Velddienst konmakandra, di wani taki wan sani
1 Na Lukas 10:1-11, wi abi wan verslag foe wan konmakandra di Jesus ben hori nanga den 70 njoen disipel di a ben poti na wroko, foe jepi den foe sreka gi velddienst. A ben gi den spesroetoe rai foe jepi orga densrefi, sreka den foe den kan sabi san foe taki, èn foe handri moeilek situwâsi. Wi kan leri foe di wi e ondrosoekoe a tori disi.
2 A de krin taki ala den 70 disipel ben de na a konmakandra nanga Jesus. Wi e lasi foeroe ten na den velddienst konmakandra, te son sma gwenti foe kon lati. Foe di den e kon lati, meki foeroetron a de fanowdoe foe orga den groepoe sma baka, di e go nanga wagi èn gebied pe den o wroko. Disi e meki taki foeroetron a heri groepoe e gowe lati. Wi alamala kan doe san wi moesoe doe, foe di wi e kon biten èn foe di wi de klariklari foe go na a gebied wantewante.
3 Jesus ben gi a groepoe wan spesroetoe tori foe takimakandra foe gebroiki, namkoe, „a kownoekondre foe Gado” (Lukas 10:9). Wi kisi a toewijzing foe preiki a srefi boskopoe, èn foeroetron wi e warderi wan toe rai di kan jepi wi foe sabi san wi moesoe taki. A sma di e hori a velddienst konmakandra, kan sori go tapoe a Taki-go-taki-kon-boekoe, di e gi moro leki 40 difrenti inleiding nanga bijbeltekst, di wi kan gebroiki ini foeroe difrenti situwâsi. Wan sjatoe loekoe baka foe wán noso toe pristeri, kan jepi wi, foe hori na prakseri san wi kan taki, èn a e meki dati wi kan taki nanga moro overtoigi na den doro.
4 Jesus no ben taigi den disipel foe en san den ben moesoe foe taki wawan, ma a ben taigi den fa den ben kan taki en (Lukas 10:5, 6). Demonstrâsi di ben gi tapoe a Diniwroko-konmakandra, e sori wi fa wi kan taki tapoe wan moro boen fasi. A sma di e hori a velddienst konmakandra, kan loekoe baka san ben pristeri na a lasti Diniwroko-konmakandra èn a kan gi rai fa foe gebroiki dati ini a diniwroko na a dei dati. Wan sjatoe demonstrâsi di sreka na fesi, di e go foe wan makriki pristeri foe bijbeltekst, kan jepi wi foe tjari den prakseri foe wi kon na wan, èn poti den na ini wortoe.
5 Jesus ben taigi den disipel foe en toe, a fasi fa den ben moesoe tjari densrefi (Lukas 10:7, 8). Sosrefi a sma di e hori a velddienst konmakandra, kan gi wi spesroetoe rai foe jepi wi foe wai pasi gi sani, di ben kan poeroe wi prakseri foe a wroko foe wi. A kan warskow wi foe no de makandra na tapoe den oekoe foe strati noso foe no lasi ten nanga sma di e hari-taki. A kan memre wi foe hori wi soifri na a oso-foe-oso raport. A kan, taki a de fanowdoe foe memre papa nanga mama foe loekoe den pikin foe den boen.
6 Den 70 disipel ben wroko makandra nanga den sani di Jesus ben taigi den foe doe èn baka dati den „ben drai kon baka nanga prisiri” (Lukas 10:17). Efoe wi e handri ini akroederi nanga den rai di wi e kisi na den velddienst konmakandra, dan wisrefi kan froewakti moro prisiri ini a preiki di wi e preiki a Kownoekondre boskopoe. — Tori 13:48, 49, 52.