O boen a de foe taki foe san Jehovah doe!
1 A skrifiman di ben skrifi Psalm 48 nanga jepi foe a santa jeje, ben gi den sma ini Israel deki-ati foe ’waka lontoe Sion, teri en toren, èn poti ai tapoe den toren pe den e tan, so taki den man froeteri en baka na a gesrakti di o kon’. Foe di den ben abi lobi gi Jehovah, den ben o abi foeroe belangstelling gi ibri pisi foe a centrum dati foe a theokrasia tiri na grontapoe. O warti den finifini tori disi ben o de, foe di disi ben de a foto tapoe san Jehovah ben poti en eigi nen! Den ben o taki foe dati, èn spesroetoe den ben moesoe foe de seiker taki den bakapikin foe den ben moesoe jere foe ala den sani di den ben poti leki goedoe ini den eigi ati. — Ps. 48:12, 13.
2 Wi e libi now ini a ten di a theokrasia tiri foe Jehovah en Mesias, no de moro na a Sion foe grontapoe leki a centrum, ma ini a Jerusalem foe hemel (Heb. 12:22). A Kownoekondre foe Jehovah ini den anoe foe Jesus Krestes bigin tiri sensi 1914 (Openb. 12:10). Den wroko foe en de toemoesi prenspari gi wi. Wi abi troetroe belangstelling toe gi a fasi fa Jehovah ben tiri den foetoeboi foe en na grontapoe, so taki den ben man doe en wani leki sma di, na skin fasi, e teki presi gi a kownoekondre dati. Finifini tori di abi foe doe nanga disi èn di e hori wi prakseri, skrifi ini wi njoen boekoe Jehovah Kotoigi — Preikiman foe Gado Kownoekondre (Bakratongo). O breiti wi ben de foe kisi en na wi „Leri foe Gado”-distriktkongres!
3 Tapoe 1 september, a boekoe ben kon na doro kaba ini 20 tongo, èn den ben de foe poti en ini ete 13 tra tongo èn tjari en kon na doro. Joe osofamiri ben kisi wan? Joe e leisi en? Joe e taki foe den sani di joe leri foe en?
4 Baka di den brada nanga sisa ben loekoe den prenki èn leisi den edepenti, so leki fa a ben gi leki rai tapoe a kongres, dan foeroe foe den esi-esi go leisi a boekoe srefi. Sortoe komentaar den ben gi? Djaso joe abi wan toe nomo.
5 Wan sisa ben skrifi: „Na a wan-enkri boekoe di oiti mi ben kisi, di pikinmoro mi no kan wakti foe leisi en te na a kaba, so taki mi kan leisi en ete wan tron. Mi doro kapitel 25 now. Omoro mi e leisi, omoro mi ai e lon watra èn o moro mi ati e lai nanga lobi gi Jehovah. A boekoe e gi so foeroe deki-ati èn a e tranga bribi.”
6 Wan brada di e dini Jehovah moro leki 40 jari kaba ben taki: „Mi no ben sabi srefisrefi taki a boekoe disi ben o de so span. Mi ben tan wiki lati èn ben opo froekoe èn ben kaba a boekoe ini toe wiki. A de troetroe wan foe den boekoe di e boeweigi sma moro leki tra boekoe di mi ben leisi oiti. A de wan toemoesi moi sani foe ondrosoekoe ma srefi foe gi deki-ati.”
7 Wan programa foe leisi doronomo: Son wan di leisi a heri boekoe esi-esi ben teki a bosroiti foe leisi en ete wan tron, ma disi tron moro safrisafri.
8 Efoe moro leki wan memre foe joe osofamiri de ini a waarheid, kande joe sa wani foe gebroiki pisi foe a boekoe na joe osofamiri-studie. Son osofamiri ben bigin foe doe dati wan toe dei baka di den kisi wan boekoe na a kongres. Disi no wani taki dati tra sani leki sreka gi a Waktitoren-studie moesoe poti na wan sei. Ma joe sa feni en wan toemoesi boen sani foe gebroiki 15 noso 20 miniti moro foe leisi èn taki makandra foe a Preikiman-boekoe.
9 Tra osofamiri e leisi toe noso dri bladzijde — kande wan noso toe ondrotitel — ibri neti baka den kaba njan den neti njanjan na tafra. Ibriwan foe den srefi kande leisi moro foeroe foe a boekoe kaba, ma den e njanboen foe leisi en safrisafri nanga na okasi foe taki makandra foe a materiaal. Son wan di e doe disi e dini Jehovah foeroe jari kaba. Te den e leisi, dan foeroe foe den e feni taki owroe prakseri e kon na doro. A e waran den ati te den e taki makandra foe den sani di pasa èn di densrefi ben abi wan prati na ini èn di den e leisi.
