Prati soifri sabi foe Jesus Krestes
1 Ini wi velddienst ini december, wi sa gebroiki a boekoe A moro bigi man di oiti ben libi. San joe kan taki foe bigin wan bijbel takimakandra di e fiti a momenti dati, èn fa joe o tjari a toemoesi moi poeblikâsi disi kon na a prakseri foe sma?
2 Gebroiki den njoen traktaat foe wi: Son preikiman ben abi boen bakapisi foe di den e gebroiki traktaat foe si efoe wan sma abi belangstelling, srefi bifo den e pristeri tra poeblikâsi. Fa wi kan kisi jepi foe doe disi? Foe di wi e sori den a njoen traktaat foe wi A grontapoe disi sa tan?
Baka wan odi di fiti, joe ben sa kan taki:
◼ „Wi e aksi sma efoe den e agri taki Jesus Krestes ben de a moro bigi man di oiti ben libi. [Gi ten foe piki.] A no de foe taki, foeroe man ben abi krakti tapoe a fasi fa den afersi foe libisma e waka, èn son wan foe den ben jepi foe a libisma-famiri go na fesi, ma loekoe san e meki taki Jesus Krestes de tra fasi leki ala trawan. [Leisi Joh. 17:3.] No wan tra sma abi na makti foe gi têgo libi na a libisma-famiri. [Drai go na bladzijde 3 foe a traktaat.] Di Jesus ben de dja na grontapoe, a ben taki foe sani di ben o feni presi bifo a kaba foe grontapoe. Ma a ben gi den disipel foe en deki-ati toe foe prisiri, bika den sani disi ben sa wani taki dati froeloesoe e kon krosibei.” Baka te joe taki sjatoe foe wan toe sani foe a marki foe Krestes en denoja, poti prakseri tapoe a lasti bladzijde di e sori wan toe foe den blesi foe en Kownoekondre tiri.
3 Wan jongoe preikiman noso wan sma di njoen noso no abi ondrofeni ete, kan gebroiki den prenki foe wan traktaat leki wan fasi foe bigin wan takimakandra.
Foe gebroiki a traktaat „A grontapoe disi sa tan?”, wan preikiman kan go na bladzijde 3 nanga 4 èn taki:
◼ „Loekoe den toe prenki disi, wan pe wan opolani e iti bom ini orlokoe èn a trawan pe wan pikin e dede foe angri. [Go na bladzijde 5.] Loekoe den prenki disi foe wan gronseki èn foe wan siki man ini wan ati-oso bedi. [Pauze.] Bijbel e sori taki den toemoesi ogri sani disi heri esi sa kon na wan kaba.”
4 Efoe a e sori taki a sma abi belangstelling, leisi Openbaring 21:3, 4, langalanga foe bijbel noso leki fa den e taki foe en ini a traktaat tapoe bladzijde 6. A e anga foe na belangstelling di a sma sori, efoe joe kan taki krin foe tra bodoi. Te a sma e sori opregti belangstelling, kande joe man froeteri sjatoe foe na sortoe wroko di wi e doe èn libi a Bigi man-boekoe na baka èn seti sani foe wan gobaka.
5 Poti na fondamenti gi wan fisiti bakaten: A no de foe taki, dati efoe wi libi wan traktaat noso a Bigi man-boekoe, noso tra lektuur, noso ben abi soso wan switi takimakandra, wi kan taki: „A tra leisi te mi e kon, mi wani froeteri joe wan heri moi penti di abi foe doe nanga a foto pe Jesus ben gebore.” Sorgoe taki joe e skrifi sani foe a fisiti èn foe a belangstelling di a sma ben sori.
6 A Kownoekondre e gi a wan enkri howpoe gi a libisma-famiri. Meki wi sori taki wi e angri serjoesoe foe en, foe prati nanga ala sma di wi e miti a „soifri sabi foe a santa kibritori foe Gado, dati na Krestes”. — Kol. 2:2.