Na rij foe den fo asiman — Wan marki
’Èn mi ben si, èn loekoe! wan weti asi, wan faja-kloroe asi, wan blaka asi, wan bléki-geri asi; èn a sma di ben sidon na en tapoe ben tjari a nen Dede. Èn Hades ben waka krosbé na en baka.’ — OPENB. 6:2-8.
1. San na president foe na Watch Tower Bible and Tract Society ben doe tapoe na edekantoro ini Brooklyn tapoe 2 oktober 1914 bifo a ben go teki presi na a njanjantafra?
A BEN DE fréda, a laatste dé foe na moen oktober foe na jari 1914. Na president foe na Wachtower Bible and Tract Society ben waka go na ini na njanjan-zaal foe na edekantoro foe na Genootschap disi, na Columbia Heights 124, Brooklyn, New York (VS). A ben de sowan sébi joeroe mamanten. Bifo a ben go na en presi na a ede foe na tafra na ini na njanjan-zaal a ben tan tanapoe pikinso pi. Foe kisi ala na prakseri foe den memre foe na Bethel-famiri di ben sidon na den njanjantafra a ben naki na ini en anòe. Nanga wan positief klank na ini en sten a ben sori dan na tapoe den biginwortoe foe na di foe dri couplet foe na singi di nen „Wi Kownoe e hari go na fesi!”, soleki disi de na tapoe den bladzijde 162 èn 163 foe na singi-boekoe di den ben gebroiki ini a ten dati Hymns of Millennial Dawn (Singi foe na moesdè foe a Millenium) èn a ben taki: „Den ten foe den heiden kon na wan kaba, bika den kownoe ben kisi den ten.” Baka dati fosi, a ben go na en faste presi na a tafra foe ben hori na aladé religieusprogramma na a mamanten njanjantafra foe Bethel.
2. O langa na president ben sori na fesi na a marki-jari dati, èn te o langa na ini na grontapoe-feti a ben kisi foe tan na libi?
2 Na ini na jari 1876 kaba, na ini wan artikel di a ben pristeri foe tjari kon na doro na ini The Bible Examiner, na president ben sori na tapoe 1914 leki na datum pe „den ten foe den heiden” ben sa kon na wan kaba, nanga boen moeliki bakapisi gi na heri libisma grontapoe (Luk. 21:24, Statenvertaling). Na ferwondroe sani e sori ensrefi dati di na president ben meki bekenti na a Bethel-famiri na Brooklyn dati den ten foe den heiden ben kon na wan kaba, dan na di foe 66 dé foe na Fosi Grontapoefeti na ini na heri libisma historia ben doro. Na a ten dati dan den sma di ben teki prati na a ogri stré disi nanga makandra ben meki 14 ferklari foe feti bekenti. Bifo na ogri-ati stré foe kisi grontapoe tirimakti èn foe wini den bisnis-wowojo foe grontapoe ben kon na wan kaba, dan 29 naatsi nanga kownoekondre ben de na ini na kefarlek feti dati. Na president foe a Genootschap, di ben taki den wortoe disi di fiti, ben dede bifo en égi kondre, den Verenigde Staten foe Noord-Amerika, ben go na ini na Fosi Grontapoe Feti na tapoe 6 april 1917 leki patna foe na Brits Kownoekondre foe feti tegen den Centrale makti foe Europa.
3. Fa na president ben sori alaten agen tranga na tapoe na prensparifasi foe 1914, èn fa a ben kan firi ensrefi di „den ten foe den heiden ben kon na wan kaba”?
3 Sensi 1879 na president foe na Genootschap ben poti alaten baka krakti tapoe na prenspari fasi foe 1914 na ini den kolom foe den (Ingrisi) nomroe foe na tijdschrift Na Wachttoren, èn disi ben de spesroetoe so na ini na boekoe The Time is at Hand (Na ten kon krosbé), di ben kon na doro na ini 1889. Ma di 2 oktober 1914 ben doro, dan a ben si nofo foe na fasi fa sani ben waka na grontapoe na ini na jari dati di warti foe memre, foe ben firi ensrefi korostoe na ini a tori foe a sé di a ben teki èn di a ben taki foe en na publiki. Leki wan faja ondrosoekoeman di e ondrosoekoe sani soifri foe na chronologie of a teri foe den ten foe na bijbel, di de leki wan fundamenti foe gi bodoi na profétis fasi foe den ten èn pisiten foe Gado, a ben kan firi ensrefi na ini na historia disi fa a no fa regtvaardiki.
