Sori warderi gi na ferloesoe ofrandi
1 Foe na sondoe ede foe wi foe wi fosten papa Adam, meki wan situwasi ben doe kon pe na libisma-famiri ben sa kon fri soso nanga jepi foe wan ferloesoeman, wan volmaakti libisma, foedi a ferloesoeman ben sa bai baka san Adam ben lasi gowe. Wi lobi Tata, Jehovah, ben kon jepi wi foedi a ben seni en wan enkri gebore Manpikin kon na grontapoe. Na libi krakti foe na makti jeje mekisani disi tapoe wan wondroe fasi ben tjari go na a moeroe foe Maria. Di a ten ben doro Jezus ben gebore. A ben gro kon tron wan bigi-sma èn ini akroederi nanga a wani foe en hemel Tata a ben offer en volmaakti libi sodati wi ben kan libi (Matt. 1:20, 21; Joh. 1:1-3, 14). Na bakapisi foe en offer ben de precies a tra sé foe san a sondoe foe Adam ben tjari kon (1 Kor. 15:22).
2 Troe kristen e sori warderi gi na ferloesoe seti disi foedi den e sori bribi na ini Jezus Kristus èn e waka na ini den foetoestap foe en. Na warderi disi wi e sori ooktoe foedi wi e gi jesi na a komando foe na bijbel foe kon makandra na a ala jari Memrefesa (1 Kor. 11:24). Ini a jari disi Jehovah Kotoigi sa kon makandra tapoe sonde 12 april, baka te don dongo, foe memre a dede foe Jezus.
SREKA SANI BITEN
3 Owroeman moe loekoe boen efoe ala fanowdoe sreka nanga seti ben orga. Efoe moro leki wan gemeente e meki gebroiki foe na srefi Kownoekondrezaal dan den moe wroko makandra ini den activiteit foe den.
4 Ibriwan foe wi aparti ben sa wani teki ten foe go denki foe a prenspari fasi foe a spesroetoe afersi disi. Foe loekoe soifri na bijbellési schema foe na wiki dati sa de wan bigi jepi ini disi. Efoe a kan dan a lési kan psa na ini osofamiri verband. Ooktoe den publikatie foe a Genootschap kan gebroiki foe loekoe moro bodoi. Te wi e loekoe den sortoe materiaal dati na ini begi, dan a warderi foe wi gi na santa fasi foe na Avondmaal sa kon moro tranga.
5 Efoe wi go denki na toemsi moi eksempre foe Jezus, spesroetoe ini a tori foe en dienst di a ben doe nanga en heri sili, foe san-ede wi no ben sa teki na ini na schema foe wi foe doe velddienst na ini sowan dé. A de wan sori foe wi warderi di fiti gi na ferloesoe ofrandi. Seti joe afersi so dati nanga ala joe prakseri joe kan arki na takmakandra sodati joe kan gi joesrefi krinkrin tapoe den bodoi disi.
KARI TRA SMA FOE DE DRAPE
6 A no de foe taki dati wi abi na lostoe dati wi bijbelstudi èn tra sma di abi belangstelling de nanga wi tapoe na fesa disi. Foe dat’ede meki na ini a moen disi maart kaba wan spesroetoe moeiti moe doe foe fisiti den persoonlek èn foe meki den gebroiki foe den kari di a Genootschap e gi. Kande spesroetoe sma kan kisi wan kari nanga na telefon ofoe nanga jepi foe a skrifi foe brifi. Efoe a kan nomo, seti sani foe go teki den sma efoe disi de praktis. Son sma ben feni en wan jepi foe meki wan lijst foe ala sma di abi belangstelling èn di den wani meki kontact nanga den. Sodra den go loekoe den, wan strepi kan hari psa a nen sodati prakseri kan poti na tapoe a tra sma. De nanga waran èn faja te joe e kari den sma disi di abi belangstelling. Sori den na prenspari fasi di a bijbel e gi èn san a spesroetoe okasi disi wani taki. Wiki a jeje aptéti foe den.
7 Te wi de boen froekoe drape na a sonde neti dati, dan wi alamala kan bari wan switi kon gi den njoenwan nanga inactiefwan. Sorgoe dati den e firi densrefi na oso èn meki den meki kennis nanga tra sma. Nanga wi heri ati wi e howpoe dati a de foe den tapoe na fesa foe na Avondmaal foe Masra sa de gi den leki wan dek’ati foe kon geregeld nanga a gemeente.
8 Omeni moro sma sa warderi ete na okasi foe kisi tego libi nanga jepi foe na ferloesoe ofrandi wi no sabi. Ma wi de seker dati wan „bigi ipi” foe sma sa sori bribi ini „na broedoe foe na Lam” èn sa kisi ferloesoe (Openb. 7:9, 10, 14). Meki Jehovah blesi ooktoe a jari disi baka den moeiti foe wi te wi e de druk bezig foe kari èn gi dek’ati na doesoendoesoen sma foe kon makandra nanga wi foe sori warderi gi na seti foe na ferloesoe ofrandi.