’Bigi sani tapoe a kontren foe wroko nanga boen bakapisi’
1 Jehovah na a wrokoman di noiti e misi en marki. A bigi Universum e kotoigi foe den toemoesi bigi wroko di a doe leki Mekiman (Ps. 19:1, 2). Den e prenki En hemel organisâsi foe jeje mekisani—seraf, cherub nanga den engel—leki wan toemoesi moi wagi di santa jeje e tjari na wan moro boen fasi tjari (Esek. 1:4, 20). A Kownoekondre tiri, di abi na ini Jesus Krestes leki „Wondroe Raiman” nanga den 144.000 kompe tiriman foe en foe na Israèl na jeje fasi—wan groepoe di seti na wan balansi fasi, 12.000 foe ibriwan foe den twarfoe lo—so srefi sa doe bigi sani.—Jes. 9:6, NW, Studiebijbel, foetoewortoe; Openb. 7:4.
2 Alaten na organisâsi foe Jehovah na grontapoe ben sori alaten taki a abi koni foe hemel èn e doe sani di e sori taki a no e misi marki. A oema-kownoe foe Skeba ben froewondroe srefisrefi foe a koni di Salomo ben abi foe orga sani (1 Kow. 10:1-10). Jesus ben taki foe ensrefi: „Moro leki Salomo de djaso” (Mat. 12:42). Di a ben de na grontapoe a ben doe bigi sani, foe di a ben wroko na wan orga fasi èn ekonomia fasi. A ben meki wan dorodoro gebroiki foe san ben de foe kisi (Mark. 6:38-44; Joh. 6:12). Ini a ten disi, Jesus gi a tiri na a ’getrow èn koni edeman’-groepoe (Luk. 12:42). Wi no ben sa kan froewakti a srefi boen bakapisi disi ini den seti di a Tiri Skin e seti ini a ten disi?
3 Omoro den memre foe a pipel foe Gado e kon moro foeroe, omoro a de fanowdoe foe fiti sani tapoe a kontren foe na orga wroko, so taki ala sani kan waka na wan boen fasi. Foeroetron den fanowdoe dati de moro bigi na den bijkantoro.
KENKI INI WEST-EUROPA
4 Bigi kenki ben de foe si ini a veld na heri grontapoe. A gro ini Zuid-Amerika èn so srefi ini den Afrikan kondre de toemoesi bigi. Ini foeroe kondre den ben poeroe a verbod tapoe a preikiwroko, èn a no de foe taki dati wi e prakseri Owstoe-Europa toe. A de logis taki wan gro leki disi e aksi foe wi foe fiti sani na a situwâsi. Ondro tiri foe a Tiri Skin den e tjari den sortoe kenki disi kon ini Gado organisâsi. Son wan foe den drukkerij e kon moro bigi èn e bai njoen modoten wrokosani. So Doisrikondre ben meki den sani di e meki a wroko kon makriki, kon moro bigi nanga 150 procent èn den ben poti wan njoen rotasie pers di kan druk 80.000 tijdschrift ini wan joeroe! Disiten, den ben poeroe den grens foe moro foeroe kondre foe Europa èn heri West-Europa go abra na wan seti foe pristeri den boekoe na wan moro makriki fasi.
5 Tapoe gron foe ala den kenki disi, a man taki den e druk den tijdschrift nanga tra materiaal na wan presi. Dati wani taki dati wan toe bijkantoro no sa druk tijdschrift, Kownoekondre Dienst nanga formulier moro. A bijkantoro ini Selters (Doisrikondre), di abi njoen modoten wrokosani, sa teki a wroko disi abra foe Denemarken, Bakrakondre, nanga Switserland. Foe drape den sa sorgoe so srefi gi den boekoe bisteri foe tra kondre. A bijkantoro ini Italiakondre sa go doe a srefi gi Grikikondre.
6 Now, foe di sani e kenki ini Europa, wi sa man tjari foeroe foe den wroko na wan presi foe di den sa doe den na wan toe presi nomo èn disi sa abi leki bakapisi taki wi sa man wini foeroe tapoe a kontren foe wrokoman, presi, ten, wrokosani nanga moni toe. A no sa de fanowdoe foe poti foeroe moni ini njoen wroko sani èn sani di e meki a wroko moro makriki. Disi de troetroe ’bigi sani tapoe a kontren foe wroko nanga boen bakapisi’.
