Aksi boksoe

◼ Fa den sma di go loekoe fa den e dopoe sma kan sori taki den breiti?

Dopoe na wan prisiri okasi. Wi breiti te njoen sma e sori taki den teki a sei foe Jehovah, èn a bribi foe den na poebliki e sori (Ps. 40:8). Jesus ben taki dati disi ben meki taki bigi prisiri ben de na ini hemel (Luk. 15:10). Memre foe na famiri nanga preikiman di studeri nanga den swa di o teki dopoe spesroetoe de nanga prisiri foe si taki njoenwan e teki a prenspari stap disi. Ma fa joe kan sori na prisiri disi na wan joistifasi?

Jesus en dopoe ben de wan eksempel gi kresten dopoe foe now. A ben froestan taki a ben de wan serjoesoe èn prenspari stap di a ben o doe. A ben e begi di a ben kisi dopoe (Luk. 3:21, 22). A ben sabi taki dopoe na wan ten foe go prakseri dipi èn de serjoesoe. Den disipel foe en so srefi ben kon si na prensparifasi foe dopoe. Leki bakapisi foe gi di santa jeje ben gi na tapoe a Pinksterdei 33 G.T., so wan 3000 sma ben kisi dopoe. Fa den disipel di ben de kotoigi foe a kefal disi ben doe? Den ben tan gi densrefi na a leri foe den apostel èn na prati nanga makandra, na a njan njanjan èn na begi (Tori. 2:41, 42). Den disipel ben e prakseri foe jeje sani èn ben e sori makandra taki den lobi teki sma na den oso.

Kresten kongres foe now ben kisi wan heimarki nanga a dopoe. Seiker a de boen te wi e sori taki wi breiti foe di wi e naki anoe èn e taki wan wortoe foe prèise te wi e si taki sma e teki a sei foe Jehovah. Na a tra sei, wan prisiri babari di pasa marki, froiti, wai anoe go kon a tapoesei foe joe ede, noso a kari tranga foe sma nen ben sa de wan sani di no fiti. A sortoe fasi disi foe tjari wisrefi e sori wan mankeri foe warderi gi na serjoesoe fasi èn santafasi foe na sori disi foe bribi. Disi no sa de a joisti ten foe hori wan sortoe sjow foe gi bromki noso tra kado na den sma di dopoe te den komoto na ini a dopoe baki. A dopoe e marki a bigin foe a kresten streiwaka foe kisi froeloesoe. Wi kan prisiri èn de wan deki-ati gi den sma di e kisi dopoe foe di wi e jepi den foe abi warderi gi na krosibei matifasi nanga Jehovah di a dopoe opo gi den.

A dopoepresi no de wan presi foe meki spotoe, prei, swen, noso tra fasi foe tjari wisrefi di kan pori a serjoesoe fasi foe na okasi. Wi moesoe sori wi prisiri na wan wartifasi. Na ordefasi foe wi èn a serjoesoefasi sa jepi ala sma di de drape foe abi prisiri.