Inleiding di e wiki belangstelling
1 Jesus ben de boen srefisrefi ini a gebroiki foe inleiding. Efoe a ben taki nanga wan bigi groepoe sma noso nanga wán wan enkri sma, Jesus ben fanga a prakseri foe den arkiman foe di a ben meki den persoonlijk abi prati ini a takimakandra. A ben sori den arkiman foe en a waarde foe a tori di a ben taki. — Mat. 5:3-12; Joh. 4:7-30.
2 Sreka a fesi de fanowdoe: Foe wiki belangstelling gi a boskopoe foe wi, wi moesoe fiti wi inleiding so taki den e abi foe doe nanga a sma srefi, abi foe doe nanga den broko ede foe en èn sori taki a Kownoekondreboskopoe sa jepi en persoonlijk.
3 Te wi e sreka gi a velddienst, loekoe san na den sani di den sma ini a libimakandra e broko den ede moro foeroe. Wan njoensoe foe san sma e taki nownow e hori a prakseri foe alasma? San sa hari a prakseri foe wan jongoe sma? Foe wan moro owroe sma? Foe trowman, wefi, noso papa nanga mama? Na presi foe e gebroiki a srefi inleiding na ibri doro, foeroetron a moro boen foe sreka wan toe difrenti inleiding èn foe de klariklari foe kenki den, so taki den de boen foe gebroiki ala di joe e loekoe boen fa den ososma e piki tapoe a boskopoe. Son preikiman ben abi boen bakapisi foe sreka èn gebroiki wan toe inleiding foe a Taki-go-taki-kon-boekoe ibri leisi te den e go ini a oso-foe-oso-preikiwroko (rs blz. 9-15). Disi e hori a fasi fa den e bigin taki nanga sma, njoen, èn a e tan hari sma prakseri.
4 Ini a moen augustus kande joe wani foe gebroiki wan pristeri leki disi:
◼ „Koemorgoe, fa joe tan? Wi ben taki nanga son sma foe a birti foe sabi sortoe eigifasi den wani si ini wan sma di e tiri trawan. Mi mag aksi sortoe eigifasi joe denki taki prenspari srefisrefi? [Gi okasi foe piki. Sori taki joe e froestan en. Agri nanga en efoe a piki boen]. Joe sabi taki bijbel ben taki foe den eigifasi foe A sma di den ben feni boen foe de a tiriman foe libisma? A skrifi dja ini Jesaja 9:6, 7. [Leisi.] Fa joe e denki taki a ben o de foe libi ondro so wan tiriman?” Gi okasi foe piki èn poti a sma prakseri dan tapoe Psalm 146:3, 4 èn den bodoi di skrifi ini a Taki-go-taki-kon-boekoe tapoe bladzijde 351 èn 352, di e taki foe a djaranti foe a kwaliteit foe a tiri foe Jesus. Noso a Libi foe têgo-boekoe, bladzijde 112 èn 113, kan gebroiki foe meki a takimakandra go doro. Efoe joe si taki a sma abi opregti belangstelling, dan kande joe wani pristeri a poeblikâsi.
5 Efoe joe e taki nanga sma di lobi den osofamiri, a pristeri di e kon now kan wroko heri boen te joe e gebroiki a Libi foe têgo-boekoe
Baka te joe gi odi so leki fa a gwenti de, joe kan taki:
◼ „Joe ben si taki den hebi foe aladei de wan tjalensi gi famiri ini a ten disi? [Gi okasi foe piki.] Joe abi wan idea pe famiri kan go foe feni gesontoe rai? [Gi okasi foe piki.] Wi ben poti prakseri tapoe san bijbel abi foe taki foe a tori disi. Loekoe san a Mekiman foe trow ben taigi na fosi libisma paar.” Leisi Genesis 1:28 èn go na bladzijde 238 ini a Libi foe têgo-boekoe èn go doro nanga joe takimakandra, ala di joe e gebroiki penti di joe ben piki na mindri trawan foe kapitel 29.
6 Te wi e teki den fasi foe Jesus foe hari sma prakseri èn meki den teki prati ini a takimakandra leki eksempel, wi e sori opregti ati sma a waarde foe jeje sani.