„A Nyun Pisi Ten fu Dusun Yari—San a Tamara Sa Tyari Kon gi Yu?”
1 Na aksi disi de na ini a prakseri fu sma na heri grontapu. Ala di a libisma famiri du furu na ini den hondrohondro yari di pasa, toku sma ben brokosaka fu di den prenspari problema di e pina a libisma famiri dusundusun yari kaba, de ete (Yob 14:1; Ps. 90:10). Pe libisma kan feni frulekti?
2 Na ini den mun oktober nanga november, wi sa abi wan spesrutu okasi fu gi tra sma wan piki tapu na aksi dati. Fa? Fu di wi o prati a traktaat Kownukondre Nyunsu Nr. 36. A nen fu a traktaat na: „A Nyun Pisi Ten fu Dusun Yari—San a Tamara Sa Tyari Kon gi Yu?” Na ini den fosi tu wiki fu oktober, wi sa pristeri den tijdschrift A Waktitoren nanga Ontwaakt! Dan, bigin nanga munde 16 oktober te go miti freida 17 november, wi sa prati Kownukondre Nyunsu Nr. 36 fayafaya. Te wi e du a spesrutu kotoigiwroko disi, dan mindri wiki wi sa poti prakseri na a prati fu Kownukondre Nyunsu Nr. 36. Satra nanga sonde wi sa pristeri en makandra nanga den nyun tijdschrift.
3 Yu Sa Teki Prati Dorodoro? Owruman, dinari ini a diniwroko, nanga pionier o wani teki fesi ini a kotoigiwroko disi. Furu preikiman seti sani na so wan fasi fu wroko leki yepipionier na ini wan noso ala tu fu den mun disi te wi sa prati a traktaat. Trawan sreka sani fu wroko moro leki fa den gwenti na ini a diniwroko.
4 Gemeente bukustudie fesiman kan gi ibriwan sma na ini a grupu fu den deki-ati fu prati Kownukondre Nyunsu Nr. 36 dorodoro. Kande wan tu preikiman de di no e preiki moro. Den owruman musu go luku den fu si san kan du fu yepi den. Kande sani kan seti so taki wan preikiman di abi furu ondrofeni kan wroko na ini den mun disi, makandra nanga ibri sma di no e preiki moro. Wan makriki pristeri fu Kownukondre Nyunsu Nr. 36 kan de a yoisti sani di de fanowdu nomo fu meki den preikiman disi kon preiki fayafaya baka.
5 Efu bijbelstudenti de bun fara kaba nanga a Sabi-buku èn doro den markitiki kaba fu kon tron wan preikiman di no dopu ete, dan disi o de wan bun okasi gi den fu bigin teki prati na a preikiwroko. Srefi yonguwan kan abi wan moi prati na a span wroko disi.
6 Wan makriki pristeri na ala san de fanowdu nomo. Yu kan taki kande:
◼ „Mi teki mi ten fu yepi prati a tumusi prenspari boskopu disi gi ibri famiri na ini [kari a nen fu a foto noso a presi]. Disi na yu traktaat. Grantangi leisi en.” Kande a sa de moro bun fu no tyari wan velddienst tas efu yu e prati Kownukondre Nyunsu Nr. 36.
7 Preikiwroko Konmakandra, Di Sreka Bun: Den owruman musu luku taki den sani di seti fu go na a preikiwroko, seti na wan bun fasi. A dienstopziener spesrutu musu sorgu taki nofo gebied de fu wroko oso fu oso nanga na bisnis presi, so taki ibriwan kan teki prati dorodoro na a wroko. Pe dati kan, preikiwroko konmakandra musu orga ibri dei mindri wiki, satra nanga sonde, so srefi mofoneti. Sani kan seti fu hori preikiwroko konmakandra latilati bakadina so taki skoro pikin, sma di no e wroko na wan fasti ten, nanga trawan, kan abi wan prati na a wroko tu.
8 San Musu Pasa Nanga Sma Di No De na Oso: A marki fu wi na fu taki nanga so furu ososma leki wi man. Efu no wan sma no de na oso te yu e kon, dan skrifi a strati, so srefi na oso nomru èn go baka wan tra yuru. Efu na ini a lasti wiki fu a kotoigiwroko yu no ben man miti den ososma disi ete, dan yu kan libi Kownukondre Nyunsu Nr. 36 gi den, na wan presi pe den sma di e waka pasa no man si en. Te wi e du a kotoigiwroko disi, dan den owruman fu a gemeente kan gi a gemeente a rai fu libi Kownukondre Nyunsu Nr. 36 na den oso pe sma no de, a fosi leisi te den e wroko na boitipresi noso farawe presi èn na presi pe moro gebied de leki den man wroko.
9 Meki Wi Go Wroko Fayafaya! Den gemeente musu meki muiti fu wroko a gebied fu den bifo a kotoigiwroko e tapu 17 november. Efu yu gebied bigi pikinso, dan son preikiman kan wroko den wawan na ini den pisi pe disi man èn pe kefar no de. A seti disi o meki taki a de moro makriki fu miti someni sma leki wi man, di warti fu kisi a traktaat disi. Sorgu taki yu e skrifi den nen, den adres nanga tra prenspari sani fu ala den sma di wani sabi moro.
10 Den owruman musu luku omeni tijdschrift a gemeente o abi fanowdu ete èn dan den musu seni aksi dati. A no de fanowdu fu seni aksi Kownukondre Nyunsu Nr. 36, fu di ibri gemeente o kisi den. Ibri spesrutu pionier, gewoon pionier, nanga yepi pionier o kisi 250 traktaat fu prati, ala di ibri gemeente preikiman sa kisi 40 traktaat. We, yu de klariklari èn fayafaya fu go du a spesrutu wroko disi? Wi abi trutru wan bigi grani fu meki ala den tra sma kon sabi san Gado pramisi fu du na ini a ten di e kon heri esi!