Prati Kownoekondre njoensoe nr. 35 na ala presi
1 Oktober nanga november sa de moen pe wi alamala sa abi foeroe foe doe. Na ini den fosi 11 dei foe oktober, wi sa pristeri eksemplaar foe A Waktitoren nanga Ontwaakt! Baka dati, na tapoe sonde 12 oktober te go miti sonde 16 november, wi sa prati so srefi a Kownoekondre njoensoe nr. 35 di e prati na heri grontapoe. Wi sa abi a grani foe tjari wan prenspari boskopoe gi ala sma na ini wi kontren. A de a piki tapoe na aksi: „Wan ten sa kon pe ala sma sa lobi makandra?” Na ini a pisi ten foe a spesroetoe kotoigiwroko disi, wi sa prati Kownoekondre njoensoe nr. 35 na mindriwiki. Na ini den weekend, boiti taki wi sa pristeri Kownoekondre njoensoe, wi sa pristeri den njoen tijdschrift toe.
2 Soema mag doe a wroko? Soleki fa wi gwenti, den owroeman sa teki fesi na ini a wroko disi. Ala sma lobi foe prati Kownoekondre njoensoe, èn seiker foeroe preikiman sa gi den nen leki jepi-pionier na ini wán moen noso na ini ala toe moen foe a kotoigiwroko. Tra preikiman sa wani gebroiki moro ten leki den gwenti na ini a diniwroko.
3 Joe abi wan bijbelstudenti di de fara kaba nanga a studie foe en na ini a Sabi-boekoe èn di sa doro den markitiki heri esi foe go na ini a velddienst? Kande bifo dati a ben kan tron wan preikiman di no dopoe ete, foe man abi wan prati na ini a Kownoekondre njoensoe kotoigiwroko. Wan makriki pristeri de nomo fanowdoe foe bigin taki foe a traktaat. Foe eksempre, wan sma ben sa kan taki: „A boskopoe disi de so prenspari taki a e prati na heri grontapoe a moen disi, na ini 169 tongo. Mi ben sa wani meki joe abi joe eigi eksemplaar.” Srefi jongoe pikin kan doe a span wroko disi na wan boen fasi.
4 Den boekoestudie leider moesoe gi ibri memre foe a groepoe foe den a deki-ati foe prati a Kownoekondre njoensoe nr. 35 dorodoro. Kande preikiman de toe di kon inaktief ma di ben sa de aktief baka na ini a diniwroko efoe den ben kisi a deki-ati di de fanowdoe. Bifo a kotoigiwroko e bigin, den owroeman moesoe fisiti ibriwan foe den sma disi foe si san den kan doe foe jepi den foe wroko makandra nanga preikiman di abi ondrofeni na ini a diniwroko disi.
5 O ten wi kan kon makandra gi a diniwroko? Foe doe ala a wroko disi a de fanowdoe foe sreka sani foe kan gi kotoigi na ini groepoe, na wan fasi di fiti èn di de praktis. Te a man, den velddienst konmakandra moesoe orga gi ibri mindriwiki dei, na ini den weekend, èn na mofoneti. Den velddienst konmakandra moesoe hori na tapoe ten di sa meki taki den preikiman nanga den pionier sa man meki boen gebroiki foe a ten dati foe gi kotoigi. Sani moesoe sreka toe foe kon makandra na mofoneti gi den skoro studenti, den sma di e wroko shift, nanga tra sma. A dienstopziener moesoe sorgoe taki foeroe gebied de gi na oso-foe-oso wroko èn bisnis kontren, so taki ibri sma kan doe foeroe na ini a wroko. Te foeroe preikiman de na ini wan kontren, dan den moesoe gebroiki koni foe sabi omeni foe den sa wroko na ini wan pisi foe a kontren.
6 Fa a de nanga den sma di no de na oso? Wi wani taki persoonlijk nanga so foeroe ososma leki wi man, foe froeklari foe san ede den moesoe leisi Kownoekondre njoensoe nr. 35. So boen, te no wan sma de na oso te joe go fisiti en, skrifi na adres èn go baka na wan tra joeroe. Efoe na ini a lasti wiki foe a wroko joe ben doe moeiti foe miti nanga den ososma disi, ma joe no ben miti nanga den, dan joe kan libi wan eksemplaar foe Kownoekondre njoensoe na den doro, na wan presi pe den sma di e waka pasa no man si en. Na ini den kontren pe foeroe sma e libi, de na ai foe pristeri a Kownoekondre njoensoe na sma di kande e waka na strati. Te wi e wroko na den boitipresi èn pe a gebied foeroe sote taki wi no man wroko den alamala na ini a pisiten disi foe a kotoigiwroko, dan na a fosi fisiti wi kan libi wan Kownoekondre njoensoe na den oso pe sma no de.
7 San na a marki foe wi? Gemeente moesoe meki moeiti foe gebroiki ala Kownoekondre njoensoe di den abi foe wroko a heri gebied foe den, bifo a kotoigiwroko sa kaba na tapoe 16 november. Efoe a gebied foe joe gemeente bigi srefisrefi èn a no de kefarlek foe wroko joe wawan, na presi foe wroko nanga wan patna, dan a kan de praktis foe wroko joe wawan. Disi sa meki taki joe man miti so foeroe sma leki a kan èn di warti dati, nanga a boen njoensoe (Mat. 10:11). A kan abi wini te joe e tjari wan toe traktaat na ini joe anoe èn wan bijbel na ini joe saka noso na ini joe pikin tas, na presi foe gebroiki wan bigi tas. Sorgoe taki joe e skrifi den nen nanga adres foe sma di abi belangstelling.
8 Joe de srekasreka foe bigin? Den owroeman moesoe bereken omeni ekstra tijdschrift a gemeente sa abi fanowdoe èn den moesoe bisteri den. A no de fanowdoe foe bisteri Kownoekondre njoensoe nr. 35, foe di wan porsi sa seni go na ibri gemeente. Ibri spesroetoe pionier, gewoon pionier, nanga jepi-pionier sa kisi 250 eksemplaar foe prati, ala di ibri gemeente preikiman sa kisi 50 eksemplaar. Wi kisi wi wroko kaba leki toewijzing. Joe de fajafaja foe doe a prisiri wroko disi? Seiker a de so. Meki wi prati a prenspari bijbel boskopoe disi na ini a Kownoekondre njoensoe nr. 35, so foeroe leki a kan!