De „nanga faja gi toemoesi boen wroko” na ini april!
1 A jari di pasa wan kotoigi ben gi di no ben gi noiti ete di miljoenmiljoen eksemplaar foe a Kownoekondre njoensoe no. 34 ben prati na heri grontapoe. Gemeente preikiman nanga pionier so srefi ben abi wan fajafaja prati na ini a wroko disi di e gi deki-ati. Joe ben de na mindri den? Efoe joe ben de na den mindri, sondro tweifri joe njan boen dorodoro foe ben abi wan prati na a toemoesi aparti bariwroko dati. Kande joe e aksi joe srefi now: Sortoe ’toemoesi boen wroko’ e wakti wi a jari disi? — Tit. 2:14.
2 Na ini april nanga bigin foe mei, wi sa prisiri foe prati wan spesroetoe uitgave foe na Ontwaakt! tijdschrift foe 22 april 1996, nanga a titel „Te feti no sa de moro”. Foe di a titel disi sa hari a belangstelling foe boen foeroe ososma, meki wi sa doe tranga moeiti foe prati a tijdschrift so meni leki a kan. Nanga a prensparifasi foe den bodoi disi na prakseri, na uitgave disi foe na Ontwaakt! moesoe prati na ini april nanga mei, te noti no libi moro na ini a gemeente.
3 A marki foe wi — Foe meki ala preikiman teki prati: A ben sa gi deki-ati troetroe efoe ibri preikiman na ini a kondre disi ben kan abi wan prati na ini a preikiwroko na ini april. Nanga a Memrefesa foe Krestes en dede krinkrin na prakseri, wi seiker sa wani foe sori wi warderi gi a boenfasi foe Gado, foe di langalanga wi e pristeri en wan „srakti-ofrandi foe prèise” na ini a velddienst. — Hebr. 13:15.
4 Wi moesoe meki fajafaja moeiti foe man si krinkrin san na den fanowdoe foe ibri memre foe a gemeente, so taki ala sma kan abi wan fajafaja prati na a diniwroko na ini april (Rom. 15:1). Den boekoe-studie leider moesoe sabi den situwâsi foe den wan na ini den groepoe heri boen èn moesoe pristeri praktis jepi te a de fanowdoe. Iniwan sma abi wagi fanowdoe? Soema kan sorgoe foe dati? Wan toe sma e frede pikinso noso e sjen esi-esi? Moro bekwaam preikiman kan wroko makandra nanga den? Fa foe den wan di moesoe tan na oso foe di den no man tra fasi, noso den wan di siki? Den kan gi kotoigi na telefon, na ini brifi di den kan skrifi noso na wan tra fasi di kan abi boen bakapisi?
5 Sonwan di kon de inaktief ben e kisi doronomo jeje krakti èn den kan kisi deki-ati foe go baka na ini a preikiwroko. A bariwroko nanga a spesroetoe Ontwaakt! sa gi den wan toemoesi moi okasi foe kon kisi krakti baka.
6 Leri den jongoewan foe teki prati: Foeroe pikin foe Kotoigi foe Jehovah ben go nanga den papa èn nanga den mama oso foe oso omeni jari kaba, ala di den no e dini ete leki preikiman di no dopoe ete. Now na a ten gi den foe bigin? Den ati e boeweigi den èn den de so fara kaba foe abi wan warti prati na ini na oso foe oso wroko? Edeman foe osofamiri moesoe gebroiki ten na a osofamiri bijbelstudie foe jepi den pikin foe den, di doro den markitiki, foe sreka wan pristeri di e fiti na a jari foe ibriwan èn na a sani di ibriwan man foe doe. Moro bigi wan kan gebroiki wan aksi di e meki a sma prakseri èn di e opo a belangstelling foe na ososma, èn sori baka dati a piki na ini a tijdschrift. Moro jongoe pikin kan gi wan boen kotoigi na ini wan toe wortoe nomo. Foe eksempre, den kan gi na ososma deki-ati foe „leisi wan spesroetoe tijdschrift di wi e pristeri a moen disi na tapoe heri grontapoe”. Te joe e sreka joesrefi nanga joe osofamiri, gi den rai toe fa foe piki tapoe sani di sma gwenti foe taki nomonomo foe no arki. Joe sa feni wan lo boen idea na ini a „Redeneren”-boekoe. Na njanjoeroe èn tra okasi di fiti, gi memre foe na osofamiri deki-ati foe froeteri den ondrofeni di den abi na ini velddienst.
7 Bekwaam bijbelstudenti e bigin nanga a wroko di Jesus ben doe: Jesus en leri no ben de soso foe gi rai na ini fondamenti tori nomo. A ben go nanga den studenti foe en na ini a diniwroko èn ben leri den fa foe preiki (Luk. 8:1; 10:1-11). San na a situwâsi na ini a ten disi? Moro leki 2000 bijbelstudie e hori na ini Sranan. A no de foe taki, dati nanga a joisti deki-ati, foeroe foe den studenti disi ben kan teki a bosroiti ini a teki di den e teki leri èn doro den markitiki foe dini na ini april leki preikiman di no dopoe ete.
8 Efoe joe e hori wan bijbelstudie, prakseri foe den aksi disi: A studenti e meki go na fesi di e kroederi nanga en jari èn nanga san a man doe? A ben bigin foe prati en bribi nanga trawan na okasi-preiki? A e weri „a njoen persoonlijkheid”? (Kol. 3:10) A e doro den markitiki di skrifi na tapoe den bladzijde 100 te go miti 102 foe na Georganiseerd-boekoe foe de wan preikiman di no dopoe ete? Efoe joe denki taki a doro den markitiki, foe san ede joe no e taki a tori nanga en? Son studenti abi soso wan persoonlijk kari fanowdoe foe teki prati na ini a wroko. A no de foe taki dati efoe a studenti wani, a sa de fanowdoe taki a fesiman opziener sreka sani, soleki fa a gwenti de, dati a studenti abi wan takimakandra nanga toe foe den owroeman fosi. Na tra sei, wan sani kan hori a studenti foe no preiki. Kande wan foe den owroeman ben kan go nanga joe na a bijbelstudie èn meki a studenti taki tapoe wan fri fasi foe san a e denki foe waarheid. Baka te a arki san a studenti abi foe taki, dan na owroeman kan gi praktis rai makandra nanga jepi foe bijbel.
9 ’Bai ten’ foe de jepi-pionier: Ala jari na ini a pisiten foe a Memrefesa, dan tangi foe na loesoe-ofrandi e boeweigi doesoendoesoen sma foe „bai” ten foe de jepi-pionier (Ef. 5:15-17). Ala di son òfer de fanowdoe, den bakapisi bigi. Wan moi nomroe foe jongoesma di de foe prèise, e meki gebroiki foe a fakansi di den kisi foe skoro, foe dini leki jepi-pionier. Bigisma di e wroko foeroeten e gebroiki den bakadina èn a kaba foe den wiki heri boen gi a srefi wroko disi. Srefi heri osofamiri teki na okasi foe dini leki jepi-pionier makandra! Na ini wan toe gemeente a moro bigi pisi foe den owroeman nanga den dinari na ini a diniwroko nanga den wefi gi den nen leki jepi-pionier. Trawan di ben kisi deki-ati foe na eksempre foe den wan di de nanga faja, ben waka baka na eksempre foe den, so taki wan bigi nomroe foe a gemeente dini leki jepi-pionier na ini april.
10 Efoe joe man noso no man dini leki jepi-pionier, soekoe fasi foe abi wan moro bigi prati na ini a velddienst na ini april. Poti wan persoonlijk marki gi joesrefi, wan di e aksi pikin moeiti foe joe foe doro dati, ma wan di joe man doro. A winsi foe joe foe ’pai èn foe gi wisrefi abra’ na ini a diniwroko foe Jehovah, soleki fa wi persoonlijk situwâsi e gi pasi foe doe, sa abi en blesi. — 2 Kor. 12:15.
11 Den velddienst konmakandra: Velddienst konmakandra moesoe sreka ibri dei foe na Ontwaakt!-bariwroko, tapoe wan ten di sa man meki den preikiman bigin froekoe na ini a diniwroko. Sani moesoe sreka so srefi foe gi kotoigi na bakadina. A moro bigi pisi foe den preikiman sa go na den velddienst konmakandra na a kaba foe den wiki, so boen den gemeente moesoe sreka velddienst konmakandra tapoe den satra nanga den sonde, na mamanten èn na bakadina, na a ten di a spesroetoe Ontwaakt! o prati.
12 Den wan di e hori den velddienst konmakandra moesoe sorgoe taki nofo gebied de foe wroko. Gebied di den no wroko foeroe den lasti pisi ten, moesoe doe fosi. Joe abi wan noso moro persoonlijk gebied di joe no wroko na ini a lasti pisi ten? Efoe joe sa abi jepi fanowdoe foe wroko den gebied disi na ini a ten foe a bariwroko, dan taki nanga a dienstopziener noso a brada di e sorgoe gi a gebied, èn den sa prisiri foe seti sani foe gi joe jepi.
13 Omeni tijdschrift joe sa prati?: Na aksi dati de gi ibri sma foe piki gi ensrefi. Foe man sabi omeni tijdschrift joe kan prati na ini a ten foe a bariwroko, hori na prakseri a sortoe gebied di joe sa wroko, joe jari, joe gosontoe, a ten di joe sa poti na ini a wroko èn tra sani di e plèi wan ròl. Ma memre a sani di ben gi foe hori na prakseri na ini na uitgave foe A Waktitoren foe 1 januari 1994: „Leki wan rai, preikiman kan abi leki marki foe eksempre, 10 tijdschrift wan moen, dati e anga foe den omstandigheid foe den; pionier kan doe moeiti foe doro 90 tijdschrift.” Na ini joe kefal, wan foe den marki disi ben sa de wan sani di joe man doro?
14 Owroeman — Boen sreka de fanowdoe: Den moesoe sorgoe taki, den preikiman e wroko a heri gebied foe a gemeente nanga a spesroetoe uitgave foe na Ontwaakt!, efoe a man. Den owroeman moesoe poti spesroetoe prakseri na tapoe ala bisnis gebied di a gemeente kisi foe doe. Den wan di e wroko den, moesoe sreka boen na fesi èn weri krin krosi. Wan moeilijk pristeri no de fanowdoe. Te joe e go na wan bisnisman, joe kan taki dati joe no e miti bisnis sma foeroe na oso èn foe dati ede meki joe e kon na en bisnis presi foe pristeri wan artikel di seiker a sa abi belangstelling gi. Baka dati, joe kan taki sjatoe foe wan spesroetoe penti na ini a tijdschrift. Stratiwroko nanga tijdschrift na ini a gebied foe a gemeente, moesoe sreka boen toe. A moro boen fasi foe doe stratiwroko na foe teki a fesi èn foe go na den sma di e pasa, na presi foe wakti taki den kon na joe. Foe di foeroe sma sa si joe, joe moesoe sabi taki joe e weri èn tjari sani di fiti. Kande tra presi de na ini joe gebied pe joe ben kan wroko na a pisiten foe a bariwroko, soleki presi pe opolani e saka, ati-oso, presi pe sma e poti den wagi, èn granisma oso. A skin foe owroeman sa bosroiti sortoe sani den kan sreka di e fiti foe gi kotoigi na den presi disi di de ini a gebied foe a gemeente.
15 Jehovah na wan wrokoman di no e weri (Joh. 5:17). A meki den hemel nanga grontapoe èn so srefi den prani nanga den meti; ma a ben tan wroko te leki a ben meki en moro prenspari mekisani tapoe grontapoe — libisma. Dati wi e libi na wan sani di langalanga abi foe doe nanga a wani di Gado wani wroko. Leki „bakaman foe Gado” dan a lobi foe wi gi en, moesoe poesoe wi „[foe de] faja foe doe toemoesi boen sani” (Ef. 5:1; Tit. 2:14). Foe di Jehovah warti foe kisi ala moeiti di wi kan doe, èn foe di a winsi foe kisi bakapisi de a marki foe wan sma di de nanga faja, dan wi moesoe wani foe doe wroko di warti na ini wi diniwroko. A no de foe taki, dati Jehovah e warderi ala moeiti di wi e meki gi en èn noiti a wroko foe wi o de lasi wroko (1 Kor. 15:58). So boen, nanga wan ati di de nanga tangi, meki wi doe tranga moeiti foe doe den aktiviteit nanga faja na ini april, ala di wi e froetrow na tapoe a feni di Jehovah e feni wi boen èn En blesi èn den foeroe boen bakapisi!