Foe san ede wi e tan go baka?

¹ Oiti joe aksi joesrefi na aksi dati, kande di joe ben e sreka joesrefi foe wroko wan dei na ini a diniwroko? Na ini wan toe kontren pe wi e wroko a gebied foe wi foeroetron, den ososma kan sabi soema na wi èn esi-esi den e seni wi gowe. Wan toe sma nomo kande e handri tapoe wan boen fasi. Tokoe foeroe reide de foe san ede wi e tan go baka.

² Na a fosi presi, wi kisi a komando foe tan preiki a Kownoekondre boskopoe te leki a kaba kon (Mat. 24:14; 28:19, 20). A profeiti Jesaja ben aksi o langa a ben sa moesoe tan doe en preikiwroko. A piki di a ben kisi, skrifi na Jesaja 6:11. A de krin foe si​—a ben kisi foe jere taki a ben moesoe tan go na den sma baka nanga a boskopoe foe Gado. Na so a de toe na ini a ten disi taki, ala di den e seni wi gowe, Jehovah e froewakti foe wi taki wi e tan fisiti den sma di e tan na ini wi gebied (Esek. 3:10, 11). Disi na wan toemoesi prenspari frantiwortoe di wi kisi.​—1 Kor. 9:17.

³ Wan tra reide foe san ede wi moesoe tan go baka, na taki disi e gi wi wan okasi foe sori o loyaal wi de na Jehovah (1 Joh. 5:3). Boiti dati, te wi e prakseri fa a tamara foe a libisma famiri sa de didjonsro, dan fa wi kan tapoe wisrefi dan foe proeberi na wan lobifasi foe warskow den sma na wi sei (2 Tim. 4:2; Jak. 2:8) A de di wi de getrow na ini a wroko foe wi e gi den foeroe okasi foe doe wan sani na tapoe a boskopoe foe Gado di e gi froeloesoe, so taki den no sa man taki dati den no ben kisi a warskow.​—Esek. 5:13.

⁴ Boiti dati, wi no sabi noiti oten na ati foe son sma sa kenki. A kan bigin te wan sani kenki na ini den persoonlijk omstandigheid foe den, wan rampoe na ini na osofamiri foe den, noso den situwâsi na grontapoe di e meki den e prakseri moro serjoesoe foe a tamara foe den. Dan so srefi wan sani di wi e taki na a oso foe den kande meki den handri na wan boen fasi (Preik. 9:11; 1 Kor. 7:31). So srefi, sma e froisi. Wi kan feni njoen sma na ini wi gebied di sa doe wan sani na tapoe a boen njoensoe​—kande jongoe bigisma di e libi den wawan now èn e denki serjoesoe foe a marki foe den na ini a libi.

⁵ Wi sa tan go baka? Ija! Den Boekoe foe bijbel e gi wi nofo reide foe go baka na den sma, ibritron baka. Te foe kaba, te a preikiwroko doe kaba, dan Jehovah sa blesi wi foe di wi tan doe moeiti na ini a diniwroko, èn a sa blesi den sma di ben handri nanga tangi na tapoe a Kownoekondre boen njoensoe.​—1 Tim. 4:16.