Kibri na kristenpanti di ben fertrow na wi
1 Ini 2 Timotéus 1:13, 14 na apostel Paulus e fermane en kompewrokoman: „Tan hori na a patron foe gesontoe wortoe, di joe ben jere foe mi, nanga na bribi èn na lobi di de na ini akroederi nanga Kristus Jezus. Kibri na toemsi moi panti di fertrow na joe nanga jepi foe na santa jeje di ben libi na ini wi.” San na wan panti di fertrow na wan sma? A de wan warti sani di fertrow na a sorgoe foe wan sma èn foe san a moe gi frantwortoe. San ben de na panti di Paulus ben taki foe en? A ben meki wi kon sabi en leki „na patron foe gesontoe wortoe” ofoe fa wi gwenti foe kari en na a ten disi, na waarheid. A de krin dati Paulus ben wani dati Timotéus ben abi dipi warderi foe na waarheid. Foe dat-ede a e sori na tapoe na waarheid leki wan „panti di fertrow na wan sma”.
2 Paulus ben bedoel dati na kristen panti disi ben de soso wan sabi foe na waarheid? Nono. A ben de ooktoe na diniwroko di ben tai makandra nanga na waarheid. Den gesontoe wortoe disi ben moe meki bekenti na inisé èn na dorosé foe na gemeente. Na ini na tori foe na prékiwroko disi Paulus ben taki: „Préki na wortoe, hori stéfi na en leki nanga wan tranga fanowdoe afersi, na ini boen ten, na ini moeilek ten.” Dan a e taki disi moro fara: „Doe na wroko foe wan evangeliumprékiman, doe joe diniwroko dorodoro.” (2 Tim. 4:2, 5). Disiten kristensma e abi lobi gi na sabi èn na diniwroko foe na waarheid. Den wani kibri den kristenfasi disi boen.
MOEITI DE FANOWDOE
3 A kibri foe wi kristenfasi no de makriki. A de troe dati na prékiwroko na ini son presi kan doe na ondro boen omstandigheden. Efoe wi de na ini so wan boen omstandigheid wi sa wani doe ala sani foe miti sma someni leki wi kan. Ma na ini tra gebied pe den brada e wroko na ondro moeilek omstandigheden, den moe fiti densrefi na den omstandigheden. Ala di den e gi densrefi tranga èn den e kibri makandra den e loekoe nanga jepi foe Jehovah taki a préki -nanga leriwroko go doro (Fil. 4:13). Na kristen panti foe wi moe kibri na ondro ala omstandigheid.
4 Efoe wi troetroe e sori belangstelling gi wi kristen panti èn e kibri en, wi sa doe ala moeiti foe hori gelijke tred nanga na waarheid èn wi sa feti a baka foe gebroiki den moro boen methode foe pristeri en gi tra sma. Na studeri finfini foe na boekoe Joe kan libi foe tégo na ini wan paradijs na grontapoe tapoe den gemeente boekoestudie de wan moi jepi gi wi. Wi e warderi na inibere now moro ete èn kan pristeri en foe dat’ede na ini februari nanga moro faja gi tra sma. Te wi arki boen na den demonstratie nanga ondrofenitori di wi o kisi na a diniwroko komakandra, sa jepi sreka wi gi na velddienst. Te wi e taki nanga trawan foe na inibere tori foe na boekoe èn fa foe pristeri en, disi sosrefi toe sa de wan jepi gi wi foe meki na dienst foe oen kon de moro boen.
5 Joe ben kisi, na prisiri foe hori wan bijbelstudie na ini na Tégo-libi boekoe? Efoe dati de so, joe no ben si fa den sma di abi belangstelling e leri gaw èn fa den e doe wan sani nanga san den leri? Wan sisa e skrifi: „Baka di mi ben drai baka kon foe mi ’Kownoekondre wánfasi’-districtscongres mi ati ben foeroe so nanga en dati mi ben moesoe skrifi oenoe foe na prisiri foe mi. Mi ben abi na grani foe ben kan si fa dri sma di mi ben e studeri nanga den ben gi densrefi abra èn sori disi nanga na dopoe na ini watra.” Baka dati a ben taki dati na Tégo-libi boekoe ben meki den gro go moro esi na a gi foe densrefi abra èn a teki foe dopoe. Tra sma ben gi densrefi sortoe kommentaar disi.
TAN KIBRI NA PANTI DI BEN FERTROW NA WI
6 Na teki foe na kristen panti de wan sani. A tan kibri foe en, na wan heri tra sani. Sondro degedege disi de na réde foe san-ede Paulus ben skrifi Timotéus ooktoe na sani di e kon now: „Ma joe dati tan na ini den sani di joe ben leri èn joe ben go bribi na ini den nanga overtoigi, sabi foe soema joe ben leri den.” (2 Tim. 3:14). Na ini 2 Petrus 1:5-8 wi e feni wan srefi sortoe dek’ati.
7 Wi wani tan séker ’na ini den sani di wi ben leri’. Wi no wani de „inactief ofoe sondro froktoe”. Wi wani kibri „na patron foe gesontoe wortoe” srefsrefi makandra nanga na diniwroko di ben fertrow na wi. Na marki foe wi de foe gi frantwortoe foe na „toemsi moi panti”, di Jehovah ben gi oenoe sondro gridifasi. Meki wi tan loekoe na en foe na koni èn na jeje krakti sodati disi sa kan de so.