Jepi ala sma di sori belangstelling
1 Wi bribi nanga wi lobi gi trawan sa boeweigi wi ini a moen maart foe jepi èn kari ala sma di sori belangstelling gi a Kownoekondre boskopoe foe kon na a Memrefesa. Wi moesoe tjari den sortoe sma disi go na san Jehovah ben seti foe kisi froeloesoe, èn di seti lontoe na ofrandi foe Krestes.—Hebr. 9:28.
2 A de wan boen idea foe meki wan lijst foe den sma di joe sa wani kari kon na a Memrefesa. Poti na ini toe ibriwan sma di e fisiti den konmakandra wanwan leisi èn so srefi toe den sma di fosi ben e studeri noso ben sori belangstelling na wan tra fasi. No frigiti den trowpatna di no de na bribi nanga tra famiriman. Baka te joe meki joe lijst, go doe spesroetoe moeiti foe fisiti ibriwan foe den. Kande joe sa wani foe aksi den owroeman foe asisteri joe te joe e go tjari wan toe foe den fisiti disi.
3 San joe kan taki na a fisiti?
Baka wan waran odi, joe kan taki sani leki disi:
◼ „Ini a ten di pasa joe ben sori taki joe abi belangstelling gi jeje afersi, èn mi ben denki taki joe ben sa warderi a kari disi foe wan spesroetoe sani di sa pasa. [Langa a kari, foe a Memrefesa, di druk tapoe papira, gi na ososma.] A Memrefesa, foe memre a dede foe Krestes, na a wan enkri sani di Masra Jesus Krestes ben gi en foetoeboi na komando foe tan hori dati. Nanga prisiri wi e froewakti foe go loekoe baka san Jesus ben meki kon troe nanga en dede èn fa wi kan kisi têgo libi nanga jepi foe dati. A jari di pasa, moro leki 11 miljoen sma ben fisiti a spesroetoe konmakandra disi. A sa de wan prisiri efoe joe kan de makandra nanga mi tapoe a fesa a jari disi.” Sorgoe taki joe skrifi a joeroe nanga a presi pe joe gemeente sa hori a Memrefesa. Efoe a de fanowdoe, pristeri toe foe sorgoe foe oto go teki den.
4 Te njoen sma e fisiti a Memrefesa, wi moesoe gi den wan switi kon. Jepi den foe den kon sabi den preikiman foe a gemeente èn meki den kon sabi so srefi wan toe sma di abi belangstelling èn di e libi kande krosibei foe na oso foe den. A sa gi den deki-ati foe sabi taki wan toe sma foe den eigi birti abi belangstelling gi waarheid. Efoe a kan, kari den foe sidon nanga joe famiri na a ten te a Memrefesa e hori.
5 A no de foe taki, soso foe fisiti a Memrefesa no sa gi den a djaranti foe kisi froeloesoe. Ma gi foeroe di joe kari a ben sa de a fosi stap foe sori bribi ini Jesus broedoe di lon. Te oen de na pasi foe go na oso, baka a konmakandra, dan aksi a fisitiman efoe a sa wani foe fisiti a Poebliki Taki nanga a Waktitoren studie a tra satra noso sonde. Sori switi fasi èn fiti joe na a sma. Meki a sabi taki joe wani foe jepi en na iniwan fasi di joe kan. O moro esi a bigin foe abi demakandra nanga wi doronomo, o moro esi en go na fesi na jeje fasi sa de. Fa wi sa abi prisiri èn satisfaksi foe pasa „a bigi banawtoe” libilibi, makandra nanga foeroe trawan di wi ben man foe jepi kande!—Openb. 7:9, 14.