Foe san ede libisma famiri moesoe soekoe Gado
1 Ini a di foe twenti jarihondro disi, dan foe feti ede, a kwinsi foe sma, èn ekonomia problema, heri groepoe foe pipel froisi. Èn nanga den okasi di de foe rèis esi nanga komunikâsi wrokosani a gersi leki a grontapoe e kon pikin moro nanga moro. Disi meki taki difrenti relisi groepoe kon moro krosibei foe makandra. Disi e meki taki foeroe leisi relisi e de ini a njoensoe leki wan sani di abi makti na tapoe a libi foe sma na heri grontapoe.
2 Disi ben abi makti so toe na tapoe a preikiwroko foe wi. Moro nanga moro a e pasa taki wi e miti sma di abi wan relisi bakagron di no de bekènti na wi.
3 Foe kan jepi wi foe kisi wan moro krin froestan foe tra relisi nanga den historia bakagron, meki wi ben kisi a boekoe A soekoe di libisma e soekoe Gado (De mens op zoek naar God). A e gi piki tapoe hondrohondro aksi di abi foe doe nanga fondamenti prakseri foe san sma e bribi ini den moro prenspari relisi foe grontapoe. Ini a moen juni wi sa go gebroiki a boekoe disi ini wi diniwroko. Tapoe sortoe tori ini a toemoesi warti jepisani disi wi kan poti prakseri foe kan gi opregti sma deki-ati foe kon sabi moro foe Gado?
4 Wan fondamenti aksi foe san den e taki ala tron baka na ini a heri boekoe na: Libisma abi wan sili di no e dede, di e tan na libi baka te a dede èn di e go na a tra libi jana? Ini pikinmoro ala relisi den e leri a prakseri disi a wan noso tra fasi. Tra aksi foe san den e taki ini a boekoe na: Wan sani de leki hel pe den e gi den sili skin-ati? San na a troe howpoe gi den dedewan? Wán Gado de, noso foeroe gado de? Joe kan poti sma prakseri tapoe den aksi tapoe bladzijde 17 èn 18 foe a boekoe. Èn awinsi wi e taki nanga wan atheïst (sma di no e bribi ini Gado) noso wan agnosticus (sma di e taki dati joe no man leri sabi Gado), dan den aksi 4 nanga 6 kan hari en prakseri èn kande dati kan meki joe abi wan takimakandra di abi boen froktoe leki bakapisi.
5 A heri libisma famiri moesoe soekoe Gado now, èn proeberi foe meki En feni den boen. Grontapoe situwâsi e sori taki Armagedon e lon kon moro krosibei. A de wan ten foe doe wan sani fajafaja. Fa dati na wan grani di wi abi foe poti faja gi trawan foe soekoe Jehovah now di a de foe feni (Jes. 55:6, 7). Fa a boekoe A soekoe di libisma e soekoe Gado e jepi sma na a soekoe di den e soekoe Gado? A e gi bodoi di e poti sma nanga difrenti bakagron na prakseri broki. Tapoe bladzijde 297 ini paragraaf 26 den e sori den Moslim, foe eksempel, taki a troe krestendom no e leri a Driwanfasi. Loekoe boen fa paragraaf 43 tapoe bladzijde 229 kan wiki a belangstelling foe djoe sma na ini a tori foe a gebroiki foe a nen foe Gado.
6 Wi abi ala reide foe pristeri a boekoe disi nanga faja. Efoe wi sabi heri boen san tanapoe na ini a boekoe, dan wi sa feni okasi foe wiki a belangstelling foe opregti sma nanga foeroe relisi bakagron. Meki a de so taki wi sori taki wi abi faja gi a dienst disi.
7 Jehovah de wan Gado nanga boen-ati èn sari-ati. O boen en kari de foe sma leri sabi en! Kande boen foeroe moro sma sa kon tron sma di e prèise Jehovah. Ini juni wi sa jepi foeroe sma ini a krestenhèit, nanga jepi foe a boekoe A soekoe di libisma e soekoe Gado, so srefi toe sma nanga wan no-kresten noso no-bribi bakagron, foe go anbegi Jehovah „nanga jeje èn nanga waarheid” (Joh. 4:23, 24). Meki wi tan proeberi foe feni sma di e soekoe waarheid, èn meki a banti mindri den nanga a Gado foe waarheid kon tranga. A de foe feni!