Kownoekondre njoensoe di e kon na a joisti ten, èn di wi moesoe prati na heri grontapoe
1 Tapoe sonde 23 april, wan spesroetoe poebliki taki sa hori, èn a nen foe a taki di e hari a belangstelling na „A kaba foe falsi relisi de krosibei”. Na a kaba foe a konmakandra a dei dati, den sa tjari wan Kownoekondre njoensoe(-traktaat) foe fo bladzijde kon na doro, di sa hari a prakseri foe sma. A boskopoe di a abi na ini èn di e kon na a joisti ten, sa prati na heri grontapoe na ini wan pisi ten foe dri wiki, foe 24 april te nanga 14 mei.
2 Na ini ala pisi foe grontapoe sma e broeja èn e broko den ede. Awinsi pe den e libi, problema e trobi den. A Kownoekondre njoensoe sa hari a belangstelling spesroetoe foe den wan di e broko den ede troetroe nanga den sani di e pasa, foe di a sa sori den go na a Wortoe foe Gado leki a fonten di noiti no kan misi, di e gi libisma tiri (Ps. 119:105). Wi alamala e loekoe go na fesi foe kisi wan eksemplaar foe a Kownoekondre njoensoe te den o tjari en kon na doro tapoe 23 april. Disiten, wi abi foeroe foe doe foe sreka gi a fajafaja kotoigi wroko disi, di sa teki dri wiki.
3 Gi ala sma deki-ati foe abi wan fajafaja prati: Soema na den wan di kan teki prati na a wroko disi? A no de foe taki, dati ibri sma di de wan preikiman kaba, sa wani foe abi wan prati srefisrefi! Fa a de nanga bijbelstudenti di doronomo e go na den konmakandra foe a gemeente? Son wan abi demakandra nanga wi foe wan heri pisi ten kaba, èn den e go na fesi na wan boen fasi. Efoe den e libi akroederi bijbel gronprakseri, dan den brada kan feni den boen foe kon tron Kownoekondre preikiman? A sma di e hori a bijbelstudie kan taki foe na afersi makandra nanga a studenti, èn efoe a studenti wani foe abi wan prati na a velddienst, dan toe owroeman sa loekoe a bodoi nanga en di den kan feni tapoe bladzijde 99 te nanga 102 foe a boekoe Georganiseerd om onze bediening te volbrengen. Den moesoe doe disi so esi leki a kan, so taki den wan di den brada feni boen foe de preikiman di no dopoe ete, kan abi wan dorodoro prati na ini a kotoigi wroko disi. Bijbelstudenti di den brada no feni boen foe de preikiman di no dopoe ete, tokoe kan kisi a deki-ati foe prati a Kownoekondre njoensoe disi di kon na a joisti ten, nanga den osofamiri memre noso nanga den mati foe den.—Loekoe A Waktitoren foe 15 november 1988, bladzijde 7 paragraaf 8.
4 A wroko disi no tranga; ibri sma kan abi wan prati. Papa nanga mama kan poti na ini na osofamiri bijbelstudie foe den, pisi pe den e oefen nanga makandra fa foe pristeri a Kownoekondre njoensoe, so taki ibri memre foe na osofamiri sa de srekasreka foe pristeri en oso foe oso. Moro foeroe, wan eenvoudig pristeri sa de moro betre. Baka wan sjatoe inleiding, pristeri na ososma a Kownoekondre njoensoe, èn gi en deki-ati foe leisi en. Efoe den ososma e sori belangstelling, dan skrifi dati, so taki joe kan go baka foe taki moro fara foe a tori (1 Kor. 3:6, 7). A sroto gi boen bakapisi na foe abi wan eenvoudig pristeri di joe sreka boen.
5 „Foeroe [sa] de foe doe” na ini april nanga mei. Na ini na uitgave foe tra moen foe Wi Kownoekondre Dienst, wi sa kisi moro bodoi na ini na inlegvel di abi leki nen: „Foeroe de foe doe ini a wroko foe Masra.”—1 Kor. 15:58.