Abi prisiri ini persoonlek studeri
1 Na Psalmskrifiman ferklari den sma „kolokoe” di den „lostoe de na ini a wet foe Jehovah” èn di e lési „dé nanga neti na ini nanga safri sten” (Ps. 1:1, 2). Joe e ondrofeni alaten na inisé prisiri disi, ija, a troe kolokoe di joe o abi te joe e teki soifri sabi foe oen lobi Tata Jehovah na ini joe? Nanga foeroe sma a de so. Ma fa a doe kon, dati foeroe sma e feni studeri nanga a prakseri dipi foe sani, wan hebi sani, di e tjari wel foeroe winimarki kon ma di wan sma no e kisi prisiri foe en? San kan doe foe meki a sani disi di sori so hebi tron wan ondrofeni di e gi prisiri?
FA WI KAN BIGI WI PRISIRI?
2 Na a fosi presi wi moesoe ferstan dati a teki foe a sabi disi na ini oen ini troe wani taki libi gi oen (Joh. 17:3). Disi de so prenspari dati Na Wachttoren ben ferklari wan lési; „Efoe joe ’no man feni ten’ gi bijbelstudi, dan ini troe joe e taki dati joe no wani tégo libi.” Ma a kisi foe tégo libi moesoe de a wan enkri réde foe san-ede wi e studeri a bijbel? Loekoe pikinso sortoe piki Jezus ben gi den djoe tiriman di ben de nomo foe kiri en: „Oen e ondrosoekoe den Boekoe, foe di oen e denki dati nanga jepi foe dati oen sa kisi tégo libi, . . . ma mi sabi wel dati oen no abi a lobi foe Gado na ini oen” (Joh. 5:39, 42). Ija, lobi gi Gado èn a lostoe foe jepi trawan, moesoe poesoe oen foe doe persoonlek studi. — Tori. 20:35; 1 Kor. 8:1.
3 Efoe foe eksempre wi e sreka oensrefi boen gi den gemeente komakandra, dan oen sa wani abi moro es prati èn oen commentaar sa wini na ini waarde. Tapoe a fasi disi wi kan gi trawan dek’ati èn poesoe den foe abi lobi nanga boen wroko (Hebr. 10:24). Èn sortoe krakti disi sa abi tapoe oen velddienst? Te oen sreka oensrefi gi den komakandra, dan den jeje waarheid di wi e leri na ini a Kownoekondrezaal, sa prani go moro dipi na ini oen ferstan èn na so fasi oen sa man foe memre den punt disi te wi e gi trawan kotoigi. Wi sa de moro srekasreka na ini ala pisi foe oen diniwroko foe gi trawan ’wan réde foe na howpoe di de na ini wi’ èn oen diniwroko sa de foeroetron moro boen. — 1 Petr. 3:15.
FENI A TEN GI EN
4 A feni foe ten foe studeri de wan problema? Efoe wi e ferstan dati noti moro mendri leki oen libi e anga foe bijbelstudi, èn efoe wi e winsi foe gebroiki opregti san wi leri foe jepi trawan, dan disi sa poesoe wi foe „bai a ten” poeroe foe mendri prenspari activiteit (Ef. 5:15, 16). Disi kan wani taki dati wi moesoe skotoe na ten di wi e loekoe televisi èn a lési foe boekoe di no de prenspari. Kande te neti, sjatoe bifo wi go na bedi, wi kan gebroiki wan pikinso ten moro boen, ofoe te mamanten wi kan opo pikinso moro froekoe. A boen kaba te soso 15 te 20 minuut ala dé wi ben sa teki foe doe persoonlek studi. Spesroetoe te disi ben sa doe alatron. Ala dé soso 15 minuut persoonlek studi e kon na ini wan jari moro leki 91 joeroe!
5 Ma efoe oen wani abi prisiri foe oen studi-ten so foeroe leki a kan, dan wi moesoe gebroiki na ten tapoe wan boen fasi. Dan wi no moesoe go sidon e dren na dé ofoe meki oen prakseri go koiri, ma oen sa poti oen ferstan na a trasé tapoe wan spesroetoe tori. Te wi hori wan marki na ai èn komopo na pasi gi sani di kan kori oen prakseri soleki wan televisi, wan presi pe foeroe babari e meki, dan oen sa si moro froktoe. Troetroe persoonlek studi e aksi dipi prakseri foe den praktis waarde foe san wi e leri. Te wi e waka na baka a rai foe Paulus foe ’prakseri dipi abra den sani disi èn gi joesrefi krinkrin na ini’, dan oen sa firi satisfaksi nanga san wi kan miti èn wi sa feni troetroe prisiri na ini persoonlek studi. — 1 Tim. 4:15.