„Foeroe de foe doe na ini a wroko foe Masra”
1 Na ini april nanga mei wi abi foe troe wan schema di foeroe nanga theokratis aktiviteit! Tapoe 14 april wi sa hori na Memrefesa foe a dede foe Krestes. Wi moesoe gi so foeroe sma leki wi kan deki-ati foe de drape gi a prenspari okasi dati: sma di e doe bisnis nanga wi, famiriman di no de na waarheid, skoromati, sma di e bigin foe sori belangstelling, nanga bijbelstudenti. Meki wan lijst foe den sma di joe wani gi wan kari, so taki joe no e misi no wan foe den.
2 A wiki baka dati wi sa gi ala sma deki-ati di ben de na a Memrefesa foe kon arki a spesroetoe poebliki taki tapoe 23 april. A taki sa abi leki nen: „A kaba foe falsi relisi de krosibei.” Wi howpoe taki foeroe sma di abi belangstelling èn di e arki a boskopoe disi di e taki sani leti fa den de, sa si taki a de fanowdoe foe abi doronomo demakandra nanga a gemeente, èn no wawan tapoe spesroetoe okasi.
3 Spesroetoe Kownoekondre njoensoe di den sa tjari kon na doro: Wan heimarki foe a konmakandra tapoe 23 april sa de a tjari di den sa tjari kon na doro wan Kownoekondre njoensoe nr. 34, foe fo bladzijde, di e kon na a joisti ten, èn den sa prati en na heri grontapoe te nanga 14 mei. Joe no e agri taki „foeroe sa de foe doe na ini a wroko foe Masra” na ini a pisi ten disi, te wi o hori a Memrefesa?—1 Kor. 15:58.
4 Wan toe foe den Kownoekondre njoensoe sa seni go na ibri gemeente. Den dosoe nanga a Kownoekondre njoensoe moesoe poti na wan presi pe den de veilig, èn den no moesoe opo den te na a kaba foe a programa na tapoe 23 april. Na a ten dati den brada nanga a poebliki sa kan kisi a Kownoekondre njoensoe. Na a kaba foe den gemeente konmakandra, den kringkonmakandra noso den spesroetoe deikonmakandra programa tapoe 23 april, den wan di de drape sa kisi wan eksemplaar foe a traktaat so taki den kan kon sabi san skrifi na ini èn so taki den kan de srekasreka foe prati en.
5 Den owroeman sa abi foeroe foe doe: Froekoe na ini a moen disi a skin foe owroeman moesoe kon makandra foe taki finifini foe a spesroetoe kotoigiwroko disi. Den gemeente moesoe proeberi foe wroko na a heri gebied di den abi. Bifo a kotoigiwroko e kaba, meki spesroetoe moeiti foe wroko na den gebied di no ben wroko na ini den siksi moen di pasa. Foe di wi sabi o prenspari a wroko de, meki wi sa wani foe poti someni ten leki wi kan na wan sei, gi a diniwroko. A no de foe taki, dati moro preikiman leki fa wi gwenti, sa gi den nen foe tron jepipionier. Kande a de so taki foeroe bijbelstudenti di den owroeman feni boen foe kon de preikiman di no dopoe ete, sa teki prati makandra nanga wi. Wi sa abi wan prisiri ten ala di wi e wroko makandra ini a wroko foe Masra!
6 Den gemeente boekoestudie leider moesoe sreka sani gi groepoe kotoigiwroko tapoe satra nanga sonde. Ibriwan sma moesoe kisi deki-ati foe abi wan fajafaja prati. Aparti foe na aktiviteit na a kaba foe a wiki, sani moesoe sreka gi mofoneti kotoigiwroko, awinsi a de wan leisi wan wiki, ini a pisi ten di wi e doe a spesroetoe kotoigiwroko. Foe jepi den wan di e go na skoro èn di sa wani abi wan moro bigi prati ini a wroko, dan son wan kan miti gi a velddienst baka skoro.
7 Wan schema moesoe meki gi den velddienst konmakandra, so taki den preikiman nanga pionier kan bigin froekoe nanga a diniwroko ibri dei. Den konmakandra disi moesoe de sjatoe. Den moesoe abi na ini wan makriki pristeri foe a Kownoekondre njoensoe. Den bakadina konmakandra gi a velddienst kan abi na ini wán noso toe rai foe tjari gobaka na den wan di teki a Kownoekondre njoensoe. Ma son preikiman kan wani foe teki prati na ini a wroko disi, na mamanten èn na bakadina. Foe doro a marki disi, a dienstopziener sa wani sorgoe taki nofo gebied de pe den kan wroko. A nen nanga tanpresi foe ibriwan sma di e sori belangstelling moesoe skrifi tapoe wan oso-foe-oso-raport. Joe kan skrifi den prenspari penti foe san joe ben taki makandra tapoe a raport toe. Disi sa jepi joe te joe e meki wan gobaka wan toe dei na baka, na ini a wiki noso na ini a moen.
