Wan kerki de di wi kan frutrow?

A kan taki yu no e go na kerki moro fu di yu kon si taki den no e du sani soleki fa Gado wani. Kande disi meki taki yu no e frutrow nowan kerki moro. Ma yu no musu lasi-ati. Wan kerki de di yu kan frutrow. Di Yesus ben de na grontapu a ben abi wan grupu bakaman di ben e du san Gado wani. Trutru bakaman fu Krestes na reti-ati sma di e du ala muiti fu libi soleki fa Krestes ben leri. Te now ete den sma disi de. Pe yu kan feni den?

Estelle di wi ben kari na ini wan fu den artikel fosi a wan disi, taki: „Na di Yehovah Kotoigi bigin studeri nanga mi, dan fosi mi bigin leri sani fu Bijbel. A no teki langa fosi mi kon frustan san Yohanes 8:32 wani taki. Drape skrifi: ’Unu o sabi san tru èn dati o meki unu kon fri.’”

Ray di wi ben taki fu en tu, taki: „Fu di Yehovah Kotoigi studeri Bijbel nanga mi, meki mi kon si taki a no Gado e meki taki libisma e pina. Aladi Gado e gi pasi taki ogri e pasa ete, toku mi ben breiti fu si taki a pramisi fu puru ogri heri esi.”

Na ini a grontapu disi furu sma no e broko den ede nanga a fasi fa den e tyari densrefi. Dati meki a no makriki fu tyari wisrefi na wan fasi di fiti. Ma toku wi man du dati. Furu sma wani taki wan sma yepi den fu frustan Bijbel èn den wani sabi fa den kan libi soleki fa Bijbel e taki. Dati meki Yehovah Kotoigi e studeri Bijbel nanga sma na heri grontapu sondro taki den sma abi fu pai den. Ibri wiki milyunmilyun sma e kon sabi san Bijbel e leri trutru. Na so den e tron mati fu Gado èn den e kisi wan moro koloku libi.a

Tra leisi te yu miti Yehovah Kotoigi, yu kan aksi den fu san ede den de na ini a bribi dati. Ondrosuku san den e leri sma èn fa den e tyari densrefi. Dan yu kan luku gi yusrefi efu trutru wan kerki de di yu kan frutrow.