Meki joe diniwroko kon moro bigi foe di joe e go na ini na gewone pionierswroko
1 „Wan langa ten foe wegi go wegi kon na ini begi ben waka a fesi na aksi disi foe tron pionier”. Dati wan sisa ben skrifi na ini wan brifi di a ben poti na aksi foe en foe tron gewone pionier na a bigin foe a dinijari disi. Now a ben man foe go nanga en oemapikin makandra, di ben bigin nanga pionierdienst baka di a ben kisi en skoro diploma foe na middelbare skoro. „Wegi go wegi kon na ini begi” — ija, dati na wan fosi sani gi den di wani meki a diniwroko foe den kon moro bigi, foe di den e go na ini na gewone pionierwroko. Joe ben go prakseri na ini begi foe den omstandigheden foe joe èn ben go wegi go wegi kon fa joe ben sa go ini na blesi grani disi?
2 Na apostel Johannes e gi wi na djaranti disi taki wi sa kisi san wi e aksi ini kroederi nanga na wani foe Gado (1 Johannes 5:14, 15). Èn sortoe spesroetoe wroko leki fa a wani foe Gado taki moesoe doe na ini den laatste dé disi? „A boen njoensoe disi foe na kownoekondre sa préki na a heri grontapoe pe libisma e libi leki wan kotoigi”, Jezus e piki (Matt. 24:14). Jezus ben sori sosrefi toe taki wi moe begi „na Masra foe a kotiwroko dati a seni wrokoman go ini na koti wroko” (Matt. 9:37, 38). Jehovah srefi sa poti foe troe prakseri na den tranga begi foe wi foe kisi foeroe wrokoman èn sa jepi wi teki na gewone pionierwroko.
3 Den sma di nanga den heri ati e doe wan sani nanga na fanowdoe foe moro foeroeten prékiman de sma foe difrenti libimarki, achtergrond nanga omstandigheden. Wan 96-jari brada di pas wan jari psa kaba ben bigin nanga pionierwroko, e tan doe toemsi moi wroko leki pionier. Wan osomama nanga mama foe wan toe pikin e si en pionierwroko leki wan osofamiri tori, sodati ala sma na ini na osofamiri foe en e kon goedoe na jejefasi.
JOE KAN KENKI OMSTANDIGHEDEN FOE JOE
4 „Ija”, wan mama foe dri pikin e piki di froisi go na wan moro pikin oso baka di en laatste pikin ben trow. A ben pionier kaba èn na pionierprakseri foe en ben tan na libi na en èn di den omstandigheden ben gi pasi a ben tjari kenki kon na ini en situwasi foe bigin nanga en pionierdienst baka.
5 A de wan ferstan sani foe teri den kostoe te wi e prakseri foe go na ini na pionierwroko (Luk. 14:28). A no de wan afersi foe ’go pionier awinsi san o psa’. Ma son sma di ben denki na a bigin den no ben kan pionier, den go ondrosoekoe a fasi fa den e gebroiki den ten. Foe di den kenki a fasi fa den seti den ten, meki gemiddeld dri joeroe ini wan dé den kisi di den abi fanowdoe foe doro den marki foe wan pionier, èn dati den ben kan doe sondro dati den poti den tra kristen frantwortoe na wan sé. Den de now kolokoe gewone pionier.
6 Wan broko en ede toemsi efoe wan sma sa doro na joeroe marki, ben meki son sma tan a baka foe tron wan pionier. Ma wan bribi foe wan kristen kan drifi sani di gersi bergi, sosrefi toe den sani di e kon foe so wan frede (Matt. 17:20). A wortoe foe Gado nanga en jeje, makandra nanga na boen rai di Jehovah organisaatsi e gi kan jepi joe foe bow so wan bribi.
A DOE FOE POSITIEF SANI DE FANOWDOE
7 Joe sa man kon so fara foe go na ini na pionierwroko, te joe e doe sani ini kroederi nanga den begi foe joe. Sortoe sani joe moe doe? A lostoe moe wiki kon na ini joe ati; joe moe wani foe pionier. Proberi now kaba foe meki na prékiwroko foe joe kon moro foeroe èn doe spesroetoe moeiti foe wroko makandra nanga den sma di skrifi den nen kaba leki gewone pionier. Loekoe pikinso na a prisiri foe den. Dati sa jepi joe foe kweki na pionier prakseri. No tan sidon loekoe na den negatief sani ini na omstandigheid foe joe (Prék. 11:4). Proberi foe teki wan eksempre na a positief fasi foe Nehemia na ini a tori foe na bow baka foe den skotoe foe Jeruzalem ala di ala sortoe problema ben de. A ben taki: „Na Gado foe hemel, en sa meki wi si wini marki, èn wisrefi, en knegti, sa opo tanapoe, èn wi moe bow.” — Neh. 2:20.
8 Na pionierwroko sa gi moro okasi foe njan na spesroetoe prisiri di wan sma e kisi efoe a e jepi tra sma foe leri sabi èn dini Jehovah. En te joe meki joe diniwroko kon moro foeroe di joe o go na ini na gewone pionierwroko dan joe sa kisi na kowroe-ati di Odo 11:25 e taki foe en. Joesrefi na jejefasi sa dringi watra „foeroe” foe di joe e gi trawan watra „foeroe” nanga a wortoe foe libi.