8 Efoe wan gemeente e jepi wan tra gemeente foe wroko na a gebied foe den, dan den moesoe gi den nen nanga den tanpresi foe den sma di sori belangstelling, na a gemeente di abi a gebied dati.
9 Papa nanga mama, den pikin foe joe e wroko tranga foe kon tron preikiman di no dopoe ete? Ini son gemeente wi ben si taki, pikin di e tjari densrefi na wan boen fasi, e go nanga den papa nanga mama foe den di dopoe, ini a velddienst gi wan toe jari kaba, èn den pikin e doe en heri boen, ala di den no de preikiman foe a boen njoensoe ete. Papa nanga mama moesoe ondrosoekoe efoe den pikin foe den troetroe de warti foe kisi a grani disi. Toe foe den owroeman kan taki foe ala den sani nanga na osofamiri edeman en bosroiti efoe den kan teri a pikin leki wan preikiman di no dopoe ete.—om bladzijde 99 nanga 100.
10 Joe abi preikiman na ini a gebied foe joe gemeente di no abi wan prati moro langa ini a gi di den moesoe gi wan ofrandi foe préise na Jehovah? (Hebr. 13:15) Kande son wan di no de so aktief moro lasi-ati noso den broko-ede foe a libi ben hebi gi den, ala di den e go doro foe hori densrefi na den bijbel markitiki akroederi boen gwenti nanga wèt. Wan switi fisiti foe wan foe den owroeman kan boeweigi den foe kon baka foe abi demakandra doronomo nanga a gemeente. Dan, na wan joisti ten den kan bigin baka nanga den aktiviteit foe den na ini a diniwroko.
11 Alamala di den brada feni boen, kan abi wan prati na ini a prisiri wroko disi: Pikin-nengre noso tini, joe e feni en moeilek foe abi wan prati na ini a oso foe oso diniwroko disi? Èn fa a de nanga joe njoenwan di no abi so foeroe ondrofeni na ini a preikiwroko ete? Joe sa si taki a spesroetoe Kownoekondre njoensoe wroko disi prisiri srefisrefi! Wan makriki pristeri na ala san de fanowdoe.
Joe ben sa kan taki wan sani leki disi:
◼ „A moen disi wi e prati wan prenspari boskopoe na ini 232 kondre na heri grontapoe. A boskopoe disi de prenspari, foe di a e gi wi boen reide foe bribi taki wan loesoe de gi den problema di de na wi fesi tide. Wi ben sa wani foe joe abi joe persoonlijk eksemplaar.”
Noso joe ben sa kan proeberi disi:
◼ „A moen disi wan sani leki feifi miljoen friwani wrokoman e prati wan prenspari boskopoe na ini boen foeroe tongo. Den ben sreka a boskopoe gi sma di ben sa wani foe si den problema di de na wi fesi tide, kon na wan kaba. Disi na joe persoonlijk eksemplaar.”
A makriki pristeri disi kan fiti joe:
„Wi e gi ala sma deki-ati foe leisi a prenspari boskopoe disi di abi leki nen [leisi a nen foe a Kownoekondre njoensoe]. Loekoe san a e taki djaso na bladzijde 2 foe den problema di e kon moro foeroe . . . [Leisi wan toe sani di joe teki spesroetoe foe a Kownoekondre njoensoe]. Wi de seiker taki joe sa prisiri foe leisi san a boskopoe disi, di e kon na a joisti ten, e taki moro fara. Disi na joe eksemplaar.”
12 Sori persoonlijk belangstelling gi ibriwan sma di e teki a Kownoekondre njoensoe. Taki safrisafri èn taki krin; a no de fanowdoe foe doe joe pristeri toemoesi gaw. Wi wani wroko dorodoro ini a gebied foe wi èn wi wani taki ibriwan sma di e sori belangstelling foe leisi a Kownoekondre njoensoe, kisi wan persoonlijk eksemplaar. Te no wan sma no de na oso, dan skrifi dati finifini tapoe joe oso-foe-oso-raport, so taki joe kan go baka na wan ten di de moro betre, foe pristeri na ososma a Kownoekondre njoensoe. Wi kan gebroiki a Kownoekondre njoensoe disi te wi e doe stratiwroko èn te wan sma e sori belangstelling foe leisi en. Te wi e prati eksemplaar na den sma, dan wi moesoe abi a koni foe si efoe den abi troetroe belangstelling, èn wi no moesoe prati den neleki wi e doe nanga pamflet. Na presi foe dati, go foe taki nanga den sma di e waka pasa, èn tjari kon na krin o prenspari a boskopoe de di e tanapoe na ini a traktaat. Gebroiki a Kownoekondre njoensoe foe gi okasi kotoigi, soleki te joe e rèis, noso te joe e gi kotoigi na sma di e wroko nanga joe, te joe e gebroiki joe brekten njanjan. Den wan di moesoe tan na oso èn di no kan gowe libi den oso foe wán noso tra reide, noso den wan di siki, kan pristeri a traktaat na sma di e kon foe fisiti den, na datra noso verpleegster, na sma di e kon seri sani na den oso, èn na tra sma di e kon na den oso.
