den manpikin fu en: „Benyamin o tan priti a nyanyan fu en na pisipisi neleki wan busidagu. Na mamanten a o nyan a meti di a kisi èn na neti a o prati a gudu di a feni” (Genesis 49:27). Na a bigin fu a historia fu den kownu fu Israel, wan tu fu den bakapikin fu Benyamin ben de Kownu Saul nanga tra makti fetiman fu a pipel fu Yehovah. Na a kabapisi fu a historia dati, baka di a kownu famiri fu Israel ben e kon na wan kaba, Ester nanga Mordekai, ben e feti nanga den feanti fu Yehovah. Den tu sma disi di ala tu ben de fu a lo fu Benyamin, ben abi bun bakapisi na ini a feti dati. Te yu luku en bun, dan den ben prati gudu tu, fu di den kisi a bigi gudu fu Haman.

[Prenki na tapu bladzijde 25]

Nanga sakafasi Ester taigi a kownu tangi taki a ben sori sari-ati gi en

[Prenki na tapu bladzijde 26, 27]

Ester no ben frede fu tyari na ogri-ati fasi fu Haman kon na krin

[Prenki na tapu bladzijde 28, 29]

Ester nanga Mordekai seni boskopu gi den Dyu na ini a Gran Kownukondre Persia