San Bijbel e leri?

Suma noso san na Didibri?

YU BEN O TAKI dati Didibri na . . .

• Wan yeye?

• Na ogri na ini libisma?

• Wan tori di sma meki?

SAN BIJBEL E TAKI?

Didibri ben taki nanga Yesus èn a ben „tesi” en (Mateyus 4:1-4). Sobun, Didibri a no wan anansitori di libisma meki èn a no de na ogri na ini libisma. A de wan ogri yeye.

SORTU TRA SANI WI KAN LERI FU BIJBEL?

• Biginbigin Didibri ben de wan santa engel, ma „a drai baka gi san tru”(Yohanes 8:44). A tron wan leiman èn a opo ensrefi teige Gado.

• Tra engel teki a sei fu Satan di den trangayesi Gado tu.​—Openbaring 12:9.

• Didibri e meki furu sma denki taki a no de wan trutru sma.​—2 Korentesma 4:4.

Didibri kan abi krakti na sma tapu?

SON SMA E TAKI dati a no tru taki Didibri man abi krakti na sma tapu. Ma trawan frede srefisrefi taki ogri yeye kan kon na den tapu. San yu e denki?

SAN BIJBEL E TAKI?

„Heri grontapu de na ini a makti fu na ogriwan” (1 Yohanes 5:19). Aladi Didibri abi furu krakti tapu libisma, toku a no man meki ala sma du san a wani.

SORTU TRA SANI WI KAN LERI FU BIJBEL?

• Didibri e kori sma fu meki den du san a wani.​—2 Korentesma 11:14.

• Son leisi ogri yeye kan kon na wan sma tapu.​—Mateyus 12:22.

• Gado kan yepi yu fu „kakafutu gi Didibri”. ​—Yakobus 4:7.