’San Mi Kan Du?’
1 ’San mi kan du?’ A no de fu taki, dati den memre fu a pikin bijbelstudie grupu di Charles Taze Russell ben orga na ini den yari na mindri 1870 nanga 1880 ben e broko den ede nanga na aksi dati. Ala di den ben kon frustan a wani fu Gado bun moro nanga moro, dan den fosi Bijbel studenti ben musu aksi densrefi san den ben kan du fu yepi trawan kon sabi a prakseri fu Gado. A ben de wan kefalek bigi wroko fu go na a heri libisma grontapu nanga a sabi fu Bijbel di den ben kisi.
2 Koloku fu wi dati den ben teki a tyalensi dati so bun leki den ben kan. Fa? Ibriwan fu den ben du a wroko fu en, awansi a ben gersi soso wan pikin sani nomo. ¡Dati meki taki na ini a ten disi sma kon sabi Yehovah Kotoigi na heri grontapu — wan organisâsi fu pikinmoro siksi milyun Kownukondre preikiman di e dini na ini so wan 90.000 gemeente na ini 234 kondre nanga èilanti fu se!—Yes. 60:22.
3 Gi Yepi Dorodoro: A de tumusi prenspari gi ibriwan fu wi fu abi wan prati na a kefalek bigi wroko di Yesus ben taki na fesi fu en èn di sma ben o du na ini den lasti dei disi (Mark. 13:10). A no de fu taki dati wi no kan libi a wroko disi gi a pikin grupu fu owruman wawan; èn a preikiwroko no de wan sani di soso den pionier musu du. Te yu luku en bun, dan a de so taki ibri Kresten abi wan prenspari sani fu du. Wi alamala kan teki prati na a wan noso tra fasi fu preiki (1 Tim. 1:12). Awansi o furu wi e du tapu a kontren dati, wi sa tyari wini kon gi wisrefi èn gi trawan.—1 Tim. 4:16.
4 Ibriwan fu wi kan gi yepi dorodoro na wi Kresten bradafasi na tra fasi di wani taki wan sani. Wi kan horibaka gi den gemeente konmakandra fu di wi e fisiti den doronomo èn fu di wi e teki prati na den fayafaya (Ps. 122:1, 8, 9). Wi kan yepi fu hori a gemeente krin na moreel sei. Soleki fa den materia sani fu wi e gi pasi fu dati, wi kan gi yepi na moni sei gi a wroko di e du na heri grontapu. Wi kan teki prati ini a krin di wi e krin a Kownukondre zaal. Ibriwan fu wi kan yepi meki wan yeyefasi fu lobi nanga wánfasi de, efu wi e yepi den nyunwan èn so srefi den yonguwan nanga den owruwan.—Kol. 3:12, 14.
5 So bun yu e aksi kande: ’San mi kan du?’ Efu yu e du a wroko fu yu, dan yu kan yepi meki a gemeente kon tranga, meki a de aktief èn meki a tron wan gemeente di sani e go bun nanga en, ala di den sani di yu e du kan gersi pikinso nomo. ¡Na so fasi wi alamala abi wan prenspari sani fu du fu gi a nen fu Yehovah grani!