Pristeri a boen njoensoe — Nanga wan positief jeje fasi
1 Leki tjariman foe na boen njoensoe foe a Kownoekondre wi moe kweki wan positief jeje fasi na na sé foe wi diniwroko èn tan hori en. Foe san-ede? Foe di a grontapoe disi ondro na makti foe Satan abi na prakseri foe meki en hebi gi wi foe doe Gado wani. Na foe dat’ede Paulus ben gi kristensma dek’ati foe tan abi na srefi jeje fasi di Kristus ben abi (Rom. 15:5). Nanga aladi Kristus ben ondrofeni foeroe gens, alaten a ben tan hori wan positief jeje fasi. A ben taki nanga fertrow èn ben gron den taki foe en tapoe na autoriteit foe Gado Wortoe (Matt. 7:28, 29). A no ben hori ensrefi a baka foe graboe ibri okasi foe prati a Kownoekondrehowpoe nanga trawan. Den sma di ben de na en, a ben tranga den na jejesé èn a ben gi den dek’ati foe waka soifri na ini en foetoestap. Wi kan sori nasrefi positief jeje fasi na na sé foe wi prékiwroko ini a ten disi?
2 Sontron wi kan prakeri negatief foe na gebied di wi ben kisi foe wroko foe di a sori leki a no sa meki froktoe. Tapoe foe préki ben sa sori foe wan mi-no-ke-jeje fasi. Nanga aladi Jezus ben sabi taki wéniki sma nomo boo arki boen na boen njoensoe, tokoe a ben abi sari-ati nanga den sma gi soema a ben préki. Nanga di a ben e go nanga dek’ati doro nanga préki, a ben leri en discipel foe begi na Tata foe „moro wrokoman ben kan seni kon ini na kotiwroko” (Matt. 9:36-38). Ala ten Jezus ben abi wan boen jejefasi. A ben abi na faste bosroiti foe jepi den sma di ben de na en.
3 Ini moro èn moro osofamiri soboen man leki oema abi wan foeroeten wroko foe kan tan hori na libifasi di densrefi ben ferkiese foe abi ofoe soso foe kan tan mitimiti a libi kon na wan. Nofotron no wan sma de na oso te wi e kon a den doro. Wan positief jeje fasi kan meki wi go denki foe meki wi schema fiti den omstandigheden sodati wi kan kisi moro betre bakapisi. Joe ben prakseri go prakseri kon foe gebroiki den netijoeroe foe go wan pisten na ini na prékiwroko? Sonwan ben abi heri boen bakapisi foe di sjatoe baka na mofonetinjanjan den ben e go fisiti den sma na den oso te den ososma de nanga moro broskin èn nanga dati den de moro klarklari foe arki.
DE POSITIEF NA A SÉ FOE TRAWAN
4 A kan de troetroe wan switisani foe wroko nanga tra sma makandra ini na dienst. Disi de spesroetoe so efoe wi takmakandra e sori wan positief jeje fasi. Te wi e meki negatief firi kon a doro dan disi sondro degedege e tjari lasi’ati kon. Ini a ten foe Israël ini owroeten den tin s’pion di no ben tan getrow leki wan eksempre ben tjari „wan takroe njoensoe” nanga san a ati foe na heri naatsi ben kon krempi foe frede (Num. 13:32-14:3). Ini kontrari nanga disi Salomo ben skrifi: „Wan njoensoe di de boen, e fatoe bonjo” (Odo 15:30). Nanga na ferteri foe na ondrofeni nanga san boen sani e kon a fesi tranga, wi e doro na marki dati tra sma e kisi krakti èn den e motiveer foe tan doe den dienst nanga faja.
5 Wi abi na gwenti foe loekoe na belangstelling di wan sma ben sori, leki wan pikin sani, nanga aladi wi ben abi wan heri boen takmakandra foe bijbel? Sonwan abi wan negatief fasi foe si sani foe go-baka bikasi den feni taki na belangstelling di sma ben sori no ben de nofo ofoe no ben de opregti. Noiti frigiti taki a ’Wortoe foe Gado abi libi èn de krakti’ (Hebr. 4:12). Wi brada nanga sisa ben ferteri heri ipi ondrofeni foe opregti sma foe di den ati ben naki den troetroe foe di den ben kisi wan ofoe tra eenvoudig ferklari noso foe di den ben lési nomo wán artikel ini wan tijdschrift. Nanga na mogelekheid dati na ini prakseri wi moesoe abi na faste bosroiti foe ondrosoekoe ibri wan belangstelling di wi e feni na wan joisti fasi.
6 Jezus ben tan kibri en positief jeje fasi bikasi a ben de overtoigi dati a ben abi na waarheid di ben kan meki sma kon fri (Joh. 8:32). A ben doe en diniwroko dorodoro nanga aladi sani ben de foe stotoe foetoe, soleki na sondro bribifasi foe tra sma, mi-no-ke-fasi èn srefi ferfolgoe. A no soso den bakapisi di ben e ferwondroe so foeroe di a ben e doro, ma ooktoe na djaranti taki a boo de alaten nanga wi, moesoe gi wi na fanowdoe faste sekerfasi foe go na fesi nanga wan positief jeje fasi ini na sabi taki wi ooktoe nanga Jehovah jepi sa kan doe wi diniwroko dorodoro. — Matt. 28:20; 2 Tim. 4:5.