10 Foe den situwâsi ini joe oso ede, joe sa feni en moro boen kande foe leisi joe wawan. Wan sisa di ben skrifi go na a Genootschap ben taki: „Mi e leisi a boekoe disi pikinso pikinso ibri neti bifo mi e go sribi. A boekoe disi e bow ini mi wan dipi warderi èn lobi gi a waarheid, èn mi e firi mi moro krosibei foe Jehovah èn mi de so tangi taki mi de wan pisi foe en organisâsi. Ibri bladzijde di mi e leisi switi srefisrefi gi mi.”
11 Ala di a boekoe bigi, den aparti pisi foe en no bigi. Ini a bigin pisi den e taki sjatoe, ma tapoe wan fasi di e hori joe prakseri, foe den sani di pasa foe den dei foe Abel te go miti a jari 1922 — ini 108 bladzijde nomo. Den tra pisi abi no mendri leki 13, èn no moro leki 150 bladzijde. Ibri foe den pisi disi prati ini wan nomroe kapitel. Na presi foe leisi den esi-esi, teki wan pisi, wan kapitel, noso wan ondrotitel wan baka trawan; njanboen foe en èn abi wini foe en.
12 Teki ten foe prakseri foe san joe leisi: San o de joe marki te joe e leisi? Soso foe leisi den bladzijde nomo — foe klari a boekoe — no moesoe de joe marki. A Preikiman-boekoe abi wan verslag foe sani na jeje fasi di joe kisi. Joe moesoe foe sabi en boen. Teki ten foe prakseri san den sani di joe leisi wani taki. Te joe e loekoe den sani baka di den fosi kotoigi foe Jehovah ben doe, go prakseri dan fa joe kan waka baka den bribi (Heb. 12:1, 2). Te joe e leisi fa a bigi fadon komoto na bribi ben gro, dan poti spesroetoe prakseri tapoe den trapoe di ben kisi den wan di ben drai den baka, nanga a marki foe kibri joe eigi jeje fasi foe denki. Èn te joe e loekoe a disiten historia foe wi, dan poti prakseri tapoe den jeje eigifasi foe den wan di Gado ben gebroiki, fa den ben sori taki a doe foe a wani foe Gado ben de a moro prenspari sani ini den libi, èn fa den ben handri ini situwâsi — wan toe foe den ben moeilek srefisrefi — di Gado ben gi pasi foe pasa. — Heb. 13:7.
13 Joe sa si taki a e tranga a bribi foe kon sabi den finifini tori di e sori fa Jehovah ben tiri en pipel foe kon sabi a bijbel waarheid finifini, di wi e njanboen foe den now. Joe warderi gi den seti di Jehovah e gebroiki èn di wi man si, sa gro te joe e kon moro bekènti nanga a gro foe na organisâsi. Joe sa firi joesrefi switi troetroe te joe e leisi fa, leki wan kontroe foe profeititori, a boen njoensoe ben doro a moro fara pisi foe grontapoe. Joe ati sa waran foe den ondrofenitori foe den getrow wan na heri grontapoe di ben wroko nanga faja foe meki a Kownoekondre bekènti. Joe sa kisi tranga foe man kakafoetoe gi persoonlijk tesi, te joe e leisi san getrow brada nanga sisa ben miti kaba èn di den ben horidoro na ondroi, foe di den abi lobi gi Jehovah.
14 Baka te joe leisi wan pisi foe a materiaal, dan teki ten foe taki makandra foe a waarde foe en, èn loekoe den finifini tori foe en baka. Efoe joe abi jongoe pikin, meki den abi wan prati toe èn froeklari den prenki, èn meki den taigi joe san den sabi foe den sma di sori ini a boekoe. Srefi te joe wawan e leisi, doe moeiti foe prati san joe leri nanga trawan. Efoe a e fiti, gebroiki a materiaal na den gobaka èn te joe e hori oso-bijbelstudie. Foe di joe e taki foeroetron foe en, meki a sa tan fasi ini joe eigi froestan nanga ati, èn trawan sa njanboen foe en toe.
15 Poti belangstelling ini den finifini tori: A ten di joe e gi foe leisi a Preikiman-boekoe, moesoe de wan prisiri sani èn wan boen sani gi joe.
