Pristeri na boen njoensoe — Nanga wan positief fasi foe taki nanga sma
1 Wan positief jejefasi o doe foeroe foe meki wan kolokoe diniwroko nanga froktoe doe kon. Te wi e préki a boen njoensoe, efoe a de now oso na oso, ofoe na wan tra fasi, dan wi moe doe en so nanga na froewakti toe abi winimarki. Wi sa moe waka go taki nanga wan sma nanga na prakseri dati a de wan skapoe na ini en ati ofoe sa arki na a kownoekondre boskopoe tenminste. Di Jezus ben seni en discipel kon na doro, a ben gi a rai disi: „Te joe go na iniwan oso foe taki fosi, ’dati na oso disi mag abi vréde’” (Luk. 10:5, 6). Den no ben moesoe kroetoe a fesi efoe wan „mati foe vréde” ben de na ini na oso ofoe no ben de. A ben de wan positief fasi foe taki nanga sma! Fa wi kan sori so wan positief jejefasi na ini a velddienst?
TAKI NANGA OVERTOIGI
2 Wan fasi de foe taki na waarheid nanga overtoigi. Wi e préki no soso wan tra relisie, ma na waarheid di e tjari sma go na libi! Wi sabi san a ten di o kon e tjari kon. Wi sabi den réde foe na disiten dilema foe libisma èn san reti ati sma moe doe foe leri na libi. Na overtoigi disi sa jepi wi foe taki leki den apostel, di na taki foe den sondro frede den féjanti foe den ben herken. Teki a ini prakseri Tori foe den Apostel 4:13 pe e taki: „Di den ben si na fasi fa Petrus nanga Johannes ben taki fri, èn den ben bigin foe herken den leki sma di ben gwenti foe de nanga Jezus.”
3 Son prékiman kan firi taki den no de bekwaam foe préki na boen njoensoe. Den kan denki dati noiti den sa kon doe na wroko boen èn tron prékiman nanga ondrofeni. Den kan si na meki foe go-baka ofoe na hori foe bijbelstudie leki wan sani di de dorosé foe den koni foe den. Ma, sowan negatief denki de kontra a meki foe froktoe. Loekoe fa Jehovah ben poti na denki foe Jeremia kon leti èn ben gi en tranga (Jer. 1:7). Soboen leki wan positief fasi foe go taki nanga sma na, ini na prékiwroko, waka na baka den proféti nanga den apostel, èn joe toe kan doe en moro boen na ini na meki bekenti foe na boen njoensoe.
4 Na fasi foe wi foe taki abi foeroe foe doe nanga na doro foe na ati foe den sma di e arki. Negatief wortoe e meki negatief piki kon èn na so fasi den no e doro na ati foe sma ofoe den gi en réde foe doe wan sani. Wi sa kisi moro boen bakapisi nanga moro positief wortoe leki: „Mi de séker dati joe e si na waarde foe leri moro foe na bijbel”. Ofoe: „Mi ben sa wani foe libi na boekoe disi na joe. A de wan toemsi boen bijbelstudie jepi èn a sa de séker foe bigi waarde gi joe nanga joe osofamiri.”
POTI KRAKTI NA TAPOE POSITIEF BODOI
5 Foeroetron wi e gi kommentaar na tapoe problema foe na grontapoe. Ma gewoonlek a moro boen foe kanti abra go na a loesoe di Gado, e gi èn ferteri foe den blesi di sa kon na ini na presi foe den moeilekheid di wi e si na ini disiten. Foe eksempre na titel foe na boekoe di wi moe pristeri a moen disi Joe kan libi foe tégo na ini wan paradijs na grontapoe. A de foe troe wan positief titel! Den tekst foe Tori foe Takmakandra ooktoe e gi wan positief loekoe: „Tégo libi na wan sani di kan” èn „Joe kan bribi na bijbel”. Nanga den sortoe ferklari disi na pristeri foe na boen njoensoe sa kisi wan gron foe boen ferwakti. Efoe a ten e gi pasi, wi kan lési paragraaf 14 na bladzijde 14 te wi e pristeri a Tégo libi-boekoe a moen disi. A sa jepi wi positief fasi foe taki nanga sma. Na a srefi fasi a de, te wi e pristeri den tijdschrift, wi sa soekoe ini na positief ferklari di sa jepi na sma na a doro foe si dati wi boskopoe de troetroe boen njoensoe.
6 A pristeri foe na boen njoensoe nanga wan positief fasi sa tjari ooktoe persoonlek winimarki kon. A sa meki a prisiri foe wi na ini na velddienst kon moro foeroe. Wi sa si ibriwan sma leki wan sma di kan tron wan bijbelstudenti, wan sma di abi na waarheid fanowdoe. Wi no sa lasi ati te sma no e teki na boskopoe boen ofoe te den e taki na wan fasi di no de switi. Fa a de wan blesi foe abi wan joisti sabi foe na waarheid di kan meki wan sma kon fri. Wi wani pristeri en séker na ini wan positief fasi.