A di fu 131 klas fu a gileadskoro

„Meki Yehovah prisiri nanga yu”

TAPU 10 september 2011, den studenti fu a di fu 131 klas fu a Waktitoren Bijbelskoro Gilead, klari a skoro fu den. Den sma di ben de na a okasi disi ben de famiriman, mati, nanga tra sma di ben breiti fu de drape. Na a bigin fu a dei, senwe ben e naki den takiman nanga den studenti. Ma na a kaba fu a programa, ala den 9063 sma di ben de drape ben e firi switi èn den ben e lafu fu di den ben nyan bun fu den lezing, den demonstrâsi, nanga den interview.

Stephen Lett, di de wan memre fu a Tiri Skin fu Yehovah Kotoigi èn di ben de a fesiman fu a programa, ben hori a fosi lezing. A taki finifini fu Bijbeltekst di e meki a gersi leki Yehovah Gado abi wan trutru skin. A poti prakseri na den tekst di e taki fu a fasi fa Yehovah e gebroiki en ai, en yesi, nanga en anu.

A takiman bigin nanga 2 Kroniki 16:9, pe skrifi taki „den ai fu Yehovah e luku heri grontapu fu si san e pasa, so taki a kan sori a krakti fu en fu yepi den wan di e dini en nanga den heri ati”. Den studenti ben kisi a deki-ati fu tan dini Yehovah nanga den heri ati. A takiman taigi den fu suku a bun na ini sma, neleki fa Gado e du dati. Baka dati Brada Lett taki fu 1 Petrus 3:12, pe skrifi taki na wan agersi fasi den yesi fu Yehovah e arki den begi fu den reti-ati sma. A gi den studenti deki-ati fu tan begi Yehovah èn fu no frigiti taki a wani arki den begi fu den trutru.

A takiman ben taki finifini tu fu Yesaya 41:13, pe Yehovah e pramisi: „Mi, Yehovah, na yu Gado di e grabu yu reti-anu hori. Mi na a sma di e taigi yu: ’No frede. Misrefi o yepi yu.’” Na wan switi fasi Brada Lett taigi den: „Luku a tumusi moi sani di Yehovah e du dyaso. A e langa en anu fu grabu a di fu wi hori.” Baka dati, a brada disi taigi den studenti fu gi pasi ala ten taki Yehovah yepi den èn fu no weigri a yepi fu en noiti. A taki sosrefi dati neleki Yehovah, den studenti kan langa den anu tu fu yepi trawan.

Te fu kaba, Brada Lett leisi Yesaya 40:11. A aksi den arkiman fu pruberi fu si na den fesi fa Gado e sori lobi, soleki fa a tekst dati e tyari kon na krin. Brada Lett taki: „Nanga en anu Yehovah e tyari wi kon na wán. A e hori wi na en borsusei te a e tyari wi.” Sobun, san wi musu du? Den studenti kisi a rai fu tan tyari densrefi leki pikin skapu di abi safri-ati nanga sakafasi. Na so Yehovah o wani hori den na en borsusei te a e tyari den.

„Wi abi a gudu disi na ini prapi fu klèidoti”

David Splane fu a Tiri Skin ben taki finifini fu a Bijbel tori disi (2 Korentesma 4:7). San na a gudu dati? A gudu disi na sabi noso koni? A takiman piki: „Nôno. A gudu di na apostel Paulus ben e taki fu en na ’a wroko di wi e du fu sori sma san tru’” (2 Korentesma 4:1, 2, 5). Brada Splane memre den studenti taki den feifi mun di den kisi leri, ben de fu sreka den fu du wan prenspari wroko. A wroko disi na wan wroko di den musu si leki wan bigi grani.

