Teki na eksempre fu Yehovah, a „koloku Gado” fu wi
1 Yehovah trutru wani taki sma de koloku. A Wortu fu En e gi wi a howpu taki a libisma famiri sa kisi tumusi moi blesi na ini a ten di e kon (Yes. 65:21-25). Trawan musu man si krin taki wi e prisiri fu preiki „a kefalek moi bun nyunsu fu a koloku Gado” gi den (1 Tim. 1:11). A fasi fa wi e taki fu a Kownukondre boskopu musu sori taki wi lobi a tru anbegi, èn taki wi e broko wi ede trutru nanga den sma di wi e taki nanga den.—Rom. 1:14-16.
2 A tru taki son tron a muilek fu tan du sani nanga prisiri. Na ini son kontren, furu sma no wani arki a Kownukondre boskopu. Son leisi, wi abi fu du nanga muilek situwâsi na ini wi eigi libi. Efu wi wani tan du sani nanga prisiri, dan wi musu prakseri o prenspari a de taki den sma na ini wi kontren yere èn frustan a bun nyunsu fu a Kownukondre di wi e preiki (Rom. 10:13, 14, 17). Te wi e prakseri dipi fu den sani disi, dan dati sa yepi wi fu tan fruteri sma nanga prisiri taki Yehovah seti sani fu frulusu libisma fu di a abi sari-ati nanga den.
3 Poti prakseri na den blesi di wi sa kisi: Wi musu poti prakseri sosrefi na den sani di wi e taki. Kande wi e bigin wan takimakandra fu di wi e taki fu wan problema, noso fu wan tori na nyunsu di e meki taki sma e broko den ede. Toku wi no musu taki tumusi langa fu sani di e meki sma firi brokosaka. Wi kisi a wroko fu tyari „bun nyunsu kon di abi fu du nanga wan moro bun sani” (Yes. 52:7; Rom. 10:15). A bun nyunsu disi na wan boskopu di abi fu du nanga den pramisi fu Gado gi wan moro bun tamara (2 Petr. 3:13). Nanga a sani disi na prakseri, wi musu gebroiki den Buku fu Bijbel fu „tai wan wensre gi den wan di e firi brokosaka” (Yes. 61:1, 2). Disi sa yepi ibriwan fu wi fu tan du sani nanga prisiri èn fu poti prakseri na den bun sani.
4 A no de fu taki, dati sma sa si taki wi e du a preikiwroko nanga prisiri. Sobun, meki wi teki na eksempre fu Yehovah, a „koloku Gado” fu wi, te wi e preiki a bun nyunsu fu a Kownukondre gi sma na ini a kontren fu wi.