Den no hori na baka foe gi kotoigi
1 A nen foe wi, Jehovah Kotoigi, e meki sma kon sabi wi èn a nen e taki san wi e doe. Wi e gi kotoigi foe den toemoesi moi eigifasi foe wi Gado, Jehovah (Jes. 43:10, 12). Ibri sma moesoe teki prati na ini a gi foe a kotoigi disi, efoe a sma wani tron wan memre foe a gemeente. Na a fosi presi, wi e gi kotoigi nanga jepi foe wi poebliki diniwroko, di abi na ini en foe go oso foe oso, foe doe stratiwroko, foe tjari gobaka, èn foe hori bijbelstudie. Nanga leti, wi alamala e kisi a tranga foe gi wisrefi pasi foe abi wan prati ini a wroko disi dorodoro. — 1 Kor. 15:58.
2 Ma tokoe, son sma foe a gemeente no man doe so foeroe leki den wani foe doe. A siki di den siki serjoesoe, noso a swaki di den swaki na skin fasi, kan meki taki den moesoe tan na oso. A gens di den famiri e gens den, kan de wan kefarlek bigi hendri. A kan, taki wan papa noso mama di no de na bribi e skotoe wan jongoe sma. Sonwan di e libi na farawe presi pe vervoer no de, kan denki taki den no man gi kotoigi. A sjen di sonwan e sjen foe densrefi, ben sa kan meki taki den wan disi di e sjensjen, e degedege. Son preikiman di abi foe doe nanga den situwâsi disi noso tra situwâsi di gersi den disi, kan firi taki den no e doro san sma e froewakti foe wan kresten, bikasi san den man doe, de moro mendri leki san trawan e doe èn a de moro mendri leki san densrefi wani doe troetroe. No wan reide no de gi den, foe si den eigi moeiti di den e doe, leki foe soso (Gal. 6:4). Den kan feni trowstoe ini a sabi di den sabi taki Jehovah e prisiri te den e gi a moro boen sani di den abi ini awinsi sortoe situwâsi pe den de na ini. — Luk. 21:1-4.
3 Feni wan fasi foe abi wan prati: Doesoendoesoen ondrofenitori ben froeteri, di e sori fa sma ini moeilek omstandigheid, no gi pasi taki den problema tapoe den foe preiki. Foe di den teki a bosroiti foe densrefi doe sani, meki den feni foeroe difrenti fasi foe gi okasi kotoigi. Den wan di moesoe tan na oso, gebroiki a konkroetitei foe opo wan bradi doro foe gi kotoigi. Den e si ibri sma, leki wan sma di kan arki. Ala di wan wefi di de foe wan osofamiri di e gens en, no man gi kotoigi na oso, tokoe a e gebroiki den okasi foe taki nanga sma ini a birti foe en, noso tra sma di a e miti te a e doe den aladei sani foe en.
4 Wan papa noso mama di no de na bribi, kan tapoe wan jongoe sma foe abi wan prati ini a gi di wi e gi kotoigi na poebliki. Na presi foe teki dati leki wan sani di a no man doe noti na en tapoe, a jongoe sma kan si den skoromati nanga den skoromeester noso den skoromisi foe en, leki a „gebied” foe en, èn na so wan fasi a kan gi toemoesi moi kotoigi èn kande hori bijbelstudie srefi. Foeroe sma di e libi na presi di de farawe, ben abi wan prati, foe di den ben skrifi brifi. Den wan di abi a kresten faja di e poesoe den, alaten sa feni wan fasi foe no kon tron „inaktief noso foe no e gi froktoe ini a tori foe soifri sabi foe wi Masra Jesus Krestes”. — 2 Petr. 1:8.
5 Te a abi foe doe nanga a prati di wi abi ini a kotoigi wroko, dan Jehovah poti wán markitiki gi wi alamala, namkoe, taki wi moesoe de „nanga wi heri sili” (Kol. 3:23). Ala di a ten di wi e gi èn san wi e doe, sa difrenti, tokoe a sani di e troesoe wi, na a srefi sani — opregti lobi di e kon foe „na heri ati” (1 Kron. 28:9; 1 Kor. 16:14). Efoe wi e gi a moro boen sani di wi abi, dan noiti wi no sa abi reide foe firi taki wi no e bribi nofo, noso taki wi no warti noti leki memre foe a gemeente, foe di san wi man doe, no de nofo. Neleki Paulus, wi kan taki troetroe dati wi ’no hori na baka foe froeteri ala den sani san boen èn foe gi leri na poebliki’. — Tori. 20:20.