Tan Preiki!
1 A de Gado wani, taki „ala sortu sma musu kisi frulusu èn kon kisi wan soifri sabi fu waarheid” (1 Tim. 2:4). Na fu dati ede a gi wi a wroko fu preiki a bun nyunsu (Mat. 24:14). Efu wi e frustan fu san ede wi musu tan preiki, dan no wan sani di e meki wi lasi-ati èn di ben kan puru wi prakseri, sa tapu wi fu preiki.
2 Fu San Ede Wi Musu Horidoro? Furu sani na grontapu e puru sma prakseri, san e meki taki den e frigiti san wi e fruteri den, noso den no e si den sani di wi e fruteri den, leki prenspari sani. Fu dati ede wi musu tan memre den na Gado en boskopu fu frulusu (Mat. 24:38, 39). Boiti dati, situwâsi na ini a libi fu sma e kenki ala ten. Srefi situwâsi na grontapu kan kenki wantronso (1 Kor. 7:31). Tamara, a tra wiki, noso a tra mun, sma di wi e preiki gi den kan kisi fu du nanga tra problema noso nanga sani di e gi den broko-ede, èn den sani dati kan meki den go prakseri seryusu fu a bun nyunsu di wi e tyari gi den. Yu no de nanga tangi na ati taki a Kotoigi di ben tyari a waarheid kon na yu, ben horidoro?
3 Fu Sori Sari-ati Neleki Yehovah: Nanga pasensi, Yehovah gi pasi meki ten pasa bifo a tyari krutu kon na tapu den godelowsusma. A e gebroiki wi fu tan gi den opregtisma a seryusu kari fu go na en èn kisi frulusu (2 Petr. 3:9). Wi ben o abi brudu-paiman efu wi no ben sa meki a boskopu fu Gado en sari-ati bekènti na den sma. Wi ben o abi brudu-paiman tu efu wi no ben sa warskow den gi a krutu di Gado sa tyari kon na tapu ala sma di no e drai den baka gi den takru pasi fu den (Esek. 33:1-11). Ala di a de so taki a no ala sma wani arki san wi e preiki, toku wi musu tan du muiti ala ten fu yepi opregti sma fu sori warderi gi Gado di abi furu sari-ati.—Tori. 20:26, 27; Rom. 12:11.
4 Fu Sori Taki Wi Lobi Gado: Nanga yepi fu Yesus Krestes, Yehovah Gado gi wi a komando fu preiki a bun nyunsu na heri grontapu (Mat. 28:19, 20). Srefi efu sma no wani arki, toku wi abi na okasi fu sori taki wi lobi Gado èn taki wi gi wisrefi fu dini en, fu di wi e horidoro fu du san bun.—1 Yoh. 5:3.
5 Meki wi abi a fasti bosroiti fu tan preiki! Meki wi du dati fayafaya ala di a de Yehovah en „dei fu frulusu” ete.—2 Kor. 6:2.