Te yu trowpatna waka gi yu

„Mi ben wani dede di mi masra taigi mi taki a o libi mi gi wan moro yongu frow. A ben e hati mi, spesrutu te mi ben e prakseri ala den sani di mi du gi en.”—Maria, Spanyorokondre.

„Di mi frow gwe libi mi sondro taki mi ben fruwakti dati, dan a sani dati broko mi ati. Wantronso ala den sani di mi nanga en ben abi na prakseri fu du, no ben e go doro. Son dei mi ben e firi leki a e go, ma dan wantronso mi ben e firi brokosaka baka.”—Bill, Spanyorokondre.

A KAN broko wan sma ati te en trowpatna waka gi en. A tru taki son sma ben man gi a trowpatna fu den pardon èn den du muiti fu abi wan bun trowlibi baka.a Ma srefi efu a sma tan nanga en trowpatna, toku a kan tan hati en taki en patna ben waka gi en. San o yepi den sortu sma disi fu no sari tumusi?

BIJBELTEKST DI KAN YEPI YU

Son sma di ben e sari srefisrefi fu di a patna fu den waka gi den, kisi trowstu fu Bijbel. Den kon sabi taki Gado e si den watra-ai fu den èn taki a e frustan fa den e firi.—Maleaki 2:13-16.

„Di den prakseri fu mi di ben e trobi mi, ben kon hebi gi mi, dan na yu ben e trowstu mi, so taki mi ben man prisiri baka.”—Psalm 94:19.

Bill e taki: „Di mi leisi a vers dati, dan a ben de neleki Yehovah ben e trowstu mi na wan lobi-ati fasi neleki fa wan papa e du dati.”

„Te sma e tai hori na yu, dan yusrefi o tai hori na den.”—Psalm 18:25.

Carmen e taki dati en masra ben waka gi en èn a ben e du dati wan tu mun kaba. A e taki: „Mi ben abi a frutrow taki Yehovah no ben o libi mi noiti.”

„No broko un ede nanga nowan sani, ma begi Gado ala ten, begi en fayafaya . . . Na so a o kon sabi san unu wani aksi en, dan a freide fu Gado di bigi moro iniwan sani di libisma man frustan, o kibri un ati.”—Filipisma 4:6, 7.

„Mi leisi a tekst disi omeni leisi baka”, na so Sasha e taki. „O moro mi ben e begi, o moro mi ben e firi taki Gado ben e trowstu mi.”

Ala den sma di kari na ini na artikel disi ben wani gi abra son leisi. Ma den frutrow tapu Yehovah Gado èn den kisi krakti fu a Wortu fu en. Bill e taki: „A bribi fu mi gi mi a krakti fu horidoro di a ben gersi leki mi heri libi ben pori. Aladi a ben gersi leki mi ben de wan pisi ten ’na ini a lagipresi di dungru pikapika’, toku Gado ben de nanga mi.”—Psalm 23:4.

a Te yu trowpatna waka gi yu èn yu wani sabi san yu musu du, dan luku den artikel na ini na Ontwaakt! fu 22 april 1999, blz. 3-4, 5-8, 9-12, „Als een huwelijkspartner ontrouw is”.

San yepi son sma fu no gi abra

Leisi èn denki dipi fu Bijbeltekst di kan trowstu yu.

Bill e taki: „Mi leisi a buku Yob èn baka dati mi leisi den Psalm. Mi hari strepi na ondro ibri pisi di ben fiti a situwâsi fu mi. Mi kon si taki den Bijbel skrifiman disi ben e sari tu èn den ben abi broko-ede neleki mi.”

Poku kan meki yu firi moro bun.

Carmen e taki: „Te mi no ben man sribi te neti, dan mi ben e arki poku. A sani disi ben de wan bigi trowstu gi mi.” Daniel taki: „Mi leri fu prei gitara èn a poku yepi mi fu no broko mi ede tumusi.”

Taki fa yu e firi.

Daniel e taki: „Mi no ben gwenti fruteri sma fa mi e firi. Ma mi ben abi wan tu bun mati èn mi taki nanga den ibri dei. Mi ben kan taki nanga den noso mi ben kan skrifi den fu fruteri den fa mi ben e firi. A sani dati yepi trutru.” Sasha e taki: „A yepi di mi kisi fu mi famiri ben prenspari srefisrefi. Mi mama ben de drape gi mi ala ten. Efu mi ben wani taki, dan a ben de klariklari fu arki. Mi papa yepi mi tu fu kon si taki sani ben o waka bun nanga mi èn na so mi kisi misrefi baka safrisafri.”

Tan begi.

Carmen e taki: „Mi begi doronomo. Mi ben e firi taki Gado ben de krosibei fu mi, taki a ben e arki mi èn taki a ben e yepi mi. Na ini a muilek ten dati, mi kon moro krosibei na Gado.”