Fu san ede Gado abi wan organisâsi?

Na artikel disi e poti prakseri na sani di yu ben kan aksi yusrefi èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. Fu san ede Gado ben orga den Israelsma leki pipel?

Gado ben teki den bakapikin fu a famiri edeman Abraham leki a pipel fu en èn a gi den wèt. A kari a pipel dati Israel, èn a gi den a frantwortu fu kibri a tru anbegi nanga a Wortu fu en (Psalm 147:19, 20). A sani dati tyari wini kon gi ala pipel na grontapu.​—Leisi Genesis 22:18.

Gado ben teki den Israelsma fu de en kotoigi. Te den ben e gi yesi na Gado, dan den ben e kisi wini fu den wèt fu en (Deuteronomium 4:6). Te wi e ondrosuku a historia fu den Israelsma, dan wi kan kon sabi moro fu a tru Gado.​—Leisi Yesaya 43:10, 12.

2. Fu san ede tru Kresten e wroko makandra leki wán grupu?

Bakaten, Gado no ben feni Israel bun moro, èn na presi fu den, a teki a Kresten gemeente leki a pipel fu en (Mateyus 21:43; 23:37, 38). Fosi, den Israelsma ben de kotoigi fu Gado. Now, tru Kresten na den kotoigi fu Yehovah.​—Leisi Tori fu den apostel 15:14, 17.

Yesus ben leri den bakaman fu en fu wroko leki wan grupu fu preiki fu Yehovah èn fu meki sma fu ala kondre tron disipel (Mateyus 10:7, 11; 24:14; 28:19, 20). A wroko disi e doro en heimarki. Fu a fosi leisi, Yehovah tyari milyunmilyun sma fu ala kondre kon na wán na ini a tru anbegi (Openbaring 7:9, 10). Tru Kresten e wroko makandra tu fu man gi makandra deki-ati èn fu yepi makandra. Na heri grontapu den e kisi a srefi Bijbel leri na den konmakandra fu den.​—Leisi Hebrewsma 10:24, 25.

3. Fa a disiten organisâsi fu Yehovah Kotoigi bigin?

A disiten organisâsi fu Yehovah Kotoigi bigin na ini den yari baka 1870. Wan pikin grupu Bijbel ondrosukuman ben e kon leri sabi den tru tori fu Bijbel baka di sma ben frigiti langa ten kaba. Den ben sabi taki Yesus ben orga a Kresten gemeente fu du a preikiwroko. Sobun, den bigin preiki a bun nyunsu fu a Kownukondre na heri grontapu. Na ini 1931, den teki a nen Yehovah Kotoigi.​—Leisi Tori fu den apostel 1:8; 2:1, 4; 5:42.

4. Fa Yehovah Kotoigi orga na ini a ten disi?

Na ini a fosi yarihondro, den Kresten gemeente na ini furu kondre kisi wini fu a grupu fu apostel nanga owruman di ben e teki fesi èn di ben e si Yesus leki Ede fu a gemeente (Tori fu den apostel 16:4, 5). Na so a de tu na ini a ten disi taki Yehovah Kotoigi e si Yesus leki a Fesiman fu den (Mateyus 23:9, 10). Boiti dati, wan Tiri Skin, noso wan grupu lepi owruman, e tiri den moro leki 100.000 gemeente. Den gemeente disi e kisi wini fu a rai nanga a leri di den e kisi fu den owruman dati. Na ini ibri gemeente, lepi brada e dini leki owruman noso opziener. Den man disi e sorgu na wan lobi-ati fasi gi den skapu fu Gado.​—Leisi 1 Petrus 5:2, 3.

Yehovah Kotoigi orga fu preiki a bun nyunsu èn fu meki disipel. Fu man yepi sma na ala presi, den e vertaal, den e meki, èn den e prati buku nanga tra sani di e gi sma leri fu Bijbel na ini moro leki 500 tongo. Neleki den apostel, den e preiki oso fu oso (Tori fu den apostel 20:20). Den de klariklari fu studeri Bijbel nanga reti-ati sma di lobi den tru tori fu Bijbel. Fu di a pipel fu Yehovah e suku fu plisi Gado èn fu yepi trawan, meki den de wan organisâsi fu sma di de koloku.​—Leisi Psalm 33:12; Tori fu den apostel 20:35.

Efu yu wani sabi moro, dan luku kapitel 19 fu a buku disi, San Bijbel e leri wi trutru?, di Yehovah Kotoigi tyari kon na doro.