Yehovah Kotoigi e bribi na ini Yesus?

A PRENSPARI FU BRIBI NA INI YESUS

Anthony: Eei Timy. Mi breiti fu si yu baka.

Timy: Mi breiti fu si yu tu.

Anthony: Mi tyari den nyun Waktitoren nanga Ontwaakt! kon gi yu. Mi denki taki yu o lobi den artikel na ini den tijdschrift disi.

Timy: Thanks. A bun taki yu kon, mi wani aksi yu wan sani.

Anthony: Oke, san na en?

Timy: Wan fu den dei, mi ben e taki nanga wan sma na mi wrokope. Mi fruteri en fu den tijdschrift di yu gi mi èn fa den moi. Ma a taigi mi taki mi no musu leisi den fu di Yehovah Kotoigi no e bribi na ini Yesus. A tru? Mi taigi en taki mi ben o aksi yu te yu kon baka.

Anthony: We, mi breiti taki yu aksi mi. A bun taki yu e aksi wan Yehovah Kotoigi. Efu yu wani kon sabi san wan sma e bribi, dan a moro bun te yu aksi a sma srefi, a no so?

Timy: Dati mi feni tu.

Anthony: Mi kan taigi yu taki Yehovah Kotoigi e bribi na ini Yesus. Wi sabi taki wi musu bribi na ini Yesus fu man kisi frulusu.

Timy: Na dati mi ben denki tu, ma di a sma na wrokope taigi mi taki unu no e bribi na ini Yesus, dan mi ben wani sabi efu a tru. Mi no denki taki mi nanga yu ben taki fa a tori dati ete.

Anthony: Mi kan sori yu wan tu Bijbeltekst di e sori o prenspari a de fu bribi na ini Yesus? Yehovah Kotoigi gwenti gebroiki den tekst disi te den e preiki gi sma.

Timy: Oke.

Anthony: Wi o bigin fosi nanga a sani di Yesus srefi taki na Yohanes 14:6. A ben taki a sani dati di a ben e taki nanga wan fu den apostel fu en. „Yesus taigi en: ’Mi na a pasi, mi na san tru, èn mi na a libi. Nowan sma kan kon na a Tata sondro mi.’” Soleki fa a tekst disi e taki, dan san na a wan-enkri fasi fa wi kan kon na a Tata?

Timy: Nanga yepi fu Yesus.

Anthony: Dati tru. Èn na dati Yehovah Kotoigi e bribi tu. Taigi mi, te wan sma e begi, dan na ini suma nen a musu du dati?

Timy: Na ini a nen fu Yesus.

Anthony: A tru. Dati meki ibri leisi te mi e begi, mi e du dati na ini a nen fu Yesus. Na dati ala Yehovah Kotoigi e du tu.

Timy: Mi no ben sabi dati.

Anthony: Wan tra tekst di wi kan luku na Yohanes 3:16. A tekst disi prenspari trutru. Fu taki en leti, yu kan tyari ala den sani di skrifi fu Yesus en libi nanga a diniwroko fu en na grontapu, kon na wán na ini a tekst disi. Kande yu wani leisi en.

Timy: A bun. A e taki: „Bika Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”

Anthony: Thanks. Yu sabi a tekst disi?

Timy: Mi gwenti yere en na ini mi kerki.

Anthony: Furu sma sabi a tekst disi. Luku bun san Yesus taki. A taki dati fu di Gado lobi libisma, meki den kan kisi têgo libi. Ma san wi musu du fosi?

Timy: Wi musu sori bribi.

Anthony: Iya. Spesrutu na ini a wan-enkri Manpikin, Yesus Krestes. Èn na tapu bladzijde 2 fu a tijdschrift di mi tyari gi yu a skrifi taki te wi e sori bribi na ini Yesus, dan wi o man kisi têgo libi. Drape skrifi tu taki wan fu den marki fu A Waktitoren na fu „gi sma deki-ati fu bribi na ini Yesus Krestes di dede gi wi so taki wi kan kisi têgo libi. A e tiri now leki a Kownu fu Gado Kownukondre”.

Timy: Luku drape, a skrifi leti na ini yu eigi tijdschrift taki Yehovah Kotoigi e bribi na ini Yesus.

Anthony: We no.

Timy: Ma dan fu san ede sma e taki dati unu no e bribi na ini Yesus?

Anthony: Wan tu reide sa de fu san ede sma e taki dati. Son leisi, sma e taki dati fu di den yere tra sma e taki en. Noso kande den leri en na kerki.

Timy: We, mi denki taki den e taki a sani dati fu di unu e kari unsrefi Yehovah Kotoigi, unu no e kari unsrefi Yesus Kotoigi.

