Gebroiki a Libi foe têgo-boekoe na gobaka
1 Na apostel Paulus ben sabi o prenspari a de foe de fajafaja foe sorgoe gi den wan di ben sori belangstelling gi waarheid. A ben agersi den nanga swaki prani, di doronomo abi watra nanga sorgoe fanowdoe (1 Kor. 3:6-9). Na a srefi fasi ini a ten disi, sma di ben sori belangstelling abi a lobi sorgoe foe wi fanowdoe te wi e tjari gobaka foe sorgoe foe a gro foe den na jejefasi.
2 A de boen foe hori na prakseri taki te wi e go baka na sma, foeroetron den sa abi sani fanowdoe foe meki den memre penti di wi ben taki na wi fosi takimakandra. Dati ede, na ibri gobaka a ben sa de wan boen sani foe taki sjatoe baka foe san joe ben taki na a fosi fisiti, ala di joe e poti prakseri tapoe den penti di na ososma ben lobi troetroe. Hari na ososma kon ini a takimakandra èn de esi-esi foe si san e hari en belangstelling èn san de den fanowdoe foe en.
3 Te wi e tjari gobaka, efoe wi ben libi a „Libi foe têgo”-boekoe na baka ofoe no, dan kande joe wani foe gebroiki a wantewante fasi disi foe bigin wan bijbelstudie:
◼ „Foeroe sma nanga san wi ben taki, ben feni piki tapoe den bijbel aksi foe den foe di den gebroiki a boekoe disi.” Te joe e drai go pe den nen foe den kapitel skrifi ini a Libi foe têgo-boekoe, joe kan aksi: „Sortoe tori djaso e hari joe prakseri morofoeroe?” Go na a kapitel di e sori taki a e hari en prakseri èn sori na ososma fa den paragraaf di abi nomroe abi foe doe nanga den aksi di e tanapoe na ondrosei foe ibri bladzijde so taki a kan froestan den moro prenspari penti foe ibri paragraaf. Taki soso foe wan toe penti èn meki wan faste mofo foe go baka.
4 Wan tra fasi foe bigin taki nanga a sma kan de:
◼ „Mi ben prisiri troetroe nanga a takimakandra di wi ben abi a wiki di pasa. Foeroe sma ben aksi oenoe foe san ede wi e tan naki na den doro. Mi ben denki taki a piki di den e gi tapoe bladzijde 29 foe a boekoe disi, Joe kan libi foe têgo ini wan paradijs na grontapoe, ben sa hari joe prakseri. [Leisi paragraaf 11.] Te joe loekoe san skrifi djaso, san joe ben sa taki dati de fanowdoe efoe wi wani taki na anbegi foe wi e plisi Gado? [Gi okasi foe piki èn prèise na ososma bakadati.] Ini den dei di Jesus ben de na grontapoe, joe ben abi sma di ben denki taki Gado ben feni na anbegi foe den boen. Loekoe djaso san paragraaf 2 foe a kapitel disi e taki foe den.” Leisi èn taki foe a piki disi.
5 Te joe e tjari wan gobaka na wan sma pe joe ben go kaba èn pe joe ben libi a „Libi foe têgo”-boekoe na baka, joe kan taki:
◼ „A lasti leisi di mi ben fisiti joe, wi ben taki foe grontapoe afersi di moesoe kenki. Oiti joe ben aksi joesrefi foe san ede Gado ben gi pasi na ogridoe?” Gi okasi foe piki èn drai go na bladzijde 99 paragraaf 2, èn loekoe so srefi den aksi foe a studie. Leisi èn taki foe a paragraaf disi, loekoe so srefi den bijbel tekst. Ini joe takimandra joe kan gebroiki den prenki di joe ben piki na mindri trawan ini a boekoe, foe eksempel bladzijde 78, 84, 85, 119, 147, 149-153 èn 156-158.
6 Pe joe ben libi wan traktaat a baka: Sontron joe e libi wan traktaat na a fosi fisiti. Te joe e tjari gobaka, joe kan taki foe wan noso toe paragraaf foe a traktaat makandra nanga den tekst di ben skrifi. Sori bakadati ini a Libi foe têgo-boekoe fa den e taki foe wan bijbel tekst di den skrifi ini a traktaat. Efoe a sma e sori belangstelling, dan kande joe wani pristeri a Libi foe têgo-boekoe èn sreka sani foe go doro nanga a takimakandra na a tra fisiti foe joe.
7 Efoe na wan getrow fasi wi e sorgoe taki wi e nati den swaki prani foe kresten bribi di abi foeroe sorgoe fanowdoe, dan Gado sa meki a gro foe en eigi prèise èn glori. — 1 Kor. 3:7.