Wan spesrutu kotoigiwroko o du fu 16 oktober te go miti 12 november!
1 „A kaba fu falsi kerki de krosibei!” Dati na a nen fu a Kownukondre Nyunsu nr. 37 traktaat, di wi sa prati na heri grontapu a mun di e kon. Na ini a fosi afu pisi fu oktober, dan wi sa pristeri A Waktitoren nanga Ontwaakt! Bigin nanga munde 16 oktober te go miti sonde 12 november, wi sa prati a Kownukondre Nyunsu nr. 37 traktaat fayafaya. Na tapu den satra nanga sonde na ini a pisi ten dati, wi sa pristeri a traktaat disi makandra nanga den tijdschrift.
2 Suma kan teki prati na a wroko disi: Ala sma di e preiki a bun nyunsu fayafaya sa wani teki prati na a wroko disi. Son sma sa kisi na okasi fu du a yepi-pionierwroko. Yu abi pikin noso bijbelstudenti di e go na fesi na yeye fasi? Gi den a deki-ati fu taki nanga den owruman fu luku efu den doro den markitiki fu kon tron preikiman di no dopu ete. Owruman musu go taki nanga preikiman di no e preiki moro fu gi den deki-ati fu preiki baka, kande fu wroko makandra nanga preikiman di abi ondrofeni.
3 Ala gemeente sa kisi nofo fu a Kownukondre Nyunsu nr. 37 traktaat, so taki ala preikiman nanga pionier kan kisi 50 fu den traktaat disi. Sma di e studeri, ma di no e preiki ete, kan kisi feifi fu den traktaat disi di den kan prati gi famiri nanga mati. Ala preikiman nanga pionier musu teri omeni fu den traktaat disi den prati èn den musu skrifi disi na bakasei fu a preikiwroko raportu fu den na a kaba fu oktober nanga november. A sekretarsi sa teri omeni traktaat a gemeente prati èn a sa seni disi go na a bijkantoro na a kaba fu ibri mun. Efu son Kownukondre Nyunsu-traktaat tan abra na a kaba fu a spesrutu kotoigiwroko, dan wi kan gebroiki den na iniwan okasi te wi e preiki gi sma.
4 San wi kan taki: Hori a takimakandra syatu, fu di disi sa gi wi na okasi fu prati a boskopu nanga moro sma. Yu kan taki: „Mi e teki prati na wan wroko di e du na heri grontapu fu tyari a prenspari boskopu disi gi ala sma. Disi na yu traktaat. Grantangi leisi en.” Kande a moro bun fu no tyari wan tas te wi e go oso fu oso. No frigiti fu skrifi den nen fu ala den sma di wani sabi moro.
5 Fa yu kan wroko a kontren fu yu: Na presi fu prati a Kownukondre Nyunsu-traktaat te wi e du stratiwroko, wi musu meki ala muiti fu prati en so furu leki wi man na ini a kontren pe wi e wroko oso fu oso èn na ini bisnis kontren. Skrifi ala den strati nen nanga oso nomru fu sma di no de na oso, èn du muiti fu go na den wan tra ten noso wan tra dei na ini a wiki. Bigin nanga munde 6 november, yu kan libi wan traktaat na den oso fu sma di no de. Ma efu a gemeente abi so wan bigi kontren taki den no man wroko en na a ten fu a kotoigiwroko, dan den owruman kan teki a bosroiti fu libi wan Kownukondre Nyunsu-traktaat na ibri oso fu sma di no de.
6 A pori fu „Babilon a Bigiwan” e kon krosibei moro nanga moro. Sma musu komoto na ini en bifo a kisi pori dorodoro (Openb. 14:8; 18:8). Seti sani now fu teki prati na a kotoigiwroko disi di wi o du na heri grontapu fu fruteri ala sma taki a kaba fu falsi kerki de krosibei!