Go baka na den sma di ben sori belangstelling
1 Te wi e wroko oso foe oso, dan moro foeroe a de so taki wi no kan gi foeroe ten na den sma di sori belangstelling. Ini moro foeroe kefal wi e doe a troe leri wroko te wi e meki gobaka èn te wi e hori bijbelstudie (Mat. 28:19, 20). Foe kan gi leri na wan fasi di abi boen bakapisi na a gobaka, a de fanowdoe foe wi go loekoe sjatoe baka san wi ben taki na a fosi fisiti foe wi, èn dan sreka wisrefi gi a tra takimakandra.
2 Efoe joe ben taki foe na osofamiri seti di no de so tranga moro, dan joe ben sa kan gebroiki a materiaal ini kapitel 29 foe na „Eeuwig leven”-boekoe (Libi foe têgo-boekoe). Joe ben kan taki:
◼ „A fosi leisi wi ben taki foe a koni foe waka na baka bijbel rai, so taki wi kan abi wan kolokoe osofamiri. San joe denki, na a sroto foe tjari osofamiri kon na wán na ini a ten disi?” Gi okasi foe piki. Sori go na paragraaf 27 tapoe bladzijde 247, èn leisi Kolosesma 3:12-14. Taki moro fara foe sori fa troe lobi kan hori osofamiri na wán. Tjari kon na krin fa wan doronomo studie foe na Eeuwig leven-boekoe kan jepi den foe loesoe problema.
3 Efoe, na joe fosi fisiti, joe ben taki foe a go di den situwâsi na grontapoe e go na baka, dan joe ben sa kan go doro foe di joe e taki:
◼ „Mi de seiker taki joe sa agri dati bigi kenki de fanowdoe efoe oiti wi o libi ini vrede. Bijbel e sori taki na a fosi presi den problema foe wi e kon foe Satan. Foeroe sma aksi densrefi foe san ede Gado gi pasi meki Satan tan foe so wan langa ten. San joe e prakseri?” Gi okasi foe piki. Go na bladzijde 20, paragraaf 14 nanga 15 ini na Eeuwig leven-boekoe èn tjari kon na krin foe san ede Satan no ben kisi pori te nanga now ete. Baka dati leisi Romesma 16:20, di e sori san wi kan froewakti heri esi ini a ten di e kon.
4 Efoe joe ben taki foe den blesi di sa kon troe na ondro a Kownoekondre tiri, te joe de na joe gobaka, dan joe ben kan taki:
◼ „A Kownoekondre foe Gado sa tjari kefalek moi blesi kon gi grontapoe èn gi a libisma famiri. Tapoe bladzijde 12 nanga 13 den e prenki den blesi disi na wan moi fasi. Sortoe moi sani joe e si djaso? [Gi okasi foe piki.] Prakseri fa a ben sa de foe libi ini so wan grontapoe.” Leisi paragraaf 12. Efoe a sma sori belangstelling, dan poti na aksi foe paragraaf 13, èn taki makandra foe a piki. Froeteri dati a kapitel disi e gi piki na tapoe moro aksi di abi foe doe nanga Kownoekondre blesi èn dati joe sa breiti foe taki makandra foe den te joe kon baka.
5 Joe ben sa kan bigin wan studie foe di joe e taki:
◼ „Foeroe sma feni piki na tapoe den bijbel aksi foe den, foe di den meki gebroiki foe a boekoe disi.” Go na a bladzijde pe den skrifi den tori san de na ini a boekoe, èn poti na aksi: „Sortoe tori dja e hari joe prakseri moro foeroe?” Gi okasi foe piki, go na a kapitel di ben hari a prakseri foe den èn leisi a fosi paragraaf. Tjari kon na krin fa den aksi na ondrosei foe ibri bladzijde e poti krakti na tapoe den moro prenspari penti ini ibri paragraaf. Sori fa wi e hori a studie, foe di joe e taki makandra foe wan noso toe paragraaf moro, èn dan seti sani foe go baka.
6 Te wi e go baka na sma di sori belangstelling gi na Eeuwig leven-boekoe , dan dati e sori taki wi wani foe tjari wi diniwroko kon na wan kaba dorodoro (2 Tim. 4:5). Kande wi kan jepi den wan di e arki wi foe kisi têgo libi.—Joh. 17:3.