Wi E Preiki Bun Nyunsu
1 ¡Wi abi wan tumusi moi grani fu di wi de tyariman fu „bun nyunsu fu bun sani!” (Rom. 10:15) Wi abi wan boskopu di e gi kowru-ati èn wi wani prati dati nanga sma di de na mindri bruya èn di firi lasi-ati. Fa wi kan yepi den fu kon si taki wi wani gi den „bun nyunsu fu wan moro bun sani”?—Yes. 52:7.
2 Sreka wan Boskopu Di E Gi Frutrow: A taki di wi e taki nanga sma na ini a diniwroko sa abi bun bakapisi te wi e poti prakseri na sani di e bow sma. Fu dati ede, te wi e sreka a pristeri fu wi èn e luku a publikâsi di wi sa gi sma, dan wi musu tyari positief penti fu a boskopu kon na krin. Efu wi e prati a howpu fu wi di gron tapu Bijbel nanga frutrow èn nanga faya, dan wi kan fruwakti bakapisi di sa gi wi deki-ati.—Odo 25:11.
3 Ala di wi e firi sari gi sma te den e fruteri wi fa situwâsi na grontapu di e kon moro takru ben abi krakti na den tapu, toku wi musu sori den san na a trutru lusu gi den problema fu libisma, a Kownukondre fu Gado. Srefi te wi e taki fu a dei fu Yehovah di e kon, a „dei fu teki refensi’, toku wi wani sori sma fa disi na trutru „bun nyunsu gi den safri-ati sma” (Yes. 61:1, 2). Wi kan gi den arkiman fu wi a dyaranti taki ala san Yehovah e du, te fu kaba sa tyari a moro bigi koloku kon èn sa abi a moro bun bakapisi.
4 Pristeri a Waarheid Nanga Trutru Prisiri: Te sma e si taki wi de nanga prisiri èn taki wi e sori nanga wi sten dati wi sabi san wi e taki, dan den sa wani arki moro. Efu wi de positief, dan den sma di e arki wi sa si taki wi e „prisiri na ini a howpu”(Rom. 12:12). Kande den sa angri moro fu wani du wan sani na tapu a bun nyunsu. Fu tru, wi abi ala reide fu sori wan positief, prisiri fasi fu tyari wisrefi na ini ibri pisi fu wi diniwroko.
5 Leki bedinari fu a bun nyunsu, wi e du moro furu leki fu fruteri sma nyunsu nomo. A preikiwroko fu wi e gi sma wan seiker howpu fu wan moro betre libi now èn so srefi na ini a ten di e kon (1 Tim. 4:8). Te wi e go na ibriwan sma, dan a positief fasi fa wi e denki sa sori na ini san wi e taki èn a sa yepi sma fu teki a bun nyunsu. ¡Meki wi poti prakseri na san wi e taki èn na fa wi e taki en, èn na so fasi gi opregti sma tranga fu teki a span bun nyunsu di wi e preiki!