Sabi den brada foe joe boen
1 A matifasi foe wi nanga kompe anbegiman wani taki moro leki soso fisiti den konmakandra nanga den, na ini a Kownoekondrezaal. Wi na sma di e doe a wani foe Gado, èn dati e tjari wi na ini wan matifasi na jeje fasi nanga Jesus (Mark. 3:34, 35). Dati, foe en sei, e tjari wi na ini wan famiri matifasi na jeje fasi nanga trawan ini a kresten gemeente, wi brada nanga sisa na jeje fasi, di wi moesoe foe lobi, so leki fa wi kisi a komando foe doe dati (Joh. 13:35). So boen, den wan di de makandra nanga den „memre foe na osofamiri foe Gado”, moesoe meki moeiti foe kon sabi makandra heri boen. — Ef. 2:19.
2 Sabi a nen foe den brada foe joe: Joe sabi ala den nen foe den brada nanga sisa foe joe Gemeente Boekoestudie? Foeroetron a groepoe pikin, èn dati e meki en moro makriki foe kon sabi den nen foe foeroe foe den, noso srefi foe alamala, di e fisiti a konmakandra. Joe kan taki dati joe sabi den boen, te joe no sabi den nen foe den srefi?
3 Fa a de nanga a kon sabi foe trawan, srefi pikin-nengre, di e fisiti den konmakandra na a Kownoekondrezaal? Wi kan abi a gwenti foe de makandra nanga wan pikin groepoe foe mati nomo. Ala di a no fowtoe foe de makandra nanga spesroetoe sma doronomo, tokoe wi no ben sa wani hori den switi odi nanga takimakandra di e bow sma, gi wan pikin groepoe nomo. Wi moesoe „opo wi ati bradi”, èn doe moeiti foe kon sabi ala den brada nanga sisa foe wi boen (2 Kor. 6:11-13). Dati seiker sa wani taki foe kon sabi a nen foe den.
4 Den brada di e hori den gemeente konmakandra moesoe proeberi foe kon sabi den nen foe alamala di e fisiti a konmakandra. Te joe de tapoe a podium èn joe e kari a nen foe ibri sma, dan dati sa meki den firi taki wi e warderi den komentaar foe den, èn na a srefi momenti, a e jepi trawan foe kon sabi den nen. A no de foe taki, dati ala ten wan toe moro njoen sma noso fisitiman sa de na mindri a poebliki, èn dati sa meki en moeilek gi iniwan sma foe sabi ala den nen. Ma tokoe, a meki di joe e meki opregti moeiti doronomo, na wan sani di e gi trawan deki-ati èn a e sori taki joe abi troetroe persoonlijk belangstelling. — Rom. 1:11, 12.
5 Joe moesoe de a fosi wan di wani kon sabi trawan boen: Opziener di e rèis, foeroetron kan kon sabi foeroe brada nanga sisa boen. Fa den e doe dati? Tapoe dri prenspari fasi: (1) Tapoe fasti ten den e wroko nanga den ini a velddienst; (2) efoe den abi na okasi, dan den e teki a kari di den e kisi foe fisiti den brada na den oso; èn (3) den de a fosi wan foe taki bigisma nanga pikin-nengre odi na den konmakandra.
6 Joe kan si fasi foe opo joe ati bradi gi den kompe foe joe èn foe kon sabi den brada foe joe moro boen? Seiker wi kan gi trawan wan kari foe wroko nanga wi ini a preikiwroko. Tra fasi foe kon sabi trawan heri boen na te wi e go oso foe oso, e tjari gobaka, e go na den bijbelstudie, noso te wi e doe strati kotoigiwroko nanga den tijdschrift. A de wan boen sani toe, foe kari trawan foe fisiti joe na joe oso, kande foe di oenoe sa njan makandra noso oenoe sa njan wan toe lekti sani, te na okasi de. Te joe de a fosi wan foe waka miti njoen wan noso den wan di gersi leki den e sjen, dan a no sa bow den na jeje fasi nomo, ma a sa gi boen pai toe. — Tori. 20:35; 1 Tes. 5:11.
7 Paulus ben sabi den brada foe en boen. A kari di a ben kari foeroe foe den na den nen ini den brifi foe en, ben sori taki a ben abi belangstelling na wan fasi foe no denki ensrefi nomo èn a ben abi troetroe lobi gi den (1 Tes. 2:17; 2 Tim. 4:19, 20). A moeiti di wi e meki foe kon sabi den brada foe wi boen, sa wani taki blesi gi wi alamala.