Tan abi wan positief fasi foe si sani
1 Fa a e naki wi ati, te wi e leisi foe den toemoesi moi gro di e feni presi na ini foeroe kondre! Tokoe, wi sabi taki ini son presi Kownoekondre preikiman foeroetron e toeka nanga a wani di sma no wani arki wi, a abi di den no abi trobi nanga wi, noso srefi a gens di den e gens wi langalanga na ini wi preikiwroko. Fa wi kan tan abi wan positief fasi foe si sani, efoe disi na san wi e toeka nanga na ini wi kontren? Fa wi kan sorgoe taki wi no kisi wan negatief fasi foe si sani, di ben sa teki wi prisiri noso kowroe a faja di wi abi gi a wroko foe meki disipel?
2 Wan positief fasi foe si sani sa jepi wi foe tan hori wi balansi. Srefi te moeilek situwâsi de, dan wi no moesoe meki negatief prakseri basi a fasi fa wi e si sani. Jesus ben gi wi a volmaakti eksempre. Efoe joe teki en gersi nanga den foeroe sma di ben de, dan pikinso sma nomo ben bribi den sani di Jesus ben leri den. Foeroe sma ben naki foetoe fadon na tapoe den leri foe en. Jesus ben abi foe doe nanga situwâsi di ben tesi a hori di a ben hori doro, srefisrefi. Relisi fesiman ben abi kritiek tapoe a wroko foe en èn den ben span anoe makandra foe kiri en. Den ben spiti tapoe en, den ben naki en, den ben spotoe nanga en, de ben fon en èn te foe kaba den kiri en. Tokoe, a ben abi prisiri ini a wroko di a ben doe. Foe san ede? A ben erken o prenspari a de foe doe a wani foe Gado, èn a no ben tapoe nanga dati. — Joh. 4:34; 13:17; Heb. 12:2.
3 Tan abi wan joisti loekoe tapoe wi diniwroko: Foe doe disi, dan wi moesoe hori difrenti sani na prakseri. Memre taki wi abi wan boskopoe di moro foeroe sma no wani sabi noso den e gens a boskopoe (Mat. 13:14, 15). Ala di den apostel ben kisi spesroetoe ordroe foe tapoe foe leri sma tapoe gron foe Jesus en nen, tokoe den ben tan getrow na a komando di den ben kisi foe preiki, èn a kotiten ben go nanga langa (Tori. 5:28, 29; 6:7). Na fesi kaba, wi sabi taki na son presi, efoe joe e teki en gersi nanga den sma di e libi drape, dan pikinso sma nomo sa arki (Mat. 7:14). Foe dati ede, wi abi reide foe prisiri te wán sma nomo ini a kontren foe wi, e arki. Memre toe, taki srefi den sma di e gens wi, moesoe kisi na okasi foe jere (Esek. 33:8). Te foe kaba, son gensman e kenki èn den e tron sma di e anbegi Jehovah. Te joe loekoe en boen, dan wi diniwroko e gi wi a firi taki wi e doe wan sani, srefi te pikinso sma nomo e arki. A de di wi de na den doro nanga a boskopoe foe Gado Kownoekondre, na wan kotoigi kaba. — Esek. 2:4, 5.
4 Wi abi boen reide foe loekoe sani na wan positief fasi. A gro di a wroko e gro na heri grontapoe èn den boeweisi di e kon moro foeroe, di e sori taki a bigi banawtoe de krosibei, moesoe troesoe wi alamala foe doe ala san wi man, foe dini nanga a gi di wi e gi wisrefi ini a dini foe Gado (2 Petr. 3:11, 14). Wroko fajafaja ini augustus ben sa de wan moi fasi foe sori a warderi di wi abi gi san wi leri. Wi wani toe, taki den njoen wan di moksi densrefi nanga wi, moesoe sori wan positief fasi foe si den sani di den ben leri èn di den sa gebroiki. Te son wan foe wi bijbelstudenti go na fesi èn den doro a momenti foe tron wan preikiman di no dopoe, dan a moen augustus kan de wan toemoesi moi ten foe meki den bigin nanga dati.
5 Efoe wi e dini leki preikiman noso leki pionier, wi alamala sa kisi jepi te wi e hori na prakseri taki san Jehovah e aksi foe wi, no de wan hebi sani (1 Joh. 5:3). A e pramisi foe hori baka gi wi (Heb. 13:5b, 6). Ala di sma no wani arki wi, no abi trobi nanga wi, noso e gens wi, tokoe wi moesoe de positief èn wi moesoe tan preiki bika a de a wani foe Gado dati wi e doe so. — 1 Tim. 2:3, 4.