4. Foe sortoe rij na president foe a Genootschap ben si a bigin bifo a dede, èn foe san na rij foe den asiman disi ben sa kan kisi nen nanga reti dati a de wan „marki”?
4 Bifo na president foe na Genootschap ben dede onverwakti na tapoe 31 oktober 1916, a ben si soboen fa den fo asiman foe den Apocalyps foe sensi na jari di den ten foe den heiden ben sa kon na wan kaba leki fa na bijbelchronologie ben taki, ben bigin nanga na rij foe den. Na Apocalyps, ofoe na Openbaring, de na laatste boekoe foe den djoe kristen Griki boekoe di sma gewoonlek e kari na Njoen Testamenti. Na rij foe den fo asiman de prenspari gi na heri grontapoe, foe di na rij disi de wan pisi foe wan „marki” di e sori pe na libismalo de na ini na lon foe na ten. A e sori dati wi de na ini na „bosroiti foe na seti foe sani disi”, di den discipel foe Jezus ben taki foe en (Matt. 24:3). Dati a de wan „marki”, e ferklari na ini na biginvers foe na Openbaring, pe wi e lési: „Wan openbaring nanga jepi foe Jezus Kristus, di Gado ben gi en foe sori en srafoe den sani di moe psa djonsro. Èn a ben seni en engel go èn nanga jepi foe en a ben ferteri dati na ini marki gi en srafoe Johannes.” — Openb. 1:1.
5. Na sortoe difrenti fasi den difrenti bijbelvertaling e sori dati na boekoe Openbaring skrifi ini marki (symbolismen), èn foe san na boekoe Openbaring, akroederi nanga na bigin foe na bijbel-boekoe disi, foeroe nanga?
5 Na rij foe den fo asiman skrifi na ini Openbaring 6:1-8. A de wan moi sani foe si dati aladi na Njoen-grontapoe Vertaling e gebroiki „ben ferteri na ini mar-ki” — san e akroederi nanga na vertaling foe A. Ogilvie („ben skrifi na ini marki”) — na wortoe „sori” e gebroiki na ini na Njoen Testament foe H. Bakels. Na lni na Statenvertaling, na Nederlands Luther-vertaling, na vertaling foe prof. Brouwer èn na Nieuwe Vertaling foe na Nederlands Bijbelgenootschap tanapoe eenvoudig „sori”. Na ini akroederi nanga den bigin-wortoe, dan na laatste boekoe foe na bijbel, Openbaring foeroe nanga marki ofoe agersi prenki (symbolismen) di abi foe doe nanga sani di abi wan moro prenspari fasi na ini na libisma historia. Den disi ben sa feni presi na ini na „ten di e kon”.
Den fo asi nanga den asiman foe den
6. Gi soema na kolokoe di taki na fesi na ini Openbaring 1:3 de foe ondrofeni, èn fa so?
6 Sani no de na ini na historia di psa di e sori dati den sani disi ben kon troe na ini na ten foe den tina-aiti jarhondro, baka a dede foe Johannes èn foe dat’ede wi prakseri e go now na a disiten di foe twenti jarhondro G.T. Leki wan bakapisi foe disi a de kon krin gi wi dati a ben poti na fesi gi wi di e libi now foe ondrofeni na kolokoe di na apostel di ben abi Gado jeje ben sori na fesi — di a ben skrifi: „Kolokoe na soema de di e lési den wortoe foe na profétitori disi èn den sma de di e jere den èn di e hori ala san skrifi na ini; bika den faste ten de krosbé kaba” (Openb. 1:3). Meki wi go ondrosoekoe „na marki” foe den fo asi nanga den asiman, foe na boen foe na kolokoe foe wi. Ini Openbaring 6:1-8 wi e lési foe disi:
7. San ben psa di na Lam ben opo na fosi ségel foe na boekoelolo di ben de na ini en anoe?
7 „Èn mi ben si, di na Lam [Jezus Kristus] ben opo wan foe den sébi ségel foe [na boekoe-lolo di ben de na ini en anoe], èn mi ben jere wan foe den fo libisani nanga wan sten leki foe wan dondroe taki: ’Kon!’ Èn mi ben si, èn loekoe! wan weti asi, èn na sma di ben sidon, na tapoe en, ben abi wan bo; èn a ben kisi wan kroon; èn a de hari go foe wini èn foe tjari en wini kon na wan kaba.