A takiman ben taki dati a „prapi fu klèidoti” di kari na ini a tekst dyaso, abi fu du nanga wi leki libisma. A sori fa wan prapi di meki fu klèidoti e difrenti fu wan prapi di meki fu gowtu. Sma no e gebroiki prapi fu gowtu makriki. Ma prapi fu klèidoti na fu wroko nanga den. Te wi ben o poti wan gudu na ini wan gowtu prapi, dan wi ben kan poti leti so furu prakseri na a prapi leki na a gudu di de na ini. „Unu leki studenti no musu poti tumusi furu prakseri na unsrefi”, na so Brada Splane ben taki. „Leki zendeling un musu meki sma poti prakseri na Yehovah. Unu na prapi fu klèidoti di no e hari sma prakseri tumusi.”

A takiman go doro nanga na agersitori disi èn a taki dati na ini Bijbel ten, son prapi fu klèidoti ben e tan bun awansi sma ben e poti den na ini faya. Sonwan fu den prapi ben e brenki fu di sma ben e ferfi den nanga spesrutu sani di ben e kon tranga te den ben e baka den. Na so den no ben e kisi tyepi makriki. Fa den zendeling kan de leki den prapi disi? A no de fu taki dati na ini den fosi mun te den e dini leki zendeling, den o kisi fu du nanga wan tu muilek situwâsi èn den sani dati o leri den fu horidoro. Den no o broko den ede so furu moro te sma e krutu den, èn den sani dati no o hati den firi so esi moro. „Unu o si taki unu o man frudrage moro sani leki san unu ben denki”, na so Brada Splane ben taki. Yehovah no gi engel a diniwroko disi di de leki wan gudu, ma a gi en na wi di de leki prapi fu klèidoti. „Dati e sori taki Yehovah e frutrow unu”, na so Brada Splane ben taki na a kaba fu a takimakandra fu en.

„Yu strei lon nanga libisma, . . . yu o man strei lon nanga asi?”

„O langa èn o tranga yu man lon?”, na so Brada Samuel Herd fu a Tiri Skin ben aksi. Fu san ede a ben aksi den studenti a sani dati? A takiman ben teki den sani di den studenti ben ondrofeni gersi nanga den sani di a profeiti Yeremia ben ondrofeni. A no ben makriki gi a reti-ati man dati, fu di tesi ben e miti en. Ma moro bigi tesi ben e wakti en. Fu dati ede Yehovah aksi en: „Di yu strei lon nanga libisma, yu kon weri. We dan fa yu o man strei lon nanga asi?”​—Yeremia 12:5.

Brada Herd ben gebroiki a tekst disi fu leri den studenti wan sani. A ben taki: „Te unu luku ala den eksamen di unu meki, dan kande unu sa feni taki unu lon nanga asi. Ma fu taki en leti, unu no ben e strei lon nanga asi, ma nanga libisma. Te unu o go dini na ini a kondre pe un musu go, dan unu o strei lon nanga asi, iya, unu o kisi fu du nanga moro bigi tyalensi. San unu o du dan? A leri di unu kisi na Gilead sreka unu fu strei lon nanga asi èn fu no kon weri.” Brada Herd gi den studenti deki-ati fu tan tranga a bribi fu den, fu tan studeri Bijbel doronomo èn fu tan begi doronomo tu.

Brada Herd ben taki dati sonwan fu den nyun zendeling disi kan lasi-ati te fu kaba, noso kande den o miti sma di no o wani poti prakseri na a boskopu di den e preiki. Kande tra zendeling o kon siki noso kande den o feni taki den no bun nofo fu du a wroko disi. Ma a gi den studenti a dyaranti taki den abi wan sma di kan gi den krakti fu man pasa iniwan takru situwâsi èn fu no kon weri. „Awansi unu e strei lon nanga libisma noso nanga asi”, na so a brada ben taki, „toku un musu abi a frutrow taki a makti anu fu Yehovah kan grabu unu hori fu meki unu wini a strei. Dan unu o abi bun bakapisi leki zendeling èn dati o gi Yehovah grani nanga glori.”

