Fu san ede yu musu frustan a tori fu den fo asi?

Den asi e lon bun tranga! Te den e lon, a gersi leki na dondru e bari. Te wi e leisi a span tori fu den fo asi na ini Bijbel, dan a de neleki wi e si den leti na wi fesi. A fosi asi weti èn a sma di e rèi en na wan kownu di abi furu makti. Na en baka wan tra asi e kon di redi leki faya. A sma di e rèi en e meki feti kon na heri grontapu. Baka dati wan tra asi e kon di blaka leki krofaya. A sma di e rèi en abi wan wegi na ini en anu. Te a e rèi, wan takru boskopu e bari taki nofo nyanyan no o de na grontapu. A di fu fo asi abi wan sikisma kloru. A e tyari takru siki kon nanga tra sani di e kiri sma. Na Dede e rèi na asi disi. Grebi e kon leti na en baka èn a e swari ala den sma di lasi den libi!​—Openbaring 6:1-8.

„A fosi leisi di mi leisi a tori fu den fo asiman, mi ben frede. Mi ben denki taki a Krutudei e kon èn taki mi ben o dede fu di mi no ben klari ete.”​—Crystal.

„Mi ben feni en wan span tori fu leisi fu den fo man di e rèi na tapu asi di abi difrenti kloru. Mi breiti di mi kon frustan san a fisyun disi wani taki.”​—Ed.

Fa a de nanga yu? Te yu e leisi fu den fo asiman na ini a buku Openbaring, dan yu e firi leki Crystal noso yu e denki leki Ed? Awinsi fa a no fa, a tori disi na ini Openbaring, a lasti buku fu Bijbel, na wan span tori di furu sma sabi. Yu ben sabi taki a o tyari wini kon gi yu te yu kon sabi san a fisyun disi wani taki? Fa so? We, Gado pramisi taki yu o de koloku te yu e leisi den profeititori na ini Openbaring, te yu e frustan den èn te yu e du san yu leri.​—Openbaring 1:1-3.

A tru taki a fisyun fu den fo asiman e frede furu sma, ma a tori disi no skrifi fu meki yu frede. Fu taki en leti, a fisyun tranga a bribi fu milyunmilyun sma èn a gi den a howpu taki sani o go bun na ini a ten di e kon. Na so a kan de gi yu tu. Grantangi, leisi a tra artikel tu.