Wan spesrutu wroko fu prati wan traktaat fu 20 oktober–16 november
1 Munde 20 oktober wi o bigin nanga wan spesrutu wroko di wi o du fo wiki langa, èn a spesrutu wroko dati na taki wi o prati wan nyun traktaat di nen Yu wani sabi a piki tapu den aksi disi? Wi e howpu taki a spesrutu wroko disi di o du na heri grontapu, sa meki taki sma wani kon sabi moro fu den tru tori fu Bijbel.—Yoh. 17:17.
2 A traktaat disi e gi syatu piki tapu siksi prenspari aksi: „Gado e broko en ede nanga wi trutru?”, „Wan ten o kon pe sma no o feti noso pina moro?”, „San e pasa nanga wi te wi dede?”, „Howpu de gi den dedewan?”, „Fa mi musu begi efu mi wani taki Gado arki mi?”, èn „Fa mi kan abi wan koloku libi?” Den kerki fu Krestenhèit noiti no gi bun piki tapu den aksi disi. Srefi sma di no de Kresten aksi densrefi den sani disi, ma kande den no sabi taki Bijbel e taki krin fu den sani disi. Fu dati ede, a boskopu disi o hari furu sma prakseri.
3 Wroko na ini a heri kontren fu yu: Yu musu meki muiti fu prati a traktaat na ini a heri kontren pe yu e preiki oso fu oso. Efu a kontren pe yu musu wroko bigi, dan kande den owruman o aksi yu fu libi wan traktaat wantewante na den oso pe sma no de. No frigiti fu libi wan traktaat gi yu birtisma, yu famiri, den sma na wrokope noso na skoro èn sosrefi gi tra sma di yu e miti furu. Kande yu kan seti sani fu go na ini a yepi-pionierwroko na ini oktober noso november. Yu abi wan pikin, noso wan bijbelstudenti di e go na fesi? A doro den marki fu teki prati na a spesrutu wroko disi leki wan preikiman di no dopu ete? Efu dati de so, dan taki nanga den owruman fu a sani disi.
4 San yu kan taki: Fu man fruteri moro sma a boskopu disi, a ben o bun fu hori a takimakandra syatu. Na fesisei fu a traktaat siksi aksi skrifi. Poti wán fu den aksi disi gi na ososma, èn sori en a piki na ini a traktaat. Disi o gi ala preikiman na okasi fu pristeri a traktaat na wan fasi di e hari a prakseri fu iniwan sma na ini a kontren. Efu wan sma sori taki a wani sabi moro, dan skrifi dati èn go baka na en. Tapu satra nanga sonde, wi kan prati den nyun tijdschrift makandra nanga a traktaat. Te a spesrutu wroko kaba tapu 16 november, wi o prati a Bijbel leri-buku. Te den traktaat tan abra, dan wi sa prati den neleki fa wi e prati den tra traktaat.
5 Bigin wan bijbelstudie: A traktaat disi meki spesrutu fu yepi wi fu bigin bijbelstudie. Te yu e go baka na wan sma di wani sabi moro, dan yu kan aksi en sortu tru tori fu Bijbel trowstu en èn gi en deki-ati. Sori a sma a lasti bladzijde fu a traktaat pe skrifi taki a kan studeri Bijbel efu a wani dati, èn gi en wan Bijbel leri-buku. Efu a kan, luku wán noso tu paragraaf fu a kapitel di e taki moro fu a tori di na ososma ben taki fu en.
6 Yehovah e suku sma di wani anbegi en „nanga yeye èn nanga waarheid” (Yoh. 4:23). Meki a de so taki wi alamala e teki prati na a spesrutu wroko disi so taki wi kan yepi trawan fu kon sabi den tru tori fu Bijbel!