Fu san ede a prenspari fu ondrosuku sortu kerki bun?

Kon meki wi taki dati yu musu du wan oparâsi fu di yu abi wan siki di kan kiri yu. A no de fu taki dati yu o suku wan datra di sabi du en wroko bun, bika yu libi o de na ini en anu. Sobun, yu o ondrosuku sortu datra abi ondrofeni, a no so?

Na so a de tu nanga kerki. Kerki musu leri sma fa fu anbegi Gado na wan fasi di a feni bun. A fasi fa yu e anbegi Gado kan meki taki yu kisi frulusu noso pori. Sobun, efu yu de na ini wan kerki, dan yu kan taki dati yu libi de na ini den anu tu. Dati meki a de wan koni sani fu ondrosuku sortu kerki bun.

Yesus ben sori fa wi kan sabi sortu kerki bun. A taki: „Sma kan kon sabi wan bon na den froktu fu en” (Lukas 6:44). Te yu e luku den kerki noso kerkigrupu, dan sortu „froktu” den e gi? Den kerki fesiman lobi moni? Fa den sma fu a kerki e si feti? Den e tyari densrefi soleki fa Bijbel e taki? Wan kerki de di wi kan frutrow? Meki wi luku den aksi disi na ini den artikel di e kon.