Aksi boksoe

◼ San wi ben sa si leki krosi di fiti te wan sma e pristeri ensrefi foe teki dopoe?

Ala di markitiki foe weri krosi de tra fasi ini den difrenti pisi foe grontapoe, a froemane foe bijbel ini a tori foe a weri foe krosi „nanga bescheidenfasi èn gosontoe froestan” e tan a srefi gi ala kresten awansi pe den e libi (1 Tim. 2:9). A gronprakseri disi ben sa gebroiki te wi e loekoe san na a joisti krosi foe weri foe teki dopoe.

A Waktitoren foe 1 juni 1985, bladzijde 30, (Bakratongo) e gi a rai disi na wan sma di o teki dopoe: „Seiker bescheidenfasi de fanowdoe ini a sortoe swen krosi di wi o weri. Disi de prenspari ini a ten disi, foe di sma di e meki modo krosi, wani poti a prakseri foe sma tapoe seks èn foe doro pikinmoro sososkin. Wan tra sani foe poti prakseri na taki sonwan foe den swen krosi sori taki den boen so langa den drei, ma te den nati disi no de so kwetikweti. No wan sma di o teki dopoe sa wani foe de a sma di e poeroe a prakseri foe trawan noso meki trawan naki foetoe na a serjoesoe okasi disi leki foe teki dopoe.​—Filipisma 1:10.”

Akroederi a rai disi, den sma di e teki dopoe sa wani weri bescheiden krosi, ala di den e hori a prenspari fasi foe na okasi disi na prakseri. So boen swen krosi di pikin toemoesi foe weri noso wan di de na wan fasi di no fiti en e plak na a skin foe a sma te a nati, no sa de a fasi fa wan kresten e weri krosi èn den moesoe tan fara gi dati. So srefi toe, a no ben sa fiti foe wan sma no kan en wiwiri noso kon nanga doti krosi. Moro fara, a no ben sa fiti foe sma weri bosroko pe grontapoe sani skrifi na tapoe di wani taki wan sani noso nanga reklame wortoe.

Te den owroeman di kisi a wroko foe loekoe den dopoe aksi baka nanga a sma di wani teki dopoe, disi ben sa de wan joisti ten foe taki foe a prenspari fasi foe a weri foe krosi di fiti. Na a fasi disi a warti fasi foe na okasi sa tan, èn wi sa go doro foe de tra fasi leki fa grontapoe de.​—Teki gersi Johanes 15:19.