Wan bigi doro di e tjari aktiviteit kon, opo
1 Leki wan fajafaja preikiman foe a boen njoensoe, fajafaja Paulus ben soekoe den kontren pe a nowtoe ben moro bigi, èn wan foe den ben de a foto Efeise. A preiki di a ben preiki drape ben abi so moi bakapisi, taki a ben skrifi den kompe kresten: „Wan bigi doro di e tjari aktiviteit opo gi mi” (1 Kor. 16:9). Paulus ben tan dini na ini a kontren dati èn ben jepi foeroe Efeisesma foe tron bribiman.—Tori foe den apostel 19:1-20, 26.
2 Na ini a ten disi, wan bigi doro di e tjari go na aktiviteit, opo gi wi. Wi kisi wan kari foe jepi den gemeente di no man wroko a heri kontren foe den finifini ibri jari. Na so fasi den moeiti foe wi kan poeroe a nowtoe di de na ini son kontren.—Teki gersi 2 Korentesma 8:13-15.
3 Joe kan dini pe a nowtoe moro bigi? Nanga jepi foe begi, joe ben prakseri foe a go di joe ben kan go dini na wan tra presi? Kande joe man jepi wan gemeente na ini joe eigi foto. Foe san ede joe no e taki nanga a kring-opziener foe a tori èn si san a e gi leki rai? Noso a kan taki na ini a kontren foe joe eigi gemeente, foeroe sma de di dofoe noso di e taki wan dorosei tongo èn di no wan sma ben man sorgoe gi den. Foe man sorgoe gi a nowtoe disi, joe ben kan doe moeiti foe leri a tongo foe den? Boiti dati, kande wan tra groepoe noso gemeente di e taki wan tra tongo de krosibei èn di ’begi Masra gi moro Kownoekondre wrokoman’ (Mat. 9:37, 38). Efoe a de so, joe man gi jepi na den?
4 Na ini den lasti tintenti jari, doesoendoesoen kresten osofamiri froisi go na tra kondre foe doe moro na ini a kotiwroko. Wán trowpaar di ben doe dati, ben taki: „Wi ben wani dini Jehovah pe wi ben kan doe moro foeroe.” Te joe abi na angri disi èn joe feni taki joe man froisi go na wan tra presi na ini a kondre disi noso efoe joe doro den markitiki foe dini na ini wan tra kondre, dan taki fosi foe den plan foe joe nanga den owroeman foe joe gemeente.
5 Efoe joe wani aksi a Genootschap pe wan nowtoe de, dan gi a dienstkomte foe a gemeente wan brifi di e taki san na a spesroetoe sani di joe ben sa wani. Den sa poti den komentaar toe èn seni en go na a genootschap. Ma awansi san e pasa, so langa a doro di e tjari aktiviteit kon e tan opo, meki a de so, taki wi alamala tan abi foeroe foe doe na ini a diniwroko foe Jehovah.—1 Kor. 15:58.