8. San na apostel Johannes ben si di a ségel di meki toe foe na boekoelolo ben opo?
8 Èn di a ben opo na ségel di meki toe, mi ben jere na di foe toe libimekisani taki: ’Kon!’ Èn wan tra wan ben kon na doro, wan faja kloroe asi; èn na sma di ben sidon na tapoe en, ben kisi makti foe poeroe na vréde foe na grontapoe, sodati den ben sa srakti makandra; èn a ben kisi wan bigi feti-owroe.
9. San Johannes ben si èn jere na a opo foe na ségel di e meki dri?
9 Èn di a ben opo na ségel di e meki dri, mi ben jere na di foe dri libi mekisani taki: ’Kon!’ Èn mi ben si èn loekoe! wan blaka asi, èn na sma di ben sidon na tapoe en, ben abi wan wegi na ini en anoe; èn mi ben jere wan sten di ben komoto na mindri foe den fo mekisani taki: „Wán liter tarwe foe wán dinarius èn dri liter gerst foe wán dinarius, èn no doe ogri na a olijfoli èn na a win.
10. San Johannes ben si èn jere na ini na visioen di a ségel di meki fo ben opo?
10 Èn di a ben opo na ségel di meki fo, mi ben jere na sten foe na di foe fo libi mekisani taki: ’Kon!’ Èn mi ben si èn loekoe! wan bleki-geri asi; èn na sma di ben sidon na tapoe en, ben tjari na nen dede. Èn Hades ben waka na en baka. Èn a ben kisi makti na tapoe na di foe fo pisi foe grontapoe, foe kiri nanga wan langa feti-owroe èn nanga mankeri foe njanjan èn nanga dede pestsiki, èn nanga jepi foe den wildermeti foe grontapoe.”
Na weti asi èn en asiman
11-13. (a) San na weti asi e agersi èn soema na tjariman foe en e agersi? (b) Nanga sortoe asiman di na Psalmsingiman e taki nanga en, a asiman e kroederi, èn tapoe soema Paulus e tjari den proféti wortoe dati foe Hebrewsma 1:8, 9 kon tapoe en?
11 Na weti asi e sori tapoe wan kownoe asi di sma di de kownoe e gebroiki, wan regtvaardiki èn soifri sani di e tjari joe waka lontoe èn di neleki wan letterlek asi e boewégi ensrefi gawgaw. Na tjariman foe na esesi sani disi di e tjari joe waka lontoe e gersi wan kownoe di den poti pas na wroko, bika den ben gi en wan kownoe kroon. A ben de wan kownoe-fetiman, bika a ben abi wan bo leki fetisani. Boiti dati, a ben hari go foe wini, te leki na kriboi féjanti foe en kownoekondre a ben sa wini. A ben sa de wan wini dorodoro! Ini akroederi nanga disi, dan den ben gi en wan langa feti-owroe, wan kownoe fetisani. We, soema ben doe a wroko disi na ini a di foe twenti jarhondro foe wi? A de krin dati a de na srefi sma leki na kownoe di e meki Psalm 45 kon troe, pe wi e lési:
12 „Wan switi afersi ben seki mi ati. Mi e taki: ’Mi wroko abi foe doe nanga wan kownoe.’ . . . Gepsi joe feti-owroe na joe bowtoe, o maktiwan, nanga joe wartifasi èn joe moi fasi. Èn go na ini joe moifasi doro te na a winimarki; rij gi na afersi foe waarheid èn foe sakafasi èn foe regtvaardikifasi, èn joe reti-anoe sa leri joe na ini sani di e meki joe kisi frede. Joe péri srapoe — folkoe e tan foe fadon na ondro joe — na ini na ati foe den féjanti foe na kownoe. Gado na joe troon te ten di no abi marki, ija, foe tégo; na scepter foe joe kownoewroko de na scepter foe getrowfasi. Joe ben lobi regtvaardikifasi èn ogridoe joe no wani si na ai. Foe dat’ede meki Gado, joe Gado ben salfoe joe nanga oli foe prisiri psa marki, moro leki joe patna.” — Den vers 1-7.