13 Omeni gobaka joe sa meki na a pisi ten foe a kotoigiwroko disi? A no de foe taki, dati joe sa meki foeroe gobaka, foe di wi moesoe go baka na ala den wan di sori belangstelling gi a Kownoekondre njoensoe. Na joe fosi fisiti, a boen foe taki soso foe a Kownoekondre njoensoe. Dan, te joe e go baka, taki foe a kon di a bodoi na ini a Kownoekondre njoensoe kon na a joisti ten. Arki boen te na ososma e taki san a e denki foe a sani di a ben leisi. Den piki foe na ososma sa jepi joe foe kon sabi foe sortoe artikel joe kan taki te joe e pristeri den moro njoen tijdschrift èn kande fa foe sreka joesrefi gi den takimakandra di joe sa abi nanga a sma moro fara. Efoe na ososma e piki boen na a gobaka, dan proeberi foe bigin wan studie.—1 Kor. 3:6, 7.
14 „A wroko di oenoe e doe no de foe soso”: Ala a wroko disi warti a moeiti di wi e doe? Paulus ben gi den Korentesma a djaranti: „A wroko di oenoe e doe na ini Masra no de foe soso” (1 Kor. 15:58). Ini den jari di pasa, den moeiti di wi ben doe foe prati Kownoekondre njoensoe ben blesi na wan moi fasi. Wan trowpaar di ben froisi foe go libi na ini wan leigi oso, ben feni wan moro owroe eksemplaar foe Kownoekondre njoensoe na ini wan kasi. A ben de a wan-enkri sani di ben de ete na ini a heri oso. Baka di den leisi en, den soekoe a gemeente foe a birti èn den aksi efoe den kan kisi wan bijbelstudie. Den ben bigin go na ala den konmakandra èn bakaten den ben wani foe teki dopoe. Kande wan eksemplaar di joe e libi na baka sa abi den srefi bakapisi!—kmE 11/74 bladzijde 1; Loekoe toe Ontwaakt!, foe 22 februari 1977, bladzijde 26 nanga 27.
15 Wi abi wan toemoesi bigi wroko na wi fesi. A marki foe wi de taki, te wi doro 14 mei, ibri gemeente moesoe kaba wroko na ini a heri gebied foe den. Efoe wan gemeente abi moro ten fanowdoe foe prati a Kownoekondre njoensoe, dan den kan go doro te leki a kaba foe a moen. Sani ben sreka so taki ibri gewoon pionier nanga ibri jepipionier sa kisi 250 eksemplaar foe a Kownoekondre njoensoe. Ibri gemeente preikiman sa kisi 50 eksemplaar. Preikiman nanga pionier moesoe teki soso den traktaat foe san den denki taki den kan prati den, èn den moesoe gi den traktaat di den no prati, baka na den brada, so taki trawan kan gebroiki den. Efoe wi e wroko makandra na wan boen fasi, dan wi kan de seiker taki a prenspari boskopoe disi sa prati na heri grontapoe. Efoe, na mindri foe a moen foe mei, son gemeente no wroko a heri gebied foe den foe di a gebied bigi toemoesi èn efoe den abi moro eksemplaar foe a traktaat ete, dan den kan aksi den gemeente di de krosibei foe den, foe jepi den. Ini tra gemeente, den kan doe disi nanga a gemeente srefi efoe den preikiman e doe moro foe di den e gi den nen foe tron wan jepipionier noso foe di den abi wan moro bigi prati na a diniwroko.
16 Efoe wi wani foe klari wi wroko, dan a sa de fanowdoe foe gi wisrefi na a dini foe Jehovah nanga wi heri sili (Kol. 3:23). A libi foe sma de na ini a tori. Sma no kan gi densrefi pasi foe weigri foe si den situwâsi ini grontapoe tide èn san den wani taki. A ten di wi abi ete, sa kon na wan kaba. Sma moesoe kon si taki libisma no man loesoe den problema foe a grontapoe disi. Na Gado man loesoe den problema. Den wan di wani kisi a blèsi foe Gado moesoe teki wan bosroiti, sondro draidrai, akroederi den markitiki foe Gado.
17 Na a kaba foe a spesroetoe kotoigiwroko tapoe 14 mei, wi sa wroko moro mendri? Nôno! Wi sa tan abi foeroe foe doe, akroederi a rai foe Paulus, di a ben skrifi nanga jepi foe a santa jeje foe Gado.