Iya, disi na a Studie-Waktitoren! — Waktitoren LIBRARY TAPU INTERNET

Iya, disi na a Studie-Waktitoren!

Wi tyari wan tu kenki kon na a Studie-Waktitoren fu meki en kon moro moi èn fu yepi yu fu studeri a Wortu fu Yehovah moro bun.—Ps. 1:2; 119:97.

Fo yari pasa di wi bigin meki tu Waktitoren, wan gi a preikiwroko èn wan gi ala Yehovah Kotoigi nanga den Bijbelstudie fu den di e kon na den konmakandra doronomo.

Wan brada di de wan futuboi fu Yehovah bun langa kaba, taki fu a Studie-Waktitoren: „A fosi leisi di mi leisi a Studie-Waktitoren, a ben moi srefisrefi gi mi èn a naki mi ati trutru. A fasi fa den dipi tori fu Bijbel e kon na krin na ini a Studie-Waktitoren e doro mi ati srefisrefi. Mi de nanga bigi tangi gi a nyun tijdschrift disi.” Wan tra brada skrifi: „Mi lobi fu teki ten fu studeri a Studie-Waktitoren makandra nanga mi Bijbel.” Wi de seiker taki yu e firi a srefi fasi.

Soleki fa yu sabi, dan A Waktitoren kon na doro sensi 1879. Yehovah gi wi en yeye èn a blesi wi, so taki wi man tyari en kon na doro te now ete (Sak. 4:6). Na ini den 133 yari di pasa, a kafti fu a tijdschrift disi kenki wan tu leisi. Bigin nanga 2012, yu o si taki na tapu ibri Studie-Waktitoren den teken wan moi prenki fu Kotoigi di e preiki. Disi na fu memre wi na a wroko di Gado gi wi fu preiki finifini fu a Kownukondre fu Yehovah (Tori 28:23). Na a tra sei fu a kafti, na tapu bladzijde 2 yu o si a fowtow fu a prenki di teken na tapu a kafti èn wan syatu pisi tori di e fruteri yu san e pasa na tapu a prenki èn na sortu presi den sma de. A heri yari disi, a fowtow dati o memre wi alamala taki a pipel fu Yehovah e preiki a bun nyunsu „na heri grontapu”.—Mat. 24:14.

Sortu tra kenki de na ini a Studie-Waktitoren? Wi poti a faki fu luku baka san wi leri, na a bigin fu a studie-artikel. Na so yu man si wantewante san na den prenspari sani fu na artikel di yu musu hori na prakseri te yu e leisi èn studeri en. A no de fu taki dati den brada di e hori a Waktitoren-studie musu luku den aksi disi baka na a kaba fu a studie. Yu o si tu taki na seisei fu den bladzijde moro presi de fu skrifi sani èn taki den nomru fu den bladzijde nanga den paragraaf de moro krin fu si.

Wan tra nyun sani na ini a tijdschrift disi na a artikel „A historia fu wi”. A o taki fu prenspari sani di pasa na ini a historia fu Yehovah Kotoigi. Ten na ten yu o abi ondrofenitori fu sma tu na ini den artikel di nen „Den ben de klariklari fu go”. Na wan moi fasi den artikel disi o fruteri fu a prisiri nanga den bun sani di brada nanga sisa ondrofeni fu di den go yepi na presi pe moro Kownukondre preikiman ben de fanowdu.

Meki a de so, taki yu kisi moro prisiri fu studeri Gado Wortu nanga yepi fu a tijdschrift disi.

Den sma di tyari a tijdschrift disi kon na doro