13 Na ini Hebrewsma 1:8, 9 na apostel Paulus e teki Psalm 45:6, 7 èn e tjari den wortoe kon na tapoe na Manpikin foe Gado, Jezus Kristus. A de wan sani di joe no kan poti na wan sé foe dat’ede èn di de faste dati a tjariman foe na weti asi, di e hari go foe wini, moe de Jezus Kristus na a ten di den ben meki en tron kownoe na ini hemèl na a kaba foe den ten foe den heiden ini 1914.
14. (a) Oten èn fa Jezus ben rij go na ini Jeruzalem neleki a ben go na a poti foe en leki kownoe, èn leki wan kontroe foe sortoe profétitori? (b) Na baka sortoebarnen fostentata Jezus ben waka di a ben rij na a okasi disi tapoe wan boeriki?
14 Wi e memre na okasi di Jezus Kristus leki na kownoe di den ben teki poti njoen ben rij go inisé foe Jeruzalem neleki a ben e go na ini na tempel foe den poti wan kroon na en ede tapoe. Na a ten dati a ben rij na tapoe wan faja weti asi. A ben rij nanga panja foetoe na tapoe wan boeriki. Disi ben psa leki wan kontroe foe na profétitori di tanapoe ini Zacharia 9:9, pe tanapoe: „Prisiri srefsrefi, o joe oemapikin foe Sion. Prisiri na ini wini, o oemapikin foe Jeruzalem. Loekoe! Joe kownoe srefi e kon na joe. A de regtvaardiki, ija, a kisi ferloesoe nanga sakafasi, èn a e rij na tapoe wan boeriki, ija, na tapoe wan bigisma-meti, na manpikin foe wan oemaboeriki.” Ini akroederi nanga na profétitori meki Jezus ben rij na tapoe na di foe négi dé foe na djoe moen Nisan a ini na jari jari 33 G.T. na tapoe wan vrédefasi meti go na inisé foe Jeruzalem. Na ini na dramatis waka disi, dan Jezus ben gersi na Paschalam di den djoe ben teki na tapoe 10 Nisan ini den oso foe hori na meti dan drape te na na hori foe na Pascha foe 14 Nisan. Foe di a ben rij na tapoe wan boeriki, dan Jezus ben waka baka en barinen fosten tata Salomo, na manpikin foe David. Di David ben saka en wroko leki kownoe, baka fo tenti jari di a ben de na tapoe na troon foe Israël, a ben meki Salomo rij na tapoe wan oema stonboeriki go foe teki a kroon foe en. Dan baka di na granpriester Zadok ben salfoe en leki na sma di ben teki na presi foe en tata, dan den hipihipi Israëlsma di ben de drape bari nanga prisiri taki: „Dati kownoe Salomo moe libi langa!” — 1 Kon. 1:33-40.
15. (a) Fa na pipel ben doe di Jezus ben rij go na ini Jeruzalem tapoe wan boeriki? (b) Sortoe ontvangst Jeruzalem ben sreka gi en èn foe san-ede?
15 We, sortoe ontvangst ben sa sreka now gi Jezus di, fo dé bifo na Pascha, a ben rij saka na Olijfbergi na tapoe wan boeriki go na a foto pe na poti foe wan kroon na tapoe wan kownoe ede ben feni presi? Den hipihipi sma, di ben bigin foe waka go, ben meki nanga san ben psa èn na stemming di ben de na a okasi dati, hari den èn den ben froestan dati en ben de na pramisi kownoe foe Israël. Den ben wai nanga palmtaki. Den ben bradi den tapsé krosi foe meki a rij na tapoe. Foe na sé foe den hipihipi sma, den di ben e waka na en fesi, èn den di ben e waka na en baka ben tan e bari: ’Ferloesoe tog na manpikin foe David! Blesi na sma moe de di e kon na ini Jehovah nen! Ferloesoe en tog na ini den moro hé presi!’” (Matt. 21:1-9). Disi ben de a fasi fa a pipel ben doe. Ma Jeruzalem srefi ben de na ondro den djoe kerki fesiman, di no ben meki na fasi fa den profétitori ben kon troe, tjari den. Foe dat’ede meki Jeruzalem no ben sreka wan kownoe ontvangst gi en.
16. Fa den tempel granman ben behandel Jezus, kontrari nanga na fasi fa den ben behandel den seriman?
16 Di Jezus ben go na a tempel, na hépriester Kajafas no ben salfoe en leki na Messias kownoe, di ben anga na a Romeinkownoekondre. Den priester ben gi den seriman pasi foe gebroiki na tempel kontren foe doe bisnis, ma Jezus ben sori den joisti fasi foe wan hépriester foe jagi den komoto, aladi a ben piri-ai gi den sma di ben meki bezwaar tegen disi nanga den wortoe: „Boekoe taki: ’Den sa kari mi oso wan oso foe begi’, ma oenoe e meki a tron wan foefoeroeman olo.” Na ini na tempel breni nanga lan djoe ben kon na en di a ben dresi. Ma den granpriester èn den meester foe wet ben feni fowtoe foe san ben psa èn ben wégri foe erken en leki na „manpikin foe David” èn foe poti en leki na reti tiriman abra a kownoekondre foe Israël. Di Jezus ben libi den na baka na ini na tempel èn ben go na ini Bethanië, a no ben doe disi leki wan kownoe di den ben poti pas na wroko. — Matt. 21:1-17.
17. Fa Pontius Pilatus ben sori belangstelling gi na taki di Jezus ben taki dati a ben de wan kownoe, èn fa a ben sori dati a no abi bisi nanga den winsi di den granpriester ben abi na ini a tori foe na kownoe wroko foe Jezus?
17 Fo dé na baka, di Jezus ben tanapoe na fesi na Romein tiriman Pontius Pilatus, na heiden disi ben aksi en ofoe a ben de wan kownoe. Jezus ben piki dati en Kownoekondre no ben de wan pisi foe na grontapoe disi pe Pilatus ben de wan pisi foe en. Nanga na dek’ati foe den granpriester, di ben taki: „Wi no abi wan tra kownoe leki Ceaser” meki Pilatus ben gi Jezus abra foe den spikri en na wan paal na Golgotha. Tokoe Pilatus ben tanapoe na tapoe dati wan kenki no ben moe tjari kon na ini den wortoe di ben skrifi a tapoe na bord di ben poti na tapoesé foe Jezus ede, namkoe: „Jezus na Nazarethsma, na kownoe foe den djoe”. — Johannes 19:15, 19-22.
18. Tapoe sortoe prenspari dé Jehovah ben wiki en Manpikin foe dede, èn nanga sortoe wortoe na Jezus di ben opo komoto foe dede ben gi adjosi na en discipel bifo a go na hemel?
18 A ben de na ini anoe foe na Almakti Gado, Jehovah, foe wiki en Manpikin di ben dede na pina dede, poeroe leki „na fosi gebore wan foe den dedewan” na tapoe 16 Nisan — precies na dé di den djoe ben pristeri den fosi froktoe foe na koti foe gerst gi Jehovah na ini na tempel (Openb. 1:5). Foe dat’ede meki na kownoe di ben kon ben man foe sori ensrefi na a srefi dé dati na en trow discipel. Wantoe dé na baka bifo a ben drai go baka na hemel, a ben taigi den: „Ala makti na ini hemel nanga grontapoe mi ben kisi. Go foe dat’ede èn meki discipel foe libisma foe ala naatsi, dopoe den ini na nen foe na Tata èn foe na Manpikin èn foe na santa jeje.” — Matt. 28:18, 19; Lev. 23:10-12; 1 Kor. 15:20.
A Wini foe en e kon na wan kaba
19. Sortoe proféti prenki Jezus ben kon meki kontroe na a reti ten na a fasi disi, èn sortoe kownoe a ben de sensi a ten dati?
19 Na so fasi Jezus ben man foe meki na profétis prenki kon troe pe den e sori en leki wan asiman tapoe wan weti asi di ben hari go leki wan kownoe di kisi wan kroon foe tjari en wini kon na wan kaba abra ala en féjanti na ini hemel èn na grontapoe (Openb. 6:1, 2), Sensi na kaba foe „den faste ten foe den naatsi” na ini na jari 1914 G.T. A de wan kownoe-fetiman di efoe joe loekoe en boen abi wan bo leki en fetisani foe farawe kan boro en féjanti nanga wan péri. Foe taki troe, a ben de na Kownoe-Fetiman di den proféti wortoe foe Psalm 45:3-8 ben taki gi:
20. San a moe doe ini akroederi nanga den wortoe di na psalmsingiman taki nanga en?
20 „Gepsi joe feti-owroe na joe bowtoe, o maktiwan, nanga joe wartifasi èn joe moi fasi èn go na ini joe moi fasi doro foe wini; rij foe na afersi foe waarheid foe sakafasi èn foe regtvaardikifasi èn joe reti-anoe sa leri joe na ini sani di e gi frede. Joe péri srapoe, folkoe e tan fadon na ondro joe, na ini na ati foe den féjanti foe na kownoe. Gado na joe troon, te ten di no abi marki, ija, foe tégo; na scepter foe en kownoewroko de wan scepter foe getrowfasi. Joe ben lobi regtvaardikifasi èn joe no wani si ogridoe na ai. Foe dat’ede meki Gado, joe Gado, ben salfoe joe nanga na oli foe prisiri psa marki, moro leki joe patna, Ala joe krosi de mirre èn aloë-oedoe èn kassia; komoto foe na moro bigi ivorenpaleisi a de den sani nanga snaar foe pré pokoe di ben gi joe prisiri.”
21. (a) Fa wi kan de séker dati den wortoe foe na psalmsingiman kontroe na tapoe na glori Jezus Kristus? (b) Fa Psalm 45:5 e poti krakti na tapoe a trefsékerfasi di a de poti en péri tapoe en féjanti?
21 Na ini Hebrewsma 1:8, 9 na apostel Paulus e teki Psalm 45:3-8 èn tjari na pisi dati kon na tapoe Jezus Kristus foe poti prakseri na tapoe na toemsi hé presi di a abi now. Disi ben meki a de séker dati na „kownoe” di den „manpikin foe Korach” ondro krakti foe santa jeje ben taki foe en, de na kownoe Jezus Kristus di den ben poti (Loekoe na opschrift foe Psalm 45.) Den péri di e komoto foe en „bo” sa de na tapoe na ati foe den gensman foe na kownoekondre nanga wan moro bigi trefzekerheid leki di foe den owroe Parthen, di ben de toemsi boen boman na tapoe asi.
22. (a) Na ini sortoe tra pisi foe Openbaring na tjariman foe na weti asi e kon foe si, èn ondro sortoe nen? (b) San wi ai di ségi „si”, èn fa wi e prakseri foe na toemsi moi visioen disi?
22 Na tjariman foe na weti asi, di Openbaring 6:2 e skrifi foe en, e sori dati a de na srefi sma leki na tjariman foe na weti asi na ini Openbaring 19:11-16. Na ini na bakaten skrifi disi en nen de „Na Wortoe foe Gado”, aladi a de tjari tapoe en bowtoe na titel „Kownoe foe den Kownoe èn Masra foe den masra”. Djaso den e gersi en na tapoe na moro bigi marki foe na aanval foe en na tapoe en gensman, pe na rij foe en e kisi en winimarki nanga na wini na ini „na feti foe na bigi dé foe Gado na Almaktiwan” na tapoe na fetigron foe Harmá-gedon ofoe Bergi foe Megiddo (Openb. 16:14-16; 19:17-21). Sondro foe sma ai si na momenti e kon dati Satan na Didibri nanga en ogri jeje e tai èn sroto poti na ini na peti di no abi gron foe doesoen jari (Openb. 20:1-3). Den ai foe wi bribi blesi dati sensi na kaba foe den ten foe den heiden na ini 1914 den ben si na rij foe na kownoe di kisi wan kroon èn di de tapoe na „weti asi”. Foe di wi seki te na ini wi sili foe den wini di a wini te so fara, meki wi e bari taki: „Rij go moro fara, kownoe asiman tapoe na weti asi, go na joe wini sondro en speri na Har-mágeddon, foe meki na universele soevereiniteit foe Jehovah Gado, na Sma di gi na profétis ’marki’ disi kon reti!”
Fa joe ben sa piki den aksi di e kon now?
□ Oten den asiman ben bigin rij?
□ Sortoe ferwakti ben kontroe na a ten dati?
□ Sortoe rij na fosi asiman ben rij na ini a ten di pasa, èn fa den ben ontvang en?
□ Fa Openbaring 6:1, 2; 19:11-16 èn Psalm 45:3-8 e sori na prakseri foe na bakaten rij foe na asiman disi?