Anthony: Dati kan de wan reide tu.

Timy: Fu san ede unu e taki so furu fu Yehovah?

„MI MEKI DEN KON SABI YU NEN”

Anthony: Wan sani mi kan taigi yu, na taki wi e bribi taki a prenspari fu gebroiki a nen fu Gado, Yehovah, neleki fa en Manpikin, Yesus, ben du dati. Luku san Yesus ben taigi en Papa na ini begi. A skrifi na Yohanes 17:26. Yu wani leisi a tekst disi?

Timy: A bun. „Mi meki den kon sabi yu nen èn mi o tan fruteri den fu yu nen, so taki den kan abi a srefi lobi di yu abi gi mi èn mi kan de wán nanga den.”

Anthony: Thanks. Yesus taki dyaso taki a meki sma kon sabi a nen fu Gado. Fu san ede yu denki taki a du dati?

Timy: Hmm, mi no sabi.

Anthony: Kande wi kan luku wan tra tekst di o yepi wi. Mi e denki Tori fu den apostel 2:21. Drape skrifi: „Ibri sma di e kari a nen fu Yehovah o kisi frulusu.” Efu sma musu kari a nen fu Yehovah fu man kisi frulusu, dan seiker Yesus ben sabi dati, a no so?

Timy: Iya, na so a de.

Anthony: Sobun, wan reide fu san ede Yesus ben wani taki den bakaman fu en sabi a nen fu Gado èn gebroiki en, na fu di dati o meki den kisi frulusu. Dati na wan prenspari reide fu san ede wi e taki so furu fu Yehovah. Wi feni taki a prenspari fu meki sma kon sabi a nen fu Gado, èn taki den kari a nen dati tu.

Timy: Ma awansi sma no sabi Gado nen, noso awansi den no e gebroiki en, toku den sabi fu suma den e taki te den e taki fu Gado.

Anthony: Dati kan. Ma fu di Gado taigi wi san na en nen, meki a moro makriki gi wi fu kon moro krosibei na en.

Timy: Fa so?

Anthony: Yu musu si en so: A no ben de fanowdu fu sabi Moses nen. Wi ben kan sabi en nomo leki a man di prati a Redi Se, noso a man di ben kisi den Tin Komando. Wi no ben abi fu sabi Noa nen tu. Wi ben kan sabi en nomo leki a man di bow wan ark èn di kibri a libi fu en famiri nanga a di fu den meti. Srefi Yesus wi ben kan sabi nomo leki a man di ben komoto fu hemel èn di dede gi den sondu fu wi. A no so?

Timy: Mi denki so.

Anthony: Ma Gado sorgu taki wi sabi a nen fu ibriwan fu den sma disi. Fu di wi sabi a nen fu den, meki a moro makriki gi wi fu bribi taki den ben libi trutru. Aladi noiti wi miti Moses, Noa, noso Yesus, toku wi e si den leki trutru sma fu di wi sabi den nen.

Timy: Noiti mi ben si en so, ma a sani di yu taki tru!

Anthony: Èn dati na wan tra reide fu san ede Yehovah Kotoigi e gebroiki Gado nen so furu. Wi wani yepi sma fu kon si Yehovah Gado leki wan trutru Sma di den kan kon lobi. Ma wi e sori sma krin tu san Yesus du fu sorgu taki wi kan kisi frulusu. Kande wi kan leisi ete wan tekst di e sori dati krin.

Timy: Oke.

Anthony: Memre taki wi ben leisi Yohanes 14:6. Drape Yesus taki dati en na ’a pasi, en na san tru, èn en na a libi’. Meki wi luku wan tu vers na fesi fu si san a e taki na Yohanes 14:1. Yu wani leisi san Yesus taki na a lasti pisi fu a vers?

Timy: A bun. Drape skrifi: „Bribi na ini Gado èn bribi na ini mi tu.”

Anthony: Thanks. Wan sma kan taki dati a abi trutru bribi, efu a e bribi soso na ini Yesus noso efu a e bribi soso na ini Yehovah?

Timy: No. Yesus taki dati wi musu bribi na ini den ala tu.

Anthony: Dati tru. Èn yusrefi sabi taki a no nofo te wan sma e taki nomo dati a e bribi na ini Gado nanga Yesus. Wi musu libi na wan fasi di e sori taki wi abi bribi.

Timy: Dati tru.

Anthony: Ma fa wan sma e sori taki a e bribi trutru na ini Gado nanga Yesus? Kande wi kan taki fu a tori dati wan tra leisi.a

Timy: Oke, a bun.