16 Joe ben sa wani foe meki joe famiri go fisiti na ede-kantoro foe Jehovah Kotoigi? Bladzijde 208-209 e sori den wrokosani di a Genootschap ben gebroiki wan jarihondro pasa ini a kontren foe Pittsburgh. Bladzijde 216-217 sa meki joe kon bekènti nanga den oso di den ben gebroiki baka ten ini Brooklyn. Den prenki tapoe bladzijde 352-356 kan jepi joe foe si fa den ede-kantoro na heri grontapoe de ini a ten disi. Kapitel 26 nanga 27 e gi moro finifini tori foe a wroko di e doe na Bethel, èn bladzijde 295-298 e gi moro bodoi foe a Bethel-libi.
17 Foeroe foe wi no man fisiti foeroe foe den bijkantoro foe a Genootschap. Bladzijde 357-401 foe a Preikiman-boekoe e tjari joe go na wan rèis na heri grontapoe. A no de fanowdoe foe pasa en esi-esi. Gebroiki pikinso ten ini ibri kondre èn njanboen foe en. Gebroiki a karta foe grontapoe tapoe bladzijde 415-417 foe sabi pe ibri foe den presi de. Leisi den komentaar di de nanga ibri bijkantoro prenki. Nanga jepi foe na index joe kan feni tra bodoi toe di e hori joe prakseri, di e taki foe ibriwan foe den kondre. Gebroiki na okasi disi foe kon sabi membre foe joe famiri na jeje fasi ini tra kondre.
18 Te sma abi wan switi demakandra, dan sontron den e plèi wan sani di abi foe doe nanga sabi foe grontapoe afersi. A no ben sa de moro boen dan, foe kon sabi den prenspari dei nanga sani di pasa ini a disiten historia foe a pipel foe Jehovah? Joe sa feni foeroe foe den troe tori disi, di skrifi tapoe wan lijst tapoe bladzijde 718-723 foe a Preikiman-boekoe. A lijst dati e gi den prenspari sani di pasa; boiti dati joe kan poti den finifini tori di joe e feni ini den tra pisi foe a boekoe. Gebroiki den disi leki wan fondamenti foe loekoe a boekoe baka. Jongoewan ini a famiri sa memre den kande heri-esi. Sonwan foe wi di de moro owroe, kande de moro slow. Ma disi na den finifini tori foe a theokrasia historia di wi alamala kan njanboen foe sabi den. Baka te joe leri den dei nanga den gron troe tori, dan go doro na tapoe a fondamenti dati. Loekoe omeni finifini tori joe kan memre di abi foe doe nanga ibri sani di pasa. Baka dati, taki sortoe prati ibri sani di ben pasa, ben abi ini a doe foe a wani foe Gado. Baka dati, taki makandra fa a ben abi krakti tapoe joe eigi libi èn fa joe e fiti ini san Jehovah e doe.
19 Loekoe den okasi di opo gi joe: Te joe e leisi èn taki makandra foe Jehovah Kotoigi — Preikiman foe Gado Kownoekondre, joe sa si fa a bigi kontroe foe Jesaja 60:22 sa kon krin gi joe. A boekoe e taki tapoe bladzijde 519: „A kontroe foe a pramisi taki ’a pikinwan sa tron wan doesoen’ ben pasa troetroe, èn pasa marki! Ini iniwan foe den moro leki 50 kondre, pe srefi a ’pikinwan’ no ben de — pe nowan Jehovah Kotoigi ben de ini 1919, pe a preikiwroko no ben doe srefisrefi — disiten moro leki wan doesoen sma de di e prèise Jehovah. Ini sonwan foe den kondre disi, now tin doesoen tron tin doesoen, ija, srefi moro leki wan hondro doesoen de foe den Jehovah Kotoigi di de fajafaja preikiman foe a Kownoekondre foe Gado! Na heri grontapoe, Jehovah Kotoigi tron ’wan makti nâsi’ — moro bigi ini nomroe, leki wan gemeente na heri grontapoe di tjari kon na wán, leki na aparti groepoe sma foe iniwan foe den no moro mendri leki 80 nâsi di e tiri densrefi na a heri grontapoe.”
20 A gro di a Kownoekondre-wroko e gro no kon na en kaba kwetikweti. Na a tra sei, Jehovah e meki a go so esi na fesi, na wan fasi di noiti ete wi ben sabi na fesi. O bigi a prati foe joe sa de na ini en? Joe sabi troetroe ala den okasi di opo gi joe? Ala di joe e leri san trawan e doe, meki joe ati boeweigi joe foe gi joesrefi foe abi wan doronomo prati ini a bigi wroko di wi lobi Gado e tiri nanga jepi foe Jesus Krestes, ini wi ten.