Fu san ede sma e tan du kruktudu?

DEN wortu disi e sori krin san tiriman du na ini a heri historia. Den meki taki trawan pina srefisrefi èn taki sari sani miti den. Na ini den dusundusun yari di pasa, yu ben abi bun-ati sma di pruberi fu seti wan libimakandra pe sma no e du kruktudu. Ma doronomo gridi sma nanga kruka sma gens den. Fu san ede? San e meki taki sma e tan du kruktudu? We, den dri sani di e kon now o sori wi fu san ede.

1. A krakti di sondu abi na tapu libisma.

Bijbel e taki krin dati wi alamala „abi sondu” (Romesma 3:9). Neleki fa wan heri famiri kan abi wan siki di datra no man dresi, na so sondu de tu. A „de na ini” wi, noso a e tan na ini wi. Dusundusun yari sondu „tiri” libisma leki wan kownu. Doronomo a „wèt” fu sondu abi krakti na wi tapu. A meki taki furu sma poti den eigi afersi na a fosi presi noso taki den gebroiki ala den ten fu kon gudu èn fu kisi makti, awinsi den ben musu pina trawan.​—Romesma 5:21; 7:17, 20, 23, 25.

2. A krakti di na ogri grontapu disi abi na tapu sma.

Furu sma na grontapu abi bigi-ai èn den e denki densrefi nomo. Na ini so wan grontapu son sma e feni en muilek fu de tra fasi leki sma na den lontu. Fu di den e suku biginen, meki den de nomonomo fu kisi makti. Den gridi tu fu kisi moro moni nanga gudu leki san den abi fanowdu trutru. A sari fu si taki den no abi trobi fu bedrigi sma soso fu man kisi den sani disi. Na presi fu kakafutu gi sma di kan meki den du ogri, den e „waka baka den ipi-ipi sma di e suku fu du ogri”.​—Eksodes 23:2.

3. A krakti di Satan Didibri abi na tapu sma.

Satan, wan yeye di opo ensrefi teige Gado, e „kori sma na heri grontapu” (Openbaring 12:9). A lobi fu meki sma du san en wani. Iniwan sma e angri fu abi wan switi libi èn nofo moni. Ma na wan triki fasi Satan kan kori wan sma fu bedrigi trawan fu man kisi den sani disi.

Ma disi wani taki dati wi de leki wan popki di Satan e hori na ini en anu èn taki a kan du nanga wi san a wani? Na ini a tra artikel wi o kisi a piki.