Tra moi sani fu a programa

’No aksi fu wan tu nomo.’ John Ekrann, wan memre fu a Bijkantoro Komte fu Amerkankondre, ben taki fu a tori fu a profeiti Elisa nanga na uma di ben lasi en masra na ini dede. Sma ben de fu seri den manpikin fu na uma disi leki srafu (2 Kownu 4:1-7). Na uma disi ben abi soso wan pikin oli batra. Elisa ben taigi en fu go teki tra batra na den birtisma fu en. A ben taki: „No aksi wan tu batra nomo.” Nanga yepi fu Elisa, Yehovah du wan wondru, èn a lai oli na ini den batra di na uma disi ben go teki. Baka dati, na uma seri na oli èn a kisi nofo moni fu pai den paiman fu en èn fu sorgu na osofamiri fu en wan heri pisi ten.

San den nyun zendeling ben kan leri fu a tori disi? Soleki fa a sori, dan di na uma go teki den tra batra, a no luku fa den batra ben tan. „A no de fu taki dati a ben teki iniwan batra di a ben kan gebroiki fu poti oli na ini”, na so a brada ben taki, „èn a kan taki o moro a batra ben bigi, o moro a ben bun.” Baka dati, Brada Ekrann gi den studenti deki-ati fu teki iniwan wroko di den e kisi, awansi a bigi noso pikin. A ben taki: „No luku fosi san na a wroko, fosi yu du en.” A memre den studenti taki na a fasi fa na uma ben du san Elisa ben taigi en, na dati ben o meki a kisi pikinso noso furu blesi. San den studenti ben kan leri fu a tori disi? O moro wi de fayafaya na ini a diniwroko èn e sori bribi, o moro wi o kisi blesi. „Un no musu de sma di e kibri skin”, na so a brada ben taki.

„Wi o nyan den lalalala.” William Samuelson, wan opziener fu a Kantoro gi Bijbelskoro, ben taki fu a tori disi di abi fu du nanga Numeri 14:9. A ben poti prakseri na a bun eksempre fu Yosua nanga Kaleb. Na ini a tekst disi, den wortu „nyan den lalalala” e sori taki den ben o man wini den sma fu Kanan makriki èn taki a sani dati ben o de wan yepi gi den neleki te den ben o nyan den bere span fu kisi krakti baka. San den studenti ben kan leri fu a tori disi? A brada ben taki: „Na ini a diniwroko di unu o go du, un musu si tyalensi leki sani di kan tyari wini gi unu èn di kan tranga a bribi fu unu.”

„A bribi fu den o de leki wan sipi di ankra steifi te bigi winti o wai?” Sam Roberson, wan fu den leriman, ben taki fu a warskow di na apostel Paulus ben gi taki ’a bribi fu son sma kon lasi, neleki wan sipi di sungu’ (1 Timoteyus 1:19). A ben gi den studenti deki-ati fu yepi trawan fu kon abi wan bribi di ankra steifi na ini Yehovah Gado. A ben taki: „Yu kan agersi a wroko fu yu nanga a di fu wan smeti.” Fa so? Wan smeti e fasi den pisi fu wan keti na makandra, so taki a keti kan ankra wan sipi steifi. Na so a de tu taki zendeling e yepi Bijbel studenti fu kon abi den fasi di Yehovah lobi èn di o yepi den fu kisi frulusu.

A takiman ben teki den pisi fu wan keti gersi nanga den fasi di skrifi na 2 Petrus 1:5-8. Brada Roberson ben taki dati efu zendeling e yepi den Bijbel studenti fu den fu kon si fa Yehovah e sori den fasi dati, dan dati o yepi den studenti dati fu tai hori steifi na Yehovah. Den o tan abi wan tranga bribi awansi den e kisi fu du nanga bigi problema di gersi bigi winti.

Ondrofenitori nanga interview

Michael Burnett, wan tra leriman, ben aksi den Gilead studenti fu fruteri èn fu demo wan tu fu den sani di den ben ondrofeni na ini a preikiwroko, a pisi ten di den ben de drape. Den sma di ben de drape ben breiti fu yere fa den studenti ben man preiki gi sma na ini bigi wenkri, na opolani presi, na ini na oso-fu-oso preikiwroko, èn srefi nanga yepi fu telefon, di den ben e taki nanga wan sma di no ben bèl a yoisti nomru.

Michael Hansen fu a Betelfamiri fu Amerkankondre ben interview dri brada di dini leki zendeling furu yari langa. Den brada dati na Stephen McDowell di dini na ini Panama, Mark Noumair di dini na ini Kenia, nanga William Yasovsky di dini na ini Paragwei. Den sani di den fruteri ben fiti a lezing di ben nen „Du a wani fu Yehovah nanga prisiri” (Psalm 40:8). Fu eksempre, Mark Noumair ben taki fu wan tu fu den sani di ben gi en nanga en wefi furu prisiri di den ben e dini leki zendeling. A ben gi den furu prisiri taki den ben tron mati fu den Kotoigi drape. Tra sani di ben gi den prisiri, na te den ben e si fa den brada drape ben e gi yesi na den rai di den ben e kisi, fa den ben e tyari bigi kenki kon na ini den libi, èn fa Yehovah blesi a muiti di den ben e du. A brada disi gi den studenti a dyaranti taki moro bigi prisiri ben e wakti den.

Baka di wan studenti fu a di fu 131 klas leisi wan moi brifi fu sori fa den ben de nanga tangi, dan Brada Lett tapu a programa. A gi den nyun zendeling a rai fu waka nanga koni. A taigi den taki te den ben o du dati, dan ’Yehovah ben o prisiri nanga den’. A no de fu taki dati Yehovah o prisiri nanga den zendeling disi te den tan dini en nanga den heri ati.​—Yesaya 65:19.

[Schema na tapu bladzijde 31]

WAN TU SANI FU A KLAS

A nomru fu den kondre pe den studenti komoto: 10

Gemiddeld yari di den abi: 34,7

Gemiddeld yari di den dopu: 19,0

Gemiddeld yari di den de na ini a furuten diniwroko: 13,5

[Schema]

(Efu yu wani si pe den sani disi skrifi, luku a tijdschrift)

Kondre pe den zendeling o go dini

Den kondre pe den studenti o go

BENIN

BRASYONKONDRE

BULGARIA

BURUNDI

KAMERUN

KANADA

REPUBLIEK FU CENTRAAL-AFRIKA

DOISRIKONDRE

GANA

HONG KONG

INDONESIA

KENIA

LIBERIA

LITONIA

MALÈISIA

MOSAMBIK

NEPAL

PANAMA

PARAGWEI

SIÈRA LEON

SLOWÂKIA

ZUID-AFRIKA

AMERKANKONDRE

VENEZUELA

[Prenki na tapu bladzijde 30]

Den Gilead studenti e demo wan fu den sani di den ben ondrofeni na ini a preikiwroko

[Prenki na tapu bladzijde 31]

A di fu 131 klas fu a Waktitoren Bijbelskoro Gilead

Den nen di de fu si na ondrosei, poti na ini rèi di nomru fu fesisei go na bakasei, èn na ini ibri rèi den nen poti fu a kruktu-anusei go na a reti-anusei.

(1) C. Lesch; N Lesch; P Shakarjian; T. Shakarjian; R. Budden; K. Budden; T. Nash; L. Nash.

(2) E. Tremblay; C. Tremblay; D. Garvey; G. Garvey; R. Gaunt; P. Gaunt; J. Lau; J. Lau.

(3) S. Davis; S. Davis; J. Sargeant; J. Sargeant; C. Fonseca; S. Fonseca; E. Thenard; A. Thenard.

(4) A. Petratyotin; R. Petratyotin; N. Reyes; N. Reyes; B. Eisiminger; S. Eisiminger; J. Hacker; C. Hacker.

(5) E. Hartman; T. Hartman; W. Goolia; K. Goolia; J. Thomas; E. Thomas; N. Okazaki; M. Okazaki.

(6) C. Mills; A. Mills; L. Benning; T. Benning; S. Sobiecki; T. Sobiecki; L. Gagnon; E. Gagnon.

(7) B. Hansen; M. Hansen; A. Fahie; M. Fahie; J. Dalgaard; J. Dalgaard; M. Andersson; R. Andersson.