Fa joe sa teri den dé foe joe na ini april?
1 Wan libiten foe 70 jari e gi howpoe tapoe ongeveer 25.500 libidé, Te joe de jongoe dan disi gersi kande dati a de boen langa, ma o esi den dé e psa! (Ps. 90:10). Srefi na hoeveelheid libidé disi no de wan garanti gi wi ini na seti foe sani disi foe di tide wi no sabi san wi libi sa de te tamara (Jak. 4:13-15). Foedi den dé foe wi de so pikinso èn a ten di na grontapoe disi abi, e doro en kaba, foe dat’ede wi kan froestan dati na begi foe Mozes soleki a skrifi na ini Ps. 90:12, fiti srefsrefi: „Sori wi fa foe teri den dé foe wi na so wan fasi dati wi kan kisi wan ati foe koni.” Joe abi na lostoe foe kisi na jepi foe Jehovah foe joe kan poeroe foe ibri dé foe joe libi moro foeroe san a kan? Ija, wi wani teri wi dé ofoe bepaal a waarde foe den, sodati wi kan gi Jehovah grani èn wi kompe-libisma kan ondrofeni wini foe dati.
2 Ten di wi ben lasi na ini a ten di psa, wi no kan doe wan sani moro nanga en. Ma foe a ten di e kon wi kan doe wel wan sani, efoe wi meki plan a fesi. Dritenti warti dé didon a wi fesi ini april. Now a de a ten foe loekoe fa wi kan gebroiki den dé disi moro boen. Aksi joesrefi: Den disi sa de boen dé gi mi? Mi sa gebroiki den na tapoe wan froestanfasi? San mi sa meki doe kon na ini a pisten dati? Mi sa kan den gi tra sma wan wini di o tan? Jehovah sa prisiri foe a fasi tapoe san joe e gebroiki den dé dati?
SAN SA PSA NA INI A MOEN DISI FOE APRIL?
3 Foeroe sma na mindri Jehovah pipel ben kon si dati april de wan heri boen moen foe de na ini a jepi-pionierdienst. A weer ini algemeen de boen èn wantoe ekstra mogelekheid de ini a tori foe fri dé. A jari di psa 294 brada nanga sisa ini Sranan ben de ini na jepi-pionierdienst. Nanga dati wan bigi kotoigi ben gi na a ten dati foe Jehovah Gado nanga en prakseri. Fa a sa go na ini a jari disi na ini april?
4 Joe ben kan poti en leki wan marki foe go pionier leki osofamiri na ini a moen april? Foe san-ede oen no ben sa go taki makandra foe en èn meki en leki wan tori foe begi makandra foe en? Wi abi na overtoigi dati den blesi di sa kon foe disi sa pasa den moeiti èn offer di sa tjari krinkrin. Wan bepaalde osofamiri ben teki a bosroiti alamala foe go pionier ini april. Na mama ben de wan gewone pionier kaba. Na papa ben wroko heri dé èn ben dini na ini na gemeente leki owroeman. Tokoe a ben si kans foe seti en ten so dati a ben kan de wan jepi-pionier. Den dri pikin na ini a oso dati foe wan pisi foe april ben abi skoro vakantie aladi na tra pisten baka skoro ten èn ini den weekend den ben de nanga den papa nanga mama ini na dienst. San ben de den bakapisi? Den ben ferteri densrefi san e kon now: „Te joe abi leki wan osofamiri wan marki, dati wani taki foe jepi someni sma leki joe kan na ini wan faste ten, dan disi e hari den memre foe na osofamiri kon na makandra èn foeroe moro wroko makandra de. Wan tra wini marki ben de dati toe foe wi pikin ben kan opo bijbelstudi san ben de wan bigi prisiri gi den èn leki osofamiri wi ben man foe gi 351 joeroe ini Jehovah dienst.”
5 San sa de a marki foe oenoe leki gemeente na ini a moen april? Joe gemeente kan psa a nomroe foe jepi-pionier foe a jari di psa? Na praktijk e sori dati boen foeroe foe den prékiman kan doro 60 joeroe, spesroetoe efoe ibri wan sma e wroko makandra èn e sori bribi ini Jehovah Gado di kan gi oenoe krakti di e psa san de normaal (2 Kor. 4:7). Owroe èn jongoe prékiman ben ondrofeni na waarheid foe den wortoe disi ini den ten di psa. Ooktoe owroeman nanga dinari na ini na diniwroko ben sori disi awinsi den ben abi druk wroko. Ooktoe sisa ben sori disi, srefi nanga pikin èn nofotron ooktoe ete nanga wan trowman di no de ini bribi. A bribi foe den ben kisi pai di na moen disi ben pasa? Ini a moen dati a gebied ben wroko finifini, ooktoe den adres foe sma di no ben de na oso èn foeroe tra prékiman di no ben man foe pionier ben kisi dek’ati foe doe moro. Wan fesiman opziener ben taki: „Disi ben tjari den brada nanga sisa na ini na gemeente kon moro krosbé na Jehovah èn moro krosbé na makandra.”
6 Foe dat’ede wi e rikomanderi dati na skin foe owroeman moro boen ini a bigin foe a moen maart komakandra foe taki san kan doe foe gi dek’ati èn hori baka gi na pionierdienst ini a moen april. Ekstra velddienst actie kan poti, na ini mamanten joeroe èn na bakadina joeroe. Na gebied moe wroko finifini èn aparti prakseri moe poti na ibri wan sma sodati alamala kan doe foeroe activiteit.
JEHOVAH E SORI WI FA
7 Jehovah Gado o sori wi fa wi moe teri wi dé foe di ensrefi e poti ensrefi leki eksempre foe di ai sori fa wan boen gebroiki kan meki foe a ten di de. Den dé foe en foeroe nanga productief wroko foe san den mekisani foe en e njan boen foe en (Joh. 5:17). Efoe wi e waka na baka Jehovah na ini disi, dan ibri dé foe na moen april kan de gi wi wan boen dé èn no wawan gi wi ma ooktoe gi den sma di e arki na wi (1 Tim. 4:16). Meki den sori taki den de kolokoe dé èn meki Jehovah poti dé sondro foe joe kan teri na a libi foe joe.