Pristeri na boen njoensoe — Na jongoewan
1 Na njoenmodo ten disi sori taki a de wan toemoesi moeilek ten gi jongoe sma ini algemeen. Tokoe hondrohondro jari pasa wan man di ben de ondro krakti foe Gado santa jeje ben skrifi: „Fa wan jonkoeman kan krin na pasi foe en? Foe di a e tan loekoe boen akroederi na wortoe foe joe” (Ps. 119:9). Ija, doesoendoesoen jongoewan ini na ten disi e njanboen foe tiri di abi en fondamenti tapoe na Wortoe foe Jehovah.
2 Baka di a leisi wan foe den „Jongoe sma e aksi. . .”-artikel na ini Ontwaakt!, wan jonkoeman ben taki: „Doronomo mi ben meki mofo foedi mi ben prakseri taki a de wan normaal sani. Mi no ben prakseri trow kwetikweti. Dan mi ben leisi na tijdschrift Ontwaakt! foe joe. A ben tjari wan kon foe na boen foe den waarde foe mi. Mi tapoe nanga a meki foe mofo te leki mi de klari foe trow.” Leki fa a e sori a ben njanboen foe na praktis rai di ben gi. Now jongoe sma na wan makriki fasi kan go na warti fonten foe bijbel bodoi di tjari kon a doro ini na fasi foe wan njoen boekoe, San jongoe sma e aksi — Praktis piki. Fa joe kan meki jongoe sma na ini joe kontren ofoe jongoewan na skoro kan go na en?
ABI BELANGSTELLING GI JONGOE SMA
3 Foe overtoigi jongoe sma sotaki den go si na waarde foe na Wortoe foe Jehovah, kan de wan tjalensi. (Loekoe Odo 22:15.) Ma na apostroe Paulus ben taki: „Mi tron wan djoe gi den djoe, foe wini djoe” (1 Kor. 9:20). Na so toe na jepi foe jongoewan foe feni èn warderi jeje tiri di e tan, e aksi taki joe froestan jongoe sma èn den problema foe den. Joe moesoe prakseri na a fasi foe san jongoe sma abi belangstelling gi èn san de den problema foe den na skoro ofoe pe den e libi ofoe e wroko. Te joe e preiki gi jongoewan, dan na froestan foe sani disi moesoe sori na ini joe bigin wortoe, den sani die joe e taki èn den aksi foe joe. Na pisi pe den skrifi san de na ini a boekoe, na ini a njoen Jongoe sma e aksi-boekoe, na wan toemoesi boen fonten foe ideja foe sani di joe kan taki foe den. Foe di joe de froetrow nanga den tori disi, joe sa abi inzicht ini sani di jongoe sma e denki foe en ini na ten disi.
SAN JOE KAN TAKI
4 Loekoe te joe e go oso foe oso pe pikin de. Froeklari taki joe e doe wan poebliki dienst foe jepi sma foe kakafoetoe gi den problema foe aladei. Na den sortoe oso dati kande joe man foe taki nanga den pikin srefi. Sori tapoe wan eksenpre foe na praktis rai na ini a boekoe. Hori na prakseri taki a de na marki foe joe foe meki den si na waarheidkotrowfasi foe foe Psalm 119:9.
5 Sori switifasi te joe e taki nanga wan jongoewan èn behandel en nanga wartifasi. Baka na odi na bigin joe kan taki kande: „Mi de bezig nanga wan poebliki dienst foe jepi jongoe sma soleki joe foe kakafoetoe gi den problema di den moesoe si ondro ai na ini a kontren disi. A ben psa nanga joe wan leisi taki den ben dwingi joe foe doe wan sani di, te joe loekoe en boen joe no ben wani doe? Ofoe a de sotaki wanwan leisi joe abi na firi foe doe sani soso foedi trawan e doe en toe, ma no foedi joe srefi abi prisiri foe wani doe en? Joe aksi joe srefi oiti fa joe kan kakafoetoe gi so sortoe druk foe speri?” Opo na baka a piki foe en na boekoe na kapitel 9. Taki dan: „Loekoe pikinso san na njoen poeblikâsi disi e taki na tapoe bladzijde 77. [Leisi wan paragraaf di fiti.] Joe denki taki wan studie foe na bijbel ben sa jepi jongoewan foe kakafoetoe gi na problema disi? [Gi okasi foe kommentaar.] Loekoe san na bijbel e taki na ini Psalm 119:9. [Leisi.] Na boekoe disi e sori fa na bijbel kan jepi jongoe sma foe kakafoetoe gi moeilek situwâsi, soleki den wan di skrifi na ini na faki foe san de na ini a boekoe. [Gi en na boekoe.] Na foe joe foe wan bijdrage foe Sƒ5,-.”
6 Efoe joe na wan preikiman èn e sidon na skoro ete, teki dan den rai di ben gi na ini na uitgave foe september 1989 foe Wi Kownoekondre dienst. Dan joe sa tesi na kolokoe foe doro boen winimarki.
7 Jehovah ’no e winsi taki wán sma e go lasi’ (2 Petr. 3:9). Jongoewan de toe na ini disi. Ma foeroe jongoe sma no sa pasa Armagedon libilibi. Meki a de sotaki den moeiti foe wi foe preiki nanga boen bakapisi gi jongoewan sa abi leki bakapisi na froeloesoe foe wan bigi nomroe jongoe sma, foe meki Jehovah kisi prèise.