Meki oen leribekwaamheid kon moro betre — Te wi e meki den prenspari punt kon na fesi
1 ’Foe taki leti, oen ben moesoe de leriman’, Paulus ben skrifi gi den Hebrewsma (Hebr. 5:12). Dati no de moro mendri troe na ini na ten disi, now di na wroko foe leri trawan di Jezus ben gi e doro en hémarki. Wan sani di sa jepi oen foe tron toemsi boen leriman, na foe wi si tapoe wan grofoe-fasi san a stof wani taki di wi lési èn e leri trawan. Disi abi foe doe nanga a heri boekoe di wi e studeri, sosrefi toe tapoe wan spesroetoe kapitel èn den aparti paragraaf na ini.
2 Na nen foe wan boekoe e ferteri foe na edethema di sa tjari finfini kon na fesi. Te wan sma e gi leri komoto foe na boekoe dati, a moesoe leri foe meki kroederi de na mindri a nen foe ibri kapitel èn a nen foe a boekoe. Jepi a studenti foe si fa den toe dati e kroederi. Leki fa a gwenti de dan den e go nanga a tori foe wan spesroetoe kapitel moro dipi tapoe wan spesroetoe pisi foe a moro prenspari tori. Den kapitel „Waka nanga makandra na ini lobi” nanga „Meki na famirilibi waka boen” na ini na Tégo libi-boekoe foe eksempre e jepi den studenti foe si san den e froewakti foe wan sma bifo a kan libi na ini a grontapoe Paradijs foe tégo.
3 Den pisi na ini wan artikel ofoe wan kapitel de wan jepisani foe poti den prenspari punt aparti. Ala paragraaf na ini wan artikel abi tapoe wan ofoe trafasi foe doe nanga na nen foe a kapitel. Leri foe soekoe na spesroetoe punt na ini ala paragraaf di abi moro foeroe foe doe nanga a thema foe na kapitel. Dati sa de a prenspari punt di joe wani stampoe boen go na ini joe studenti te joe e leri. Loekoe pikinso na ini a Tégo libi-boekoe na a edeprakseri tapoe bladzijde 120 nanga den paragraaf 4 èn 5 di e kon na baka.
4 Te joe e gi leri nanga wan boekoe pe den aksi druk na ini, joe sa si dati a piki de na ini wantoe makriki wortoe èn sontron srefi na ini wan wortoe. Leri joe studenti foe hari wan strepi soso na ondro na wan wortoe dati ofoe na pikin zin. Disi abi difrenti winimarki. A kan feni a piki es’esi baka sondro foe lési wan heri pisi agen foe na paragraaf. Gi en dek’ati foe gi den piki nanga en égi wortoe prefoe a lési den langa pisi di kande a ben hari wan strepi na ondro. Efoe a loekoe den wantoe wortoe pe a hari wan strepi na ondro, a kan formuleer es’esi nanga wantoe wortoe san a stof wani taki.
5 Foe spesroetoe warti gi na leriman èn gi a studenti de dati sonwan foe den wortoe ofoe pisi foe wan zin skrifi sontron skoinsi, sodati den moro prenspari prakseri foe den bijbeltekst e kon na fesi. Proberi foe kon sabi dati joe studenti e ferstan a fasi fa a stof di druk skoinsi, e gebroiki. Disi sa jepi en te a e ferteri trawan san a e bribi.
6 Efoe now, joe e doe na Wachttoren-studi, wan gemeenteboekoestudi ofoe wan osobijbelstudi, den gronprakseri di wi taki foe den dja èn di abi foe doe nanga den prenspari punt, kan gebroiki alaten. Joe kan gebroiki den ooktoe te joe e leri pikin. Jezus ben taki dati wi moesoe ’meki discipel èn moesoe leri den’ (Mat. 28.19, 20). Te wi e leri foe meki den prenspari punt kon krin na fesi, dan dati sa jepi wi foe doe a komando di wi kisi.