SAN DISI WANI TAKI GI BAKRAKONDRE
7 Sortoe afdeling—so srefi sortoe wrokosani sa komoto foe dati ede foe a bijkantoro foe Bakrakondre? We, na a fosi presi a bigi Rapida-fo-kloroe pèrs èn ’a strati pe den e kaba a wroko’ (a fow-, a nai-, a koti- nanga stapel-masjin) nanga pikinmoro a heri drukkerij pe den e meki pikin boekoe. So srefi a boekoemaksin nanga na afdeling pe den e poti sani klari foe seni gowe, foe di Selters e tron wan centraal maksin gi wan bigi pisi foe Europa. A domroe foe den abonnement nanga jepi foe masjin èn foe seni gowe foe den, sa feni presi so srefi ini Doisrikondre; a kantorowroko foe den abonnement sa tan ini Bakrakondre. Moro fara, den sa poeroe a presi pe sani seti foe koti papira, di ini a ten di pasa sa ben koti 130 ton papira gemiddeld ibri moen foe lolo kon tron vel papira.
8 Den sa meki a nomroe foe Bethelwrokoman di de fanowdoe na a bijkantoro ini Bakrakondre, kon moro mendri; ma, boiti taki den wroko di kari na tapoesei no sa doe moro, a kenki disi foe ensrefi sa abi krakti tapoe a nomroe foe wrokoman na den afdeling so leki a osowroko, koekroe, presi pe den e wasi krosi, krinpresi, ondrow, èn so moro fara. Bigin foe now, den moen di e kon a Bethelfamiri ini Bakrakondre safrisafri sa kon moro pikin, te leki den doro a nomroe foe wrokoman di de fanowdoe.
9 San den sa doe nanga den wrokosani foe den bijkantoro di no sa druk boekoe moro? Ini foeroe kondre, pe den sma e taki difrenti tongo èn pe den tijdschrift abi wan moro pikin nomroe di e kon a doro, den no abi a fo-kloroedruk ete. A Tiri Skin kan gi den brada ini den sortoe kondre dati den masjin di e kon fri foe den kenki ede foe san wi ben skrifi na fesi. Moro foeroe foe den wrokosani ini Bakrakondre, di abi na ini den fo-kloroepers, sa go na Nigeria leki fa a sori. A no e gi wi satisfaksi foe sabi taki den wrokosani disi, di ben kan bai bika foe a bradafasi, foe di den brada nanga sisa ini Bakrakondre ben gi bijdrage nanga den heri ati, ben kan gebroiki fosi wan heri pisi ten foe gi wi jeje njanjan èn taki den abi a grani now foe gi den brada ini Nigeria den pers so taki den man studeri èn pristeri den tijdschrift ini fo-kloroedruk? Komoto foe tra kondre den Filipijn sa kisi den wrokosani gi a fo-kloroedruk. Ibri wan foe den toe kondre disi di kari djaso, èn di abi wan bigi nomroe preikiman, sa kisi dri pers. Ini a tori disi na so fasi toe ’a foeroe foe a wan sa tapoe a mankeri foe a trawan’.—2 Kor. 8:14.
10 Èn fa a de nanga a Bethelfamiri ini Bakarakondre, di sa kon moro pikin? Den ben agri srefisrefi nanga a njoensoe foe den kenki. Alamala e si a tiri foe Jehovah ini den toemoesi boen seti disi. Bijbel e sori taki a hori di wi e horibaka gi den tirilin di a organisâsi foe Jehovah e gi, sa meki taki wi sa abi moro gro èn dati wi sa kon moro foeroe (Tori. 15:31; 16:4, 5). A Tiri Skin de grantangi foe den foeroe getrow Bethelwrokoman èn den warderi ala wroko di den ben doe ini den jari di pasa srefisrefi.
11 Difrenti wrokoman nanga ondrofeni no sa de fanowdoe moro. Den ben taigi a Bethelfamiri taki denwan di wani foe go tan na a bijkantoro ini Nigeria foe go wroko, kan poti den nen gi disi. A srefi sani den ben meki bekènti foe dini na Bethel ini Doisrikondre. Èn denwan di e angri foe kisi wan tra toewijzing ini a foeroeten dienst ini Bakrakondre, kisi na okasi foe tjari disi kon a fesi. Te a de krin dorodoro san na a troetroe fanowdoe ini a Bethel-oso, dan a bijkantorokomte sa gi wan toewijzing na wan taktvol fasi. Ala di sonwan foe den kan go dini ini dorosei kondre, tokoe a pionierwroko ini Bakrakondre sa kisi wan krakti poesoe.
WAN SPAN TEN
12 Wi e libi ini wan span ten, nanga wan lo sani di de fanowdoe foe fiti den na a situwâsi. Difrenti sani ben meki kon moro makriki kaba, èn now prakseri e poti tapoe drukkerij nanga bijkantorowroko afersi. Foeroe winimarki de foe di den e doe son sortoe wroko na wan presi di de centraal. Den moesoe meki difrenti pikin bijkantoro ini Europa kon moro bigi. Disi no abi foe pasa moro. Foe di den wrokosani foe den e gebroiki na wan tra presi, meki den kondre dati no abi foe bai njoen masjin. Foe di den tjari a wroko kon na wan presi meki a srefi wroko e doe nanga moro betre wrokosani èn moro mendri sma.
13 Wan toe moen a fesi bifo den kenki foe Europa ben meki definitief bekènti, den ben seni den bakapisi foe a studie foe loekoe efoe den kan meki a bijkantoro ini Bakarakondre kon moro bigi noso seti sani njoen baka go na a edekantoro. Ala di na a ten dati disi ben skrifi wi ben e wakti ete tapoe wan spesroetoe piki, a gersi taki te wi loekoe den bodoi di wi ben kisi a fesi, Bethel sa tan ini Emmen. Wi e go miti wan druk ten. A abra go na wan njoen situwâsi e aksi foeroe sorgoe. Den moesoe loesoe den wrokosani foe den presi, domroe den èn seni den gowe nanga boto. A wan baka trawan den sa tjari a heri boekoe maksin go na Doisrikondre. Den sa moesoe fiti den wroko di moesoe doe èn den Bethelwrokoman sa kisi tra toewijzing gi foe a foeroeten dienst. Te foe kaba den sa poeroe den tanpresi di den ben meki foe tan wan pisi ten nomo èn den sa go loekoe fa den sa fiti den difrenti wrokopresi na a fanowdoe foe a bijkankantoro foe a ten di e kon.
14 Ini a pisi ten dati, ala tra wroko sa go gewoon doro. Disi no wani taki soso a sorgoe foe a veld, den gemeente, den bigi konmakandra èn so moro fara, ma so srefi a meki foe den foeroe bisteri gi den difrenti bijkantoro, bisteri di e difrenti foe drukpers te kon miti srefi anoewrokosani, spesroetoe gi kondre di no kan kisi den sani disi makriki ini den eigi kondre. Boiti dati, na afdeling foe meki video de ete; ini ten di pasa wan toe hondro doesoendoesoen videocassette ben seni go na difrenti kondre èn disi sa de so toe ini a ten di e kon. Ala di wi e leisi na inlegvel disi èn den e taki foe en, ini a geluidstudio foe Bakrakondre den e meki opname foe den sten di e froeteri sani na a njoen videocassette, di kon na doro kaba ini Ingrisitongo èn di abi leki titel The Bible—Accurate History, Reliable Prophecy. Na a kaba foe juni, den sa kaba meki opname ini erfoe tongo, pe so srefi Japantongo, Koreantongo nanga Mandarijn-Sneisitongo de na ini.
MORO BLESI INI A TEN DI E KON
15 Jehovah e tan doe bigi sani. A gro ini a veld na heri grontapoe e naki sma ati. Den 364.000 preikiman ini Meksikow e hori 520.000 bijbelstudie! No so langa pasa Kambodja nanga Slowakia ben kan poti tapoe a lijst foe kondre pe lanti ben erken a wroko foe wi. Èn ini Bakrakondre den ben doro wan heimarki foe 12.244 bijbelstudie ini a moen maart, wan heimarki di noiti ete den ben doro, ala di tapoe 6 april 54.400 sma ben fisiti a Memrefesa! Ini Sranan wi ben abi 5391 sma na a Memrefesa. Ija, srefi ini Sranan foeroe wroko de foe doe—hondrohondro sma di abi belangstelling moesoe kisi jepi foe moksi densrefi nanga Jehovah organisâsi.
16 Wi e kisi kowroe-ati dorodoro foe den blesi di Jehovah e gi en pipel. Foe eksempre, wan toemoesi moi programa sreka gi a „Leri foe Gado”-distriktkongres. Zendeling di komoto foe difrenti kondre sa meki a programa moro moi nanga den moi ondrofenitori nanga den komentaar foe den di warti srefisrefi. Ala den toe drama sa naki wi ati èn sa jepi papa nanga mama so boen leki den pikin foe dini Jehovah dorodoro. Den moen di e kon, boen srefisrefi foe go ini a pionierdienst. Jehovah e doe bigi sani tapoe kontren foe wroko sondro foe joe misi joe marki—now èn moro ete ini a njoen seti foe sani di e kon. Meki a de so taki wi alamala e waka na baka wi lobi hemel Tata, foe di wi e sori ini wi eigi diniwroko taki wi e doe disi nanga boen bakapisi, foe te foe kaba wi kan gi grani na en nen èn foe makandra nanga ala sma di sa wani arki ete na wi, njanboen foe den toemoesi moi blesi foe têgo libi tapoe wan paradijs grontapoe.—1 Tim. 4:13-16; 2 Tim. 4:5.
„Disi toe ben komoto foe Jehovah foe den feti legre srefi, di ben de froewondroe ini rai di a ben gi, di ben doe bigi sani tapoe a kontren foe wroko nanga boen bakapisi.”—Jes. 28:29.