Go baka ini den feistidei, nanga a koni foe man si sani, na sma di ben sori belangstelling
1 December na a moen te foeroe sma di ben sori belangstelling ini na boskopoe foe wi, sa abi en druk nanga feistidei sani. Dati meki, te wi e go baka na sma di ben sori belangstelling, wi moesoe abi na koni foe si sani èn kande wi moesoe sreka foe kon esi-esi tapoe a penti, boiti efoe na ososma e sori taki a wani taki moro langa.
2 Prakseri na fesi san wi o taki: Alaten wi moesoe abi krinkrin na prakseri san wi wani taki. Disi e aksi foe wi taki wi e go loekoe den penti baka di wi ben skrifi na wi fosi fisiti èn e tjari den penti di wi ben taki kon baka na wi prakseri èn iniwan aksi di ben libi na baka na a ososma, sondro foe wi ben gi piki na tapoe.
3 Efoe joe ben gebroiki na idea di den ben gi ini paragraaf 5 ini na artikel na tapoesei, te joe e go baka joe kan taki:
◼ „Na a ten disi foe a jari, foeroe sma e denki foe a gebortoe foe Krestes. A lasti leisi di wi ben taki, mi ben pramisi foe froeteri joe wan toemoesi moi penti foe a foto pe Jesus ben gebore. Joe sabi dati bijbel ben froeteri 700 jari na fesi dati Jesus ben o gebore ini Betlehem?” Gi okasi foe a sma piki. Baka dati, te joe leisi Mika 5:2, joe kan taki: „Dati na wan toemoesi froewondroe profeititori, a no so? Ala di disi na wan toemoesi moi bijbel penti, joe sabi taki bijbel profeititori e kon troe so srefi ini wi ten?” Efoe a sma abi ten, wi kan go doro nanga a takimakandra noso efoe a e doe wan wroko, wi kan aksi en foe kon wan tra leisi èn taki moro fara foe a tori nanga en.
4 Efoe a traktaat „A grontapoe disi sa tan?” ben libi na baka, wi kan taki disi:
◼ „Loekoe san den skrifi dja tapoe bladzijde 3, ondro ’A marki.’ Disi abi foe doe nanga profeititori di so leki Jesus ben taki ben sa marki den lasti dei. [Taki foe toe noso dri profeititori nanga na ososma.] Joe ben sa taki dati boeweisi de taki den profeititori disi e kon troe ini a ten disi?” Efoe joe e si taki a sma abi opregti belangstelling èn ten e gi pasi foe doe dati, joe kan gi leki idea foe a go ondrosoekoe a Bigi man-boekoe. Sori fa kapitel 111 e taki moro fini foe sani di abi foe doe nanga a marki di Jesus ben gi. Efoe joe ben libi soso a traktaat na baka, dan na wan tra fisiti joe kan tjari a takimakandra kon tapoe wan tra traktaat noso brochure, so leki Na tiri di sa tjari na Paradijs kon noso „Loekoe! Mi e meki ala sani kon njoen.”
5 Pristeri wan oso-bijbelstudie: Efoe wi ben libi a Bigi man-boekoe na a ososma noso efoe a abi wan eksemplaar kaba, a ben sa boen foe demo wan oso-bijbelstudie ala di joe e gebroiki kapitel 111. Wi kan gebroiki wan fasi di de a srefi leki a wan di wi e gebroiki na a gemeente boekoestudie. Efoe a studie e go moi na fesi, wi kan go studeri wan foe den brochure noso bigin wantewante nanga a Libi foe têgo-boekoe.
6 Meki wi de srekasreka alaten foe go baka na ala sma di ben sori belangstelling. Wi moesoe abi na koni foe si sani boen èn doe moeiti alaten foe sreka na pasi gi wan tra fisiti, foe di wi e libi aksi na baka na a kaba foe ibri takimakandra di e wiki a sma belangstelling. Disi sa jepi wi foe de „sreka dorodoro gi ibri boen wroko”. — 2 Tim. 3:17.