Yesus​—A ben abi wan trutru koloku libi

YESUS ben abi wan trutru koloku libi? Soleki fa a sori, a ben kweki na ini wan pôti famiri èn a no ben abi furu gudu. Fu taki en leti, a no ben abi „nowan presi fu sribi” (Lukas 9:57, 58). Boiti dati, den feanti fu en ben e teige en, den ben e taigi en hati sani, èn te fu kaba den kiri en.

Kande yu e taki: ’Mi no feni taki dati na wan trutru koloku libi!’ Ma moro sani de ete di wi musu sabi fu a libi fu Yesus. Wi o poti prakseri na fo sani.

1. YESUS BEN E DU A WANI FU GADO.

„Mi nyanyan na fu du a wani fu a sma di seni mi kon èn fu klari a wroko fu en.”​—Yohanes 4:34.

Den sani di Yesus taki èn den sani di a du ben e sori taki a ben e du a wani fu en hemel Tata, Yehovah.a Yesus ben e prisiri fu du a wani fu Gado. Fu taki en leti a ben agersi dati nanga nyanyan, soleki fa skrifi na ini a tekst di wi kari didyonsro. Luku san ben de a situwâsi di Yesus taki a sani dati.

Di Yesus taki a sani dati, a ben de bakadina (Yohanes 4:6). A ben teki waka heri mamanten na ini a bergikontren fu Samaria, sobun angri ben musu fu kiri en. Fu taki en leti, den disipel fu en ben taigi en: „Leriman, kon nyan wan sani” (Yohanes 4:31). A sani di Yesus piki den ben sori taki a wroko fu Gado ben e gi en krakti trutru. Disi e sori taki a ben abi wan trutru koloku libi, a no so?

2. YESUS BEN ABI TRANGA LOBI GI EN TATA.

„Mi lobi a Tata.”​—Yohanes 14:31.

Yesus ben abi wan bun matifasi nanga en Tata na hemel. A tranga lobi di Yesus ben abi gi Gado, meki taki a ben angri fu fruteri trawan fu en Tata, fu a nen fu en, fu den sani di a o du, èn fu den fasi fu en. Den sani di Yesus taki, den sani di a du, nanga den fasi fu en, ben e sori krin taki a ben de leki en Tata. Sobun, di Filipus aksi Yesus: „Sori wi a Tata”, dan Yesus piki en: „A sma di si mi, si a Tata tu.”​—Yohanes 14:8, 9.

Yesus ben lobi en Tata so te taki a ben de klariklari fu gi yesi na en, te na dede (Filipisma 2:7, 8; 1 Yohanes 5:3). Fu di Yesus ben abi so wan tranga lobi gi Gado, meki a ben abi wan trutru koloku libi.

3. YESUS BEN LOBI SMA.

„A moro bigi lobi di wan sma kan sori, na fu gi en libi gi den mati fu en.”​—Yohanes 15:13.

A no de fu taki dati nowan howpu no de gi wi leki sondu libisma. Bijbel e taki: „Wán man [Adam] meki sondu kon na grontapu èn sondu tyari dede kon. Dati meki ala sma e dede, bika den alamala sondu” (Romesma 5:12). Wi no man frulusu wisrefi fu a bakapisi fu sondu, dati na dede.​—Romesma 6:23.

Wi de nanga tangi dati Yehovah sori lobi gi wi èn taki a kon nanga wan lusu gi a problema fu libisma. A gi pasi taki a Manpikin fu en di no abi sondu èn di wi sabi leki Yesus, pina èn dede leki wan lusu-paiman fu puru libisma na ini katibo fu sondu nanga dede. Fu di Yesus abi lobi gi en Tata èn gi libisma, meki a gi yesi èn a gi a libi fu en, fu a bun fu wi (Romesma 5:6-8). Na fu di a ben abi a lobi disi, meki a ben abi wan koloku libi.b

4. YESUS BEN SABI TAKI EN PAPA LOBI EN ÈN TAKI A FENI EN BUN.

„Disi na mi Manpikin, a lobiwan di mi feni bun.”​—Mateyus 3:17.

Yehovah ben taki a sani disi komoto fu hemel na a ten di Yesus teki dopu. Na so Yehovah sori krin taki a lobi en Manpikin Yesus, èn taki a feni en bun. Dati meki a no e fruwondru wi taki Yesus ben kan taki krin: „A Tata lobi mi”! (Yohanes 10:17) Fu di Yesus ben sabi taki en Tata lobi en èn taki a feni en bun, meki a no ben frede di sma ben e gens èn krutu en. Srefi di sma ben wani kiri en, a no lasi ensrefi èn a no bruya (Yohanes 10:18). Iya, na fu di Yesus ben sabi taki en Papa lobi en èn taki a feni en bun, meki a ben abi wan trutru koloku libi.

Yesus ben de koloku trutru. A de krin taki a e leri wi fa wi kan libi na wan fasi di sa meki wi de koloku trutru. Na ini a tra artikel wi o luku wan tu fu den krinkrin rai di Yesus gi